Nacho Vegas: "La plurinacionalidá del Estáu español ye una realidá"

Nacho Vegas (Xixón, 1974), que va tar acompañáu pol Coru Al Altu la Lleva, ye la novedá principal del Conciertu pola Oficialidá, que se celebra'l sábadu na plaza la Catedral d'Uviéu. El cantante recibió a Asturies.com enantes de la cita.

Nun ye la primer vegada que ta anunciáu nun Conciertu pola Oficialidá, pero sí la primera que va actuar. ¿Qué supón pa vusté debutar nesta cita?

Ye emocionante por tar arrodiaos de tantos collacios pa esixir un derechu tan allampáu como el de la oficialidá, pero tamién por ser nun llugar tan emblemáticu como la plaza de la Catedral. Creo qu'el poder popular pasa por reclamar l'usu d’estos espacios públicos.

¿Qué cantares va interpretar?

Va haber dellos cantares tradicionales fechos a la mio manera, temes propios n'asturianu y también dalguna adaptación de cantares orixinalmente grabaos en castellán y tornaos pala ocasión.

Va acompañáu del Coru Al Altu la Lleva, col que ta xirando últimamente.

Depués de collaborar col coru de Ladinamo y el Patio Maravillas de Madrid na grabación del mio álbum ‘Resituación’, cuando entamé a xirar surdió la idea de montar coros improvisaos en delles ciudaes: Barcelona, Granada, Zaragoza, Murcia…, hasta en México DF. En Xixón el coru nació alredor de la Caja de Músicos, un colectivu nel que dalgunos tamos metíos, y foi creciendo hasta convertirse en daqué serio. Agora trabayen con más músicos y yo puedo decir qu'a min me da la vida; los cantares son otros cuando tengo la suerte de cuntar con elles y ellos.

Yá lleva munchos años sensibilizáu cola llucha polos derechos llingüísticos n'Asturies. ¿Cómo ve la evolución del movimientu nestes dos décades?

Véola con dos partes d’ilusión y una de razonable escepticismu. Préstame abondo que veo una xeneración de xente mozo soberanista, pero también feminista, ecoloxista y cercana a otros movimientos sociales. Eso pa min ye daqué que d'antiguo echaba en falta en gran parte de l'izquierda asturiana, tanto la soberanista como la que nun lo yera. Asina qu’agora pesa más la ilusión.

¿Algamaráse la oficialidá?

En realidá la única entruga que hai que facer ye '¿hai voluntá política?'. Porque si la hai, la oficialidá ye la cosa más natural del mundu pal nuesu país.

¿Cómo ve la vitalidá del asturianu?

Nes ciudaes mal, pa qué engañanos. Pero eso ye normal cuando tán de siguío poniendo torgues a la normalización de la nuesa llingua. Hai xeneraciones que nun tuvieron la oportunidá de deprender asturianu na escuela. Pa iguar esta situación solo hai un camín, el de la oficialidá. Yo nun pienso tanto na vitalidá del asturianu anguaño, sinón nos neños que, una vegada que s'algame la oficialidá, van crecer falando la so llingua con naturalidá ya ensin eses babayaes na cabeza de que l’asturianu ye daqué 'paleto'. Y póngolo ente comines porque los que sostienen tal cosa son los únicos paletos qu'esisten.

¿Ye una llingua qu'uses davezu na to vida diaria?

La verdá ye qu’enantes usábala casi puramente con xente ‘militante’, por asina dicilo, pero neestos tiempos de whatsapps, asturgrams, etc., resulta qu’esi tipu de víes escrites dan pie a comunicate na llingua, anque seya n’amestao, con xente cola que igual nun avezabes a falar asturianu, y a la fin acabes faciéndolo más. Puede paecer una tontura, pero pa min nun lo ye.

¿Nota nel so entornu la castellanización?

Na xente de mio xeneración sí. Sicasí cada vegada atopo más xente mozo comprometío cola oficialidá.

Na so esperiencia, ¿cree que la xente de fuera d'Asturies conoz la situación del asturianu y la falta de derechos de los sos falantes al nun tener estatus d'oficialidá?

Con xente de la periferia aínda empatices con esti tema en concreto, pero la cosa tórnase más difícil cuando ye xente del interior. Sientes coses como 'cola situación d’emerxencia social que vivimos, l’oficialidá nun ye prioritaria'. Pero falamos de derechos. Tenemos que danos cuenta de qu’esta ye una llucha integral.

Nes sos últimes declaraciones amuesa la so simpatía y sofitu a Podemos, una fuercia que defende la plurinacionalidá del Estáu español y el derechu a decidir. ¿Ta d'alcuerdu con esos conceptos?

Creo nel derechu d’autodeterminación de los pueblos y la plurinacionalidá del Estáu español ye una realidá.

¿Cómo ve l'encaxe d'Asturies nesi diseñu d'Estáu plurinacional?

Ye una entruga difícil pa min. Creo que fai falta tomar conciencia de la realidá asturiana, de que la nuesa realidá nun ye la mesma que la que se vive en Madrid, nin en Catalunya tampoco. Too pasa por la enseñanza, y ehí l’oficialidá xuega un papel importante.

Nos últimos años paez que la producción musical n’asturianu ta allancada y salen pocos artistes qu’usen la nuestra llingua. ¿Sigue a dalgún/a creador/a qu’use la llingua asturiana?

Gustóme muncho el discu que Silvia Quesada espublizó l’añu pasáu, por exemplu. Alfredo González ye ún de los grandes autores n’asturianu. Herbamora tamién ye un grupu que me presta muncho.

¿Cómo-y paez que se podría potenciar una escena de músicos qu’usen l’asturianu como ferramienta?

¡Cola oficialidá!

La experiencia de Lucas XV foi mui bien recibida en tolos ámbitos. ¿Nun-y apetecería repetir nun proyeutu asemeyáu?

Xel Pereda ta trabayando nel nuevu discu de Lucas 15, nel que por problemes d’axenda nun voi tar más que como collaborador. Pero ye daqué que siempre tengo en mente, sí.

¿Ta trabayando en dalgo nuevo anguaño?

Sí, tengo dellos frentes abiertos, pero pel momentu toos nun estáu dafechu caóticu. Vamos tener que dir armonizando poquiñín a poquiñín…

Semeya obra de Víctor Huerga.