Oi! N’Ast: “Prestaríanos enforma que viniera al conciertu la mocedá asturiano que nun nos vio naquellos tiempos”

|
Oi! N’Ast: “Prestaríanos enforma que viniera al conciertu la mocedá asturiano que nun nos vio naquellos tiempos”

El sábadu 30 Oi! N’Ast va tornar a los escenarios. Diez años depués de la disolución de la banda, la formación más estable del grupu xúnese pa una única actuación en Xixón. Asturies.com faló colos sos componentes.

Diez años depués tornen a xuntase pa esti conciertu especial. ¿Qué-yos llevó a ello?

Siempre que coincidíamos toos  comentábemos que taría prestoso dar un conciertu-reunión dalgún día, y siempre diximos qu’una buena fecha sería a los 10 años de la separación. A primeros d’esti añu un siguidor y collaborador de la banda propúxonoslo y paeciónos una buena idega.

¿Va ser una actuación única o van ufrir más conciertos?

Va ser una actuación única, asina que tanto los que nun nos vieron nesa época como la xente que quiera revivir esos conciertos tendrán una oportunidá única el 30 de xunetu.

Oi! n'Ast ye una banda referente na escena a nivel estatal. ¿Ta llevantando muncha espectación esti reencuentru?

Al paecer ta teniendo bastante repercusión fuera de les nueses llendes, y esperamos xente procedente de diversos puntos del Estáu, anque lo que nos prestaría enforma sería que viniera mocedá asturiano que nun nos vio naquellos tiempos.

¿Qué formación va tocar nel Sweet 01?

La más estable, que foi la que mas xiró, esto ye, Hugo a la voz, Ra y Peke a les guitarres, Kiko al baxu, Nacho a la batería y Xuan Naveiras cola gaita. Tamién esperamos la collaboración d’antiguos componentes de la banda nel conciertu.

¿Cómo foron los anicios del grupu allá pol 1999?

Como los de cualquier banda, suponemos... Un grupu de collacios con ganes de facer la música que-yos presta, tocar en sitios y pasalo bien. Nel casu d’Oi! n'Ast, al pocu d’entamar saliónos un grupu bayurosu de siguidores per toda Asturies quiciabes pola falta de una banda d’Oi! asturiana, asina qu’a lo poco yá teníemos oportunidaes de tocar y un fervosu grupu de xente que nos acompañaben per tolos bolos que facíemos cantando les nueses canciones birra en mano.

Nesi tiempu grabaron un discu y temes en dellos recopilatorios y salieron a tocar pel tol Estáu y fuera del mesmu.

Daquella Xabi Brixton, un bon conocíu de dellos miembros de la banda, taba inaugurando’l so sellu discográficu, asina que nos ofreció grabar con él, lo que nun duldamos nin por un minutu. El discu vendióse bastante bien y a partir d’ehí saliéronnos oportunidaes p’apaecer en dellos recopilatorios, inclusive de grabar dos temes mas pal recopilatoriu de bandes asturianes ‘Rock and llingua’.

¿El cantar n'asturianu nunca foi una torga pa salir fuera?

Al contrario, tenemos recuerdos de tar tocando fuera y tar la xente cantando les canciones. Y a principios-mediaos de la década 2000 nel Estáu nun yera tan habitual como agora ver a una banda con gaita faciendo oi! amestáu con punk célticu, asina que nos recibieron mui bien.

¿Cuál ye'l meyor recuerdu que tienen de los siete años de vida d'Oi! n'Ast?

Los meyores recuerdos foron los viaxes, sobre manera a Burdeos y a Suiza al festival antirracista de Xinebra, onde compartimos cartelu con bandes como Sham 69, Peter and The Test Tube Babies, Running Riot o The Busters, por poner exemplos.

¿Por qué se disolvió la banda nel 2006?

La disolucion de la banda vieno porque llegó’l fin d’una época... Aparte de les típiques tensiones que surden en cualesquier banda, la escena Oi! estatal per aquel tiempu garró un rumbu caóticu y Oi! n’Ast, como grupu que sonaba, xeneró la envidia de ciertos personaxes que s’apuntaron a la moda d’echar mierda sobre aquello que nun diba per ónde ellos queríen. Resulta paradóxico qu’a una banda con componentes que tienen una amplia trayeutoria n’otres formaciones asturianes como La Tarrancha, Xera o Sambre, a los que-yos costó tanto  tiempu y esfuerciu, too pa contribuyir al puxu de la cultura asturiana –concretamente na faceta musical–, reciba estes critiques. Nun se pue ensuciar un nome asina como asina.

Munchos de los miembros siguieron y siguen nel mundu de la música n'otros proyeutos.

Dempués d’Oi! n'Ast dalgunos miembros de la banda montaron Sambre, grupu que tamién tuvo tocando lo suyo per tola xeografía asturiana, pero la banda desfíxose nel 2013. Otros componentes montaron grupos de punk como Dogs of War o Ruido Nuclear y Peke ye miembru anguaño d'una banda rockabilly, estilu del que siempre foi siguidor.

¿Cómo ven la escena Oi!-punk-rock asturiana anguaño?

Hai bandes, dalgunes con mucha calidá instrumental, y tenemos venceyos con elles, pero quiciabes falte dalgo de relevu xeneracional. Pensamos que la banda referente nel panorama de rock n’asturianu foi y va siguir siendo Dixebra, a bastante distancia de les demás bandes. Esperamos qu’haya futuru pal rock na nuesa llingua porque si dalgún día lo dexen van haber un vacíu considerable.

Contador Estadistiques