Saavedra Fernández-Combarro: “Les propuestes de TermAst dan-y valor y dignidá al asturianu”

|

Ricardo Saavedra Fernández-Combarro (Uviéu, 1977) ye l’autor de la propuesta última de TermAst, la octava dende que s’entamó esti proyeutu nel 2009. El doctor en Filoloxía Española presentó una terminoloxía de Teoría de la Lliteratura.

¿Por qué decidió presentar esta propuesta pa TermAst?
 
En realidá la idea partió de la propia Academia de la Llingua Asturiana. Saben del mio compromisu pa cola fala y l’asturianu y pensaron que, pola mio formación en Teoría de la Lliteratura, yo podía ser una persona afayadiza pa facer una propuesta terminolóxica nesta materia. Paecióme un trabayu perguapu y acepté ensin duldar.
 
¿Cuántos términos inclúi?
 
Tien cásique cuatrocientos términos. Dixéranme de llegar a unos trescientos, pero na práctica, una vez qu’afites unos criterios d’inclusión/esclusión, ye imposible cortar nun númberu determináu sin dexar fuera dalgunos términos imprescindibles.
 
¿A quién va destinada esta terminoloxía?
 
Pienso que pue ser útil pa cualquier nivel d’enseñanza nel que s’impartan materies rellacionaes cola Teoría de la Lliteratura y cola Historia de la Lliteratura, yá sía na Secundaria o nel ámbitu universitariu. Trátase de términos que s’empleguen pal análisis de testos poéticos, narrativos y teatrales.
 
¿Cómo recibió la comunidá educativa y la ciudadanía la so propuesta?
 
Tovía ye mui ceo pa sabelo, nun me llegaron opiniones o valoraciones esternes. Lo interesante ye que ye eso, una propuesta, y siempre pue arriquecese y modificase col tiempu con aportaciones d’otres voces del mundu de la Filoloxía Asturiana.
 
¿Foi difícil ellaborar esti llistáu de pallabres venceyaes a la Teoría de la Lliteratura?
 
El trabayu tuvo dos partes bien estremaes: per un llau, la escoyeta de términos que compondríen la propuesta; per otru llau, la torna de cada vocablu dende otres llingües y la so definición. Foi nesta segunda parte del procesu onde se presentaron les mayores dificultaes, especialmente na decisión de la torna más afayadiza pa cada casu.
 
¿Qué métodu de trabayu utilizó?
 
Partí de la revisión de varios glosarios, n’otres llingües, de disciplines como la Narratoloxía, la Semioloxía dramática y la Historia de la Lliteratura. Esto llevóme a plantegame qué términos yeren los necesarios pa una propuesta terminolóxica de Teoría de la Lliteratura, conque tuvi que completar la llista con dalgunos conceptos ausentes n’otros trabayos. Cuando yá tenía claro qué pallabres teníen qu’apaecer, dediqué los mios esfuerzos a la torna de los conceptos y les sos definiciones, teniendo siempre en cuenta que nun se podíen alloñar d’un nivel más o menos divulgativu.
 
¿Qué supón una iniciativa como TermAst pa la llingua asturiana?
 
Paezme imprescindible desendolcar esti tipu de propuestes pola so operatividá na enseñanza y la investigación y pol valor y la dignidá que-y confieren al asturianu. Nun pue entendese un procesu de normalización d’una llingua si nun s’afita con naturalidá nel ámbitu científicu y académicu.
 
¿Tien previsto collaborar nun futuru con dalguna otra propuesta?
 
Siempre toi dispuestu a collaborar en cualquier iniciativa rellacionada col asturianu o la fala na que la mio formación me permita aportar daqué positivu.
 
El 4 de mayu pasáu participó nel actu académicu del Día de les Lletres Asturianes faciendo una defensa del gallego-asturiano. ¿Qué-y paeció la decisión de l’Academia de la Llingua Asturiana de dar la pallabra a persones del ámbitu cultural pa que reflexonaren sobre’l futuru del idioma?
 
Foi un honor mui grande participar nesi actu, sobre too porque lo fici como’l representante de la llingua y la cultura del Navia-Eo. L’Academia, como toles instituciones, asociaciones y particulares favoratibles al asturianu y el eonaviego, ye consciente de la necesidá d’anovar el discursu y les iniciatives pa cola llingua. Dar voz a xente de diferentes ámbitos del mundu de la cultura ye, ensin dulda, una bona idea, acordies colos tiempos, qu’aportó frescor al actu dientro de la so solemnidá. Tamién ye una invitación pa que toos pongamos a funcionar la mente, una forma d’apelar a la xente pa qu’abandone la pasividá y el victimismu y pase a l’aición como protagonista de la reivindicación llingüística. Ye entós cuando ún se da cuenta de lo malo que ta de facer un discursu que nun caya na repetición y nos tópicos.
 
¿Podemos ser optimistes sobre la sobrevivencia del asturianu y del gallego-asturiano?
 
La mio filosofía vital cai siempre pal llau del pesimismu constructivu; ye dicir, la situación ye mala, nun se pue ser inxenuu, pero’l trabayu constante, la llucha ensin descansu, ye’l camín vital con más sentíu. La voluntá ye un combustible imprescindible pal motor de l’aición. Usando pallabres d’Ángel González, anque nun haya esperanza, siempre hai que dir con convencimientu.
 
¿Tuvo la Selmana de les Lletres Asturianes la visibilidá que merez?
 
Nunca me paeció que la tuviera y quiciabes menos esti añu. Especialmente l’actu de l’Academia, que, por renovador, merecía daqué más d’atención. Aproximase a la invisibilidá ye lo más peligroso, el principiu de la fin, y eso, ta claro, hai xente que lo sabe.
 
Amás de filólogu y profesor de Secundaria, vusté ye músicu y escritor. ¿Ta trabayando en dalgún proyeutu anguaño?
 
Va poco que’editamos el segundu discu de Bacotexo, ‘Homes invisibles’ (Boomerang Discos), que se pue sentir nel nuestru myspace. Esperamos poder presentalu con dalgunos conciertos en direutu nel branu. Per otra parte, intento sacar tiempu pa da-y daqué de continuidá a la creación lliteraria na fala. Últimamente toi trabayando más na poesía. Creo que voi siguir per esti camín nos meses próximos.

Contador Estadistiques