Prieto: “Ye una satisfaición cuando ves que los neños y neñes sienten apreciu pola llingua asturiana”

|

María Jesús Prieto (Xixón, 1963) y Xulia Alonso (Xixón, 1975) son profesores d’asturianu nel Evaristo Valle. Los escolinos y escolines de quintu y sestu de Primaria d’esti colexu, a los que dan clase, tán acabantes de ganar el ‘Ruempi la Mollera’.

¿En qué consiste’l Concursu ‘¡Ruempi la mollera!’?
 
‘Ruempi la Mollera’ ye un xuegu-concursu d’entrugues y rempuestes organizáu pola Oficina Municipal de la Llingua del Ayuntamientu de Xixón, destináu a los escolinos y escolines del Tercer Ciclu de Primaria que tien l’oxetivu d’usar la llingua asturiana pa deprender coses de Xixón, del barriu, de persones relacionaes cola ciudá, curiosidaes... El concursu preséntase como una manera d’averar la llingua asturiana al alumnáu de Xixón al traviés de la cultura, los personaxes y la historia del conceyu.
 
Nes primeres convocatorias yeren ocho entrugues les que teníamos que responder a lo llargo’l cursu, pero la esperiencia foi demostrando que yeren munches y agora llevamos dos años nos que’l númberu redúxose a cuatro. Al entamu del xuegu, llega a les escueles participantes un panel onde van apegándose unes tarxetes coles entrugues y, poco a poco, otres tarxetes coles puntuaciones que vamos algamando tolos centros que participamos. Les entrugues mándenles cada dos meses, más o menos. Na nuesa escuela decidimos que repartiríamos les entrugues alternativamente ente los dos cursos del ciclu. Cuando damos cola solución, entama un trabayu d’investigación, de búsqueda d’información, pa depués repartirse n’equipos tres decidir y distribuyir los distintos apartaos que va tener el trabayu que vamos facer. Casi siempre, xunto a un trabayu escritu a mano –que nun debe ser mayor de 25 páxines, según les bases del xuegu– y nel que s’ argumenta y xustifica la rempuesta, presentamos una aportación plástica –maqueta, figures, dibuxos, xuegos…– como complementu. Cada rempuesta valórase de 0 a 3 puntos y tiense en cuenta, amás de dar cola rempuesta correuta, l’asturianu usáu, los dibuxos y que se vea que ta fecho a comuña, principalmente.
 
¿Cuántos colexos participen?
 
Nel quintu añu que la Oficina Municipal de la Llingua organiza’l concursu participamos diez escueles: Atalía, Asturias, Evaristo Valle, García Lorca, Jacinto Benavente, Jovellanos, Manuel Martínez Blanco, Príncipe de Asturias, La Milagrosa y San Lorenzo.
 
¿Ye la primer vez que gana l’Evaristo Valle?
 
Non, el Colexu Públicu Evaristo Valle yá ganó tamién el primer premiu nel cursu 2008-2009.
 
Nesta edición del concursu, ¿en qué consistieron les entrugues?
 
Hubo un poco de too: escultura, arquitectura, un escritor (lliteratura) y un personaxe al que, como diz el dichu, Xixón débe-y el restu – “Xixón debe la mar a Dios y el restu a Xovellanos”–.
El 8 d’ochobre del 2010 entamábemos los grupos de sestu cola primer entruga: “Esta moza que dende'l so rinconín nun ye a separtar los güeyos de la mar, sigue tan guapa como'l primer día magar que ta acabante cumplir los 40. ¿Sabes de quién tamos falando?”: La madre del emigrante.Al rodiu d’esta rempuesta, amás de falar de la protagonista, trabayamos nun percorríu pel muséu que Xixón tien al aire llibre, conociendo la bayura d’ escultures qu’adornen la ciudá. Tamién ficimos una figurina en plastilina de la Lloca El Rinconín.
 
Otra entruga que-yos tocó a los de quintu n’avientu foi una relativa a Andrés Solar: “Un escritor nacíu en Deva asoleyó esti poema:Toi buscando / la manera de dicite / qu’hai milenta razones / que se llamen como tu / y qu’esperen por ti / qu’esperen por ti. […]. ¿Sabríes dicinos quién foi?”. Nesta ocasión costó un poquiñín dar cola rempuesta, pero fuimos aportándo-yos dalguna pistuca, yá que cuando nel añu 2004 se-y dedicó la Selmana de les Lletres a esti xixonés, fízose-y un homenaxe na nuestra escuela. Amás de conocer la vida y la obra d’Andrés Solar, incluyendo una entrevista que-y fizo una neña a la hermana d’Andrés, trabayóse tamién la parroquia de Deva.
 
¿Cómo ye’l métodu de trabayu qu’utilicen en clase pa dir superando les pruebes?
 
Pa responder les entrugues que van llegando facemos lo qu’esplicábamos enantes. Lo primero ye aldovinar la solución. Llueu investigar y buscar información pa facer una esposición de tolo que s’atopa. A la vista del material alcontráu, plantegamos la estructura del trabayu escritu, facemos equipos repartiendo los distintos apartaos y decidimos la aportación plástica o manualidad que vamos aportar, si ye’l casu.
 
¿Ye un llabor complicáu pa los escolinos y escolines?
 
Paeznos que non. Per un llau nun son mui difíciles les entrugues y, per otru, si nun son quien a dar cola rempuesta solos y soles, dexámoslos buscar ayuda na familia, nel profesoraú del centru…, o si se diera’l casu, en nosotres mesmes –que como pasó nel casu d’ Andrés Solar, ampliamos la entruga con dalguna pistuca más–. Quiciabes lo más complicao seya’l llabor de tener que tornar al asturianu la mayoría de la información qu’alcuentren y necesiten pal trabayu. El trabayu plásticu nun ye problema. Hai unos y unes artistes pergrandes.
 
¿Cómo recibieron los escolinos y escolines la victoria nel concursu?
 
Entusiasmaos, pero dende’l principio siempre-yos diximos que lo más importante yera lo que diben deprender y lo bien que se podía pasar trabayando l’asturianu con esta actividá. Ye xusto dicir que los grupos de sestu, los veteranos, teníen ganes de meyorar la posición del añu anterior, un tercer puestu, y, anque fuimos tol concursu na primera posición, tuvimos mui a la par col colexu Príncipe d’ Asturies, ganador de la última convocatoria del Ruempi. Foi mui emocionante hasta lo último. Na entrega de premios taben pernerviosos y saltaron d’allegría cuando supimos la puntuación final.
 
¿Qué llevaron como premiu?
 
El premiu ye siempre mui asemeyáu pa los tres o cuatro primeros colexos. Lo único que los fae diferentes ye’l tamañu. De primeres, dannos una figurina-troféu col personaxe que representa’l concursu, un trasgu. Pa cada neñu y neña participante hai un diploma y dellos regalinos de cosines que fai la Oficina Municipal de la Llingua como promoción y que camuden d’añu n’añu. Pal centru, un bon y perguapu garapiellu de llibros y dos xuegos de mesa de los editaos pola mesma Oficina Municipal de la Llingua, que suelen salir d’otra actividá-concursu orientáu a Secundaria, ‘Vas velo’, que tien como premiu la edición del material didáuticu ellaboráu.
 
¿Ye destacada la implación de los críos y críes na asignatura de llingua asturiana?
 
Hai esceiciones, pero, en xeneral, hai que dicir que non. Présta-yos trabayar n’actividaes como esta del Ruempi, pero delles vegaes l’enfotu que se ve ye más porque tiramos d’ellos que porque salga voluntariamente d’ellos y elles. Tamién ye verdá qu’a estes edaes, los neños y les neñes van dexando de tar nes clases d’ asturianu porque les familias asina lo decidieron un día y ye’l momentu nel qu’entamen a sentir más conscientemente apreciu yá interés pol deprendimientu del asturianu. Ye una gran satisfacción cuando ves que se sienten encariñaos cola nuesa llingua.
 
¿Y de los pas?
 
Pues hai de too tamién, dende les familias que se preocupen y tán pendientes tanto del rendimientu como de l’actitud qu’amuesen los sos fíos y fíes, hasta les que nun s’esmolecen gran cosa, anque los resultaos nun seyan los adecuaos. En xeneral, collaboren coles propuestes que-yos podamos facer.
 
¿Qué ye lo que más-yos presta de la materia?
 
Tien munchu ésitu la llectura de cuentos y el trabayu que con ellos se faiga; facer teatru y los cancios. Toles xeres onde se ponga a trabayar la creatividá y la imaxinación ye lo más prestoso, muncho más que les normes d’ortografia y les pincelaes de gramática que se ven.
 
¿Tien futuru l’asturianu con estos neños y neñes que reciben educación na llingua del país?
 
La cosa ta complicada, pero ye necesario esto y muncho más. Pa cualquier persona nacida n’Asturies tien que ser prestoso tener abondu conocimientu de les costumes y la llingua de so. Y un bon entamu ye enseñalo nes escueles. Pero fai falta muncho más, porque si llueu nun se fala na cai nin nel trabayu, si al asturianu nun se-y dan les mesmes oportunidaes qu’al castellanu pa que llueu caún fale lo que más-y pete, va ser difícil facer qu’esta llingua nuesta espoxigue y se caltenga nel tiempu.
 
Cuando terminen esti Tercer Ciclu de Primaria, ¿van tener continuidá en llingua asturiana en Secundaria?
 
Al pasar al instititutu tienen la posibilidá real d’escoyer Llingua Asturiana/Gallego-Asturiano, ya que ye una asignatura que se-yos ufierta como voluntaria y optativa. Pero esa posibilidá dexa de ser tan real cuando l’asturianu tien que competir con otres árees llingüístiques y s’imponen unes ratios mínimes pa la formación de grupos d’escolines y escolinos interesaos en recibir les enseñances de Llingua Asturiana o Gallego-Asturiano. Si nun se llega a esa ratio mínima, desatiéndesen les demandes y pasen a repartise ente les otres optatives.
 
¿Cómo ye la situación del profesoráu de llingua asturiana n’actualidá?
 
Vamos de mal en peor. Al entamar esti cursu, munchos centros d’Educación Infantil solicitaron ufiertar Llingua Asturiana y denegóse-yos la petición –la mayoría nin siquiera la ufiertaron, como ye prescriptivo–. Na Educación Primaria, los recortes de plantiyes xustificaos pola crisis, menguaron considerablemente les places de Llingua y más de la metá son a media xornada –nós mesmos somos ún de los centros afectaos pola tresformación d’ una plaza a xornada completa por otra de media xornada–. Toos estos recortes repercuten na merma de la calidá de la enseñanza, coles ratios al máximu en Primaria y la eliminación de l’atención al alumnáu d’Infantil. En Secundaria, yá vio na entruga anterior que la situación tampoco ye mui favoratible.
 
Ye urxente que se tomen midíes pa encarrilar esti tema. La estabilidá del profesoráu nesti área ye básica y perimportante y pa ello namás hai un camín: que les places de Llingua Asturiana y Gallego-Asturiano pasen a formar parte de les plantiyes orgániques de los centros, lo qu’ enllaza cola creación de la especialidá y la convocatoria d’ oposiciones pa cubrir eses places. Tamién ye necesario siguir insistiendo nuna presencia cada día mayor del asturianu nos medios de comunicación. ¿Y qué-y voi dicir sobre la necesidá de consiguir la reconocencia de los derechos llingüísticos de los asturianos y asturianes? Sedría’l pasu definitivu pa favorecer la sobreviviencia de la nuesa llingua y cultura. Ye daqué que munchos docentes tenemos claro, pero nun hai voluntá política pa ello. Y nun nos val otra disculpa.
 

Contador Estadistiques