Portal: “Anque lo rural ta en crisis, esiste una arquitectura y costumes aínda vives”

La cultura propia de la zona conformada por Villaviciosa, Cabranes y Colunga tien una revista nueva, n’asturianu dafechu y de nome ‘Friúz’. Edítala la comprometida asociación El Ronchel y l’escritor Lluis Portal Hevia (Villaviciosa, 1964) ye ún de los sos responsables.

¿Con qué oxetivu naz Friúz?

L’asociación El Ronchel, qu’edita la revista, esiste dende l’añu 2002 y fai numberoses actividaes culturales que queden esclusivamente nel conceyu. La revista Friúz da-y un poco de cobertura más allá del propiu conceyu. Pretendemos sacar una revista cada tres meses.

La revista ye n'asturianu dafechu.

Sí, ye n’asturianu porque trátase d’una entidá bablista.

¿Cuándo empezaron cola idea de crear la revista?

Entamóse hai unos meses, surdió la idea de publicala y vióse bien polos miembros de la entidá.

¿Qué tipu de conteníos tien?

Fundamentalmente son cuestiones rellacionaes cola cultura propia na comarca natural que formen Villaviciosa, Cabranes y Colunga: toponimia, escritores n’asturianu, dar cuenta de les espublizaciones na/sobre la llingua... Por exemplu l’añu pasáu espublizóse en Villaviciosa’l magníficu llibru de Xuan Pedrayes sobre Pedro Peón Duque d’Estrada (s. XVIII) –n’asturianu–; otru de Senén Rivero sobre l’apasionante y desconocida historia del fotógrafu, periodista y aventureru Ramón del Valle (s. XIX) y les reseñes sobre personaxes maliayos, delles n’asturianu; finalmente Miguel González Pereda publicó –nun llibru en bable– una biografía del cronista de La Villa, Ramón Rivero, que por ciertu escribió n’asturianu obres de teatru y dellos poemes. Son llibros de ‘Cubera’ que tienen una circulación llimitada a los socios y qu’hai que dar a conocer. Per otra parte publíquense tamiés delles noticies xenerales y d’actualidá sobre l’asturianu. De momentu’l númberu de páxines ye escasu, quixéramos amplialu.

Friúz ye un topónimu de Quintueles. ¿Por qué esti nome de llugar pa nomar al proyeutu?

Sí, simplemente prestónos el topónimu y la so evolución hasta anguañu. Sobre tou queremos da-y un sentíu urbanu y rural al periódicu. Creemos qu’uno nun esclúi a lo otro. Pero hai que recordar qu’estos conceyos son mayormente rurales, anque lo rural ta en crisis, pero esiste una arquitectura aínda viva, y unes costumes vives, etc., que puen convivir coles villes.

¿Quién participa na so redaición?

La redaición ta formada por media docena de persones lligaes a l’asociación. Por supuesto, aceutamos collaboradores.

La revista nun tien publicidá. ¿Cómo financien la so espublización?

De la revista mándase a unes 200 persones vía mail y espublícense 150 periódicos más que se reparten peles villes. Esto segundo ye lo que nos cuesta. Queremos consiguir el sofitu de les instituciones que, a lo cabero, con la crisis, llimitárense muncho y tamos viendo la posibilidá de meter publicidá. 

¿Ónde pue atopar Friúz la xente interesao na so llectura?

De momento solo podemos dar la direición del nuestru corréu como forma de conseguir la revista: elronchel@gmail.com.

¿Qué otres actividaes entama El Ronchel?

El Día de les Lletres Asturianes repartense 2.000 lletres de pan nos seis conceyos de la Comarca de la Sidra; faense charles a través del Aula Carlos de la Concha nel Atenéu Obreru; reeditóse la obra ‘Peñas Cantábricas’, de Rafael Balbín, y publicóse un llibru de cien cancios n’asturianu; n’Antroxu –con periodicidá desigual– sácase’l periódicu de los años 30, ‘El Fumiacu’. Fáense campañes de concienciación como la de ‘Morgazu equí’, pa echar la basoria nos contenedores, organícense cursos n’asturianu, etc. Pero sobre too, l’asociación tuvo la iniciativa de dar los pasos necesarios pa poner en marcha el Serviciu de Normalización de la Comarca de la Sidra, reuniéndose colos alcaldes de la zona pa que lo solicitasen.    

Nel terrén personal, ¿ta trabayando anguaño en dalgún proyeutu?

Voi sacar prósimamente un trabayu, fechu en L’Habana, sobre l’escritor y periodista maliayés Carlos Ciaño, que marchó como tantos asturianos a Cuba, trabayando como periodista en distintes cabeceres. Ye una oportunidá pa dar a conocer a esti escritor que ta enterráu al pie d’una palmera yuraguana, nel cimenteriu Colón.