Pepe Fueyo: “Siguimos teniendo la mesma ilusión que’l primer día; entá nos falten munchos quilómetros pa llegar a la meta”

L’emotivu conciertu del 8 d’avientu del 2013 en Mieres con motivu de los 18 años de vida de Skanda yá se pue disfrutar en casa gracies al cuidáu llibru-CD-DVD de nome ‘18’. La voz y guitarra acústica Pepe Fernández-Quevedo Fueyo (Mieres del Camín, 1963) faló con Asturies.com d’esta esperiencia y del pasáu y futuru del grupu.

Son yá 18 años pa 19, ¿non?

N'avientu de 1996 teníamos  un grupu de rock nel que decidimos meter dalguna gaita. Lo que nun cuntábamos yera con qu'esa mesma gaita tomaríanos la delantrera, diba abducinos y diba  llevanos a plantegar un cambéu más radical nel conceutu. Tol mundu sabe que “lo qu'importa ye'l conceutu”, asina que coyimos el conceutu polos cuernos y nin curtios nin galbaniegos embarcámonos nel proyectu Skanda. L'entamu foi rodáu; en trés meses teníamos un repertoriu montáu sobre composiciones propies y música tradicional y debutamos na Folixa de Mieres un 11 d'abril de 1997. Dende entós nun paramos

Y qué mayor manera que celebralo con esti trabayu, ‘18’.

Pues sí, nun se m’ocurre una manera meyor qu'arrodianos de collacios, tantu nel escenariu comu nel patiu butaques, y esfrutar d'un conciertu como nunca lo fixéramos. La preparación y coordinación de les casi cien persones que trabayamos nel eventu foi una obra casi faraónica. Los cuatro díes d'auditoriu fueron d'un trabayu demencial, acabamos lliteralmente esfarrapláos, pero cuando llegó'l domingu a les 6 de la tarde evaporóse tol cansanciu y el gocie qu'esperimentamos nun pue esplicase con pallabres. Sólo voi dicir que casi toos finamos con llárimes d'emoción el términu del ‘18’.

¿Quiénes collaboraron nesti conciertu especial que tuvo llugar en Mieres?

Tuvimos la enorme suerte de cuntar con una pila d'amigos que desinteresadamente volcáronse al cientu per cientu nel proyectu. Nel escenariu cantando y tocando tuvieron Marisa Valle Roso, Anabel Santiago, Silvia Quesada, Alfredo González, Pablo Moro, Imanol Núñez, Berto Argayaes, el Corín de la escuela de música de Mieres, Big Band de Mieres, Pandereteres de Fitoria, Coru Mineru de Turón, Banda Gaites Villa de Mieres, Juan Yagüe y Dani Álvarez. En cuanto al equipu técnicu compartieron con nós José Taboas y José Méndez en la realización, David Pardo como ayudante de realización y Lucía Gonzalez como rexidora. Detrás de les cámares tuvieron Emi Atriu, Sergio Louzao, Miguel Llambas, José Blanco, Javier García, Alberto Moreno y Javier Martínez. César Sampedro fizo les semeyes, Dani González y Darío Camba, la grabación soníu directu, y Víctor Vivar, la llume. Na producción: Rubén G. Revilla, Pablo Quiroga y Marlén Sampedro. Pablo Pujades fixo un enorme trabayu nel diseñu y maquetación del llibru y Marta Quinteru ayudónos cola escenografía y la decoración.

¿Cómo foi la esperiencia?

El trabayu foi bien duru, pero la recompensa supera abondu tolos esfuerzos. La sensación de venos arropaos por tantes y tan queríes persones, compartir escenariu con tantos amigos, ye difícil d’esponer y tener na mano’l resultáu fainos tar arguyosos del trabayu de tantos años. La satisfaición personal ye'l meyor estímulu.

¿Y la respuesta del públicu?

Del conciertu, puedes imaxinátelo, xugábamos en casa. Tal foi'l ciñu que nos tresmitieron qu'acabamos llorando. Yo, personalmente, enforma. En cuanto al DVD, el CD y el llibru, pel momentu, too son norabones.

¿Foi complicao facer la esbilla de cantares pal conciertu?

Lo verdaderamente difícil nun ye escoyer los cantares que quies cantar, sinón los qu'hai que refugar. Hai que cinxise al tiempu máximu de música que puedes incluyir nun CD, por eso tuvimos que separtar un númberu grande de cantares que nos gustaría grabar. Non nos punximos d'alcuerdu en toes, pero a la fin nun fixo falta llegar a los puños y algamamos un consensu.

‘18’ amás de CD y DVD ye tamién un llibru.

Nos tiempos que cuerren hai qu'ufiertar daqué distintu o novedosu pa que la xente se fixe no que faes, por eso decidimos sacar una edición especial d'esti trabayu nel qu'amás del discu d'audiu y el DVD del conciertu, ufiertamos un llibru con un bon númberu de semeyes con tolos collaboradores, una bitácora o diariu de viaxe de los cuatro díes enzarraos nel auditoriu, y una serie de relatos, esto como apuesta personal, referíos a cada cantar.

Echando la vista atrás, ¿qué valoración fai de la trayeutoria del grupu nesos 18 años?

Cuando entamamos el proyectu Skanda l'oxetivu principal yera pasalo bien y puedo asegurate que salvando delles situaciones, bien poques, consiguímoslo. Agora, algamada la mayoría d'edá, la meta sigue siendo la misma y lo guapo ye que lo siguimos consiguiendo. Dende'l primer día l'oxetivu foi arriquecer, na midida de les nueses posibilidaes, la música tradicional añediendo instrumentos, digamos modernos y fundir les distintes músiques de les que bebimos. Tamién foi oxetivu primordial la composición propia. Creo que lo consiguimos y amás siguimos avanzando nel mesmu sentíu

¿Hebo munchos cambios na formación orixinal?

La formación orixinal duró fasta primeros de 2006, momentu nel que dos miembros dexen el grupu. Incorpórense entós Tino col baxu y Michel na guitarra eléctrica. Fasta entós llevábamos grabaos trés discos y cola nueva formación grabamos ‘El Cuartu’ y ‘Folk & Roll Circus’.  A los pocos meses d'editar el quintu incorpórase nel violín Héctor Braga. Agora cuntamos tamién cola inestimable collaboración del pergrande Eduardo Salueña colos sos teclaos máxicos.

De los primeros Skanda quedamos trés: Xuan na batería, Marco coles gaites y les flautes y yo cola acústica y cantando cada vez peor (si cabe)

¿Qué conciertos recuerden con más ciñu?

Cada momentu tien la so maxa; cada conciertu tien daqué que nun tienen los demás. Nun podría dicite'l meyor. Hebo munchos especiales: el debú na segunda Folixa de Mieres; los conciertos de Radiu 3, compartiendo escenariu con Reincidentes y Mägo de Oz en Villafranca de los Barros (Badajoz); un diluviu nel II Festival Celta de Los Ancares, onde conocimos a Iñaki Peña; con  Capercaille en Mieres; les trés vegaes que fuimos al Poborina Folk en Teruel, onde'l públicu glayaba al unísonu “Mieres capital, Uviéu sucursal”; la presentación del ‘Mecigaya’ nel Teatru Xovellanos de Xixón; n’Ágreda (Soria) en Músiques de Frontera; la presentación del ‘Sangre d’ochobre’ nel auditoriu de CaxaAstur de Mieres; el festival de Lorient; los branos de Milagros en Burgos; el Celtirock portugués; con Gwendal na Folixa del 2007; la Nueche Celta de Mijas (Málaga); na plaza del Rossio (Lisboa); tolos Folksticios que celebramos nel Habana de Mieres… Podría siguir hasta l'infinitu o más allá.

¿Camudó muncho la escena musical de cuando principiaron?

Daqué camudó, sobre manera empieza a notase cuando esta crisis económica que nos engulle salta a l'actualidá. La falta de dineru refléxase na cultura, la música como ye'l nuesu casu. Afortunadamente n'Asturies sigue habiendo un gran númberu de formaciones y polo xeneral, una bien alta calidá musical. El problema que veo yo ye que nun sabemos vender lo de nueso como se merez. Otres comunidaes axacentes trabayen muncho más que nós y non precisamente porque lo faigan meyor; a cencielles, saben vendelo meyor que los asturianos.

La situación del idioma cuasiqué nun cambió.

Nun camudó nada. Mientres los nuesos políticos nun se dean cuenta de que l'idioma ye la principal baza del patrimoniu cultural d'un país, vamos tener que siguir lluchando.

Xeneralmente la xente asitia a Skanda nel mundu folk, pero la música del grupu va más allá.

Ye difícil encasillar l'estilu de música que faemos. Nós somos los primeros n'escapar d'ello; n'escaecer etiquetes y faer en cada momentu la música que más nos presta. Entá asina, ye ciertu que la base del nuesu trabayu ye l'aire tradicional del arcu atlánticu, pero eso sí, adobáu con otres corrientes más universales. No fondero, gústenos o non, vivimos nuna enorme aldega global.

Precisamente tán nominaos a los Premios AMAS como meyor discu folk. ¿Qué significa pal grupu tar ente los cuatro aspirantes a esti gallardón?

Pal grupu ta bien que te nomen a cualquier premiu. Ye publicidá gratuita. Pero teniendo en cuenta qu'esta ye la décima edición de los AMAS y ésta ye la primer vegada que tenemos una nominación, una, pa min, personalmente, nun significa nada. Dempués de tantos años na música nun tengo nenguna fe en concursos nin nominaciones a premios. El meyor premiu ye l'aplausu del públicu.

¿Queda Skanda pa ratu?

Dempués de dieciocho año siguimos teniendo la mesma ilusión que'l primer día. Colos pies un pocu meyor asitiaos nel suelu, pero esfrutando d'igual manera toles etapes del viaxe. Entá falten munchos quilómetros pa llegar a la meta.

¿Qué planes tienen pa esti 2015?

Lo primero esfrutar d'esti trabayu y dalu a conocer. Ye difícil presentar en directu un conciertu como ésti por mor del gran númberu de collaboradores que, de la mesma, tienen tamién los sos propios bolos, pero en breve vamos facelo. Entá nun podemos dicir nada, pero va ser dientro poco. Per otra parte, tamos trabayando no que va ser el nuesu séptimu CD y ye la nuesa intención grabalu y ponelu a la venta esti añu. Sólo dicir que va ser distintu a lo que llevamos fechu fasta agora.