Miguel Morán (Xixón, 1968) lleva más de venti años trabayando nel diariu xixonés El Comercio. Amás, ye presidente del comité d’empresa, dende onde afronta anguaño’l conflictu llaboral más duru de la historia de la cabecera.

El conflictu llaboral n’El Comercio lleva yá unos meses enriba la mesa, pero ¿Cómo entamó too?
De sópitu. Sabíemos que la empresa taba tratando d'amenorgar plantiya, al traviés de prexubilaciones. En dalguna negociación de conveniu mientres 2010 comunicárennos que diben empezar a negociar colos mayores de 55 años. Cuando nos informaron que treslladaben la rotativa a Benavente nun lo podíemos creer.

Les primeres informaciones públiques falaben de 14 despíos, llueu xubieron a 29 ¿Pue dar más información sobre los despíos?
Siempres afectó a 29 trabayadores, 14 fixos de la empresa El Comercio y 15 d'empreses auxiliares creaes pol grupu Vocento, al que pertenez El Comercio. Dalgún d’estos trabayadores con más de doce años de trabayu neses empreses auxiliares. En rellación de los 14 d'El Comercio, la media d'años na empresa ye d'unos 25, el más veteranu con 40 años d'antigüedá y el más nuevu con 20. 

Ye llamativu qu’esto asoceda nuna empresa con 600.000 euros de beneficios en 2009…
Eso ye lo tarrecible, ¡¿Qué van facer cuando pierdan un euru?! 600.000 euros netos de beneficios nel peor añu de la hestoria de la prensa con una cayida publicitaria de más del 75%. Convién recordar qu'esta empresa lleva una media de beneficios nos últimos cinco años de 2 millones d'euros netos y prevé, nun escenariu tan negativu como l'actual, siguir ganáu esa cantidá de 600.000 euros en 2011.

Con esta decisión lo que se pretende ye aprovechar la crisis pa llimpiar el periódicu de convenios antiguos. Porque nun escaezamos que'l Grupu Multimedia El Comercio sigue contratando; anguaño lu formen más de 160 persones de les qu'unes 90 son d'El Comercio. La tendencia ye contratar al traviés d'empreses d'esi grupu, a precios de saldu y dir esaniciando progresivamente los empleos d'El Comercio, más caros. En 2011, esi Grupu va crecer penrima de les 170 persones y El Comercio, nel más optimista de los escenarios, baxará de los 70 trabayadores. 

¿Cómo ta siendo la negociación ente’l Comité d’Empresa y la dirección? ¿Hai posibilidaes d’alternativa a los despíos?
Bien difícil. La empresa tien delles llínees que nun va trespasar. La decisión de treslladar la rotativa ye innegociable, igual que'l númberu de trabayadores a los qu'afecta l'ERE. Sobre los puestos alternativos, el comité d'empresa y los afectaos consideramos que son puru fumu porque suponen treslladase fuera d’Asturies, ensin garantía de permanencia y cobrando menos de la metá de lo que ganen agora .
 
El pasáu 21 d’avientu’l Principáu convirtióse tamién n’actor del conflictu ¿Qué papel ta xugando?
De mediadores. Ellos son los encargaos d'almitir o refugar esti ERE y tán escuchando a les dos partes, traten d'atopar dalgún puntu d'alcuentru.

Nun comunicáu afirmaben que la especulación urbanística ye otra de les pates d’esta cuestión…
El solar onde s’asitia anguaño'l periódicu multiplicó por seis el so valor dende 1999.  Según consta nos socesivos PXOU de Xixón hasta'l postreru que'l Conceyu va tratar de sacar alantre enantes de mayu – pola mor de les elecciones-. El suelu ye residencial y déxa-yos construyir hasta doce plantes y un parking. Amás la zona, tres l'inminente soterramientu de les víes, conviértese casi en primer llínea de playa. Ye más que probable que  primero qu'acabe l'añu o, como muncho, en 2012 nun teamos nesos locales.

La otra son les pérdides económiques d’ABC ¿Cómo s’alcuentren les cuentes d’esti diariu español?
ABC lleva’l récord de pérdides nos dos últimos años; casi 50 millones d'euros. Pero a Vocento namás que-y esmolez tener una cabecera estatal. Los sos periódicos llocales, especialmente los más pequeños, somos los que ponemos el carbón pal alloriáu viaxe de la so locomotora madrilana.

¿Cree qu’ún conflictu como'l que ta pasando n’El Comercio pue espardise a otres cabeceres del grupu Vocento?
Non sólo lo creo sinón que yá ta asocediendo. Pasó en Las Provincias de Valencia, en Colpisa (axencia que pertenez al Grupu), n’El Diario Montañés de Santander, en La Verdad de Murcia. Amás, en toos l'amenorgamientu de plantiyes al traviés de prexubilaciones y baxes incentivaes forma parte de la política de les empreses.

A la fin, paez que la concentración mediática nun trái tantes ventaxes…
Nel nuesu casu nenguna. Ye bien difícil pensar que lo que funciona en La Rioxa, nel Sur de Málaga y en La Verdad de Murcia, por exemplu, va funcionar exactamente igual n'El Comercio. La tendencia ye escaecenos de lo llocal pa dar prioridá a lo que nos manden en común par tolos periódicos dende Madrid. Ye una realidá que, cola irrupción d'Internet, la difusión de los periódicos cayó, pero nel nuesu casu cayó muncho más por abandonar a los nuesos vecinos, que son los que nos merquen. La xente de Xixón quier saber lo que pasa nel so barriu, pa noticies estatales yá tien otros medios.

En cuantes a les movilizaciones y l’apoyu de la ciudadanía xixonesa ¿Qué tal tán resultando?
Increíble. Llevamos recoyíes 12.000 firmes y tenemos un grupu en Facebook con mil amigos (‘Non a los despidos n'El Comerciu’). La respuesta ta siendo estraordinaria.

¿Preven más movilizaciones?
De xuru. Nun vamos dexar de movilizanos, inclusive cuando se resuelva esta situación porque equí conflúin dos coses: la primera, los despíos de 29 trabayadores, que nesti momentu ye lo que nos esmolez; y segundu, la deslocalización de la planta d'impresión a Benavente, d'una empresa que ye rentable y abandona Xixón ensin esmolece-y los xixoneses y tres beneficiase y seguir beneficiándose de la publicidá institucional.

L’Ayuntamientu de Xixón tamién vos dio apoyu…
Y la Xunta Xeneral del Principáu. Los primeros nun plenu municipal y los segundos na Xunta de Portavoces

Y los demás medios de comunicación editaos n’Asturies ¿Tán reaccionando ante’l conflictu?
Sacantes RNE y RTVE, de los medios tradicionales, naide fixo ecu. Ye daqué colo que yá cuntábemos; la mordaza informativa funcionó a la perfección. Menos mal qu'Internet yá ye un mediu (boou, daqué más qu'un mediu) tan poderosu como los tradicionales. 

La precariedá fai presencia nesti conflictu llaboral ¿Espárdese tamién a la situación de los demás trabayadores ?L’oficiu de periodista ye ún de los más precarios del nuestru tiempu...
Ye lo que comentaba enantes. Esto respuende namás a una política empresarial que ta enllenando los medios d'autónomos, becarios y contratos bsoria. Nes redacciones de los periódicos va tiempu que nun hai referentes, periodistes de calidá qu'exercíen el so maxisteriu. Pa copiar y pegar, facer promociones de Vocento y redactar comunicaos, vale cualesquier. 

Les cifres de periodistes despidíos nel Estáu español nos últimos 2 años xuben a miles ¿Por qué que ta pasando esto?
La escusa de la crisis ta permitiendo’l vieyu suañu de los empresarios del sector. Llimpiar les plantiyes de xente cafiante, pol so sueldu y pola so capacidá d'alzar la voz contra les aberraciones diaries de la dirección.  

P’acabar, con tou esti tema de Cascos paez qu’El Comercio ta convirtiéndose nel altavoz del ex ministru ¿Por qué cree que se dio esti cambiu d’orientación editorial?
Nun me sorprende; forma parte de la política errática d'una empresa que trata d'abrazase a cualesquier que pueda ocupar el poder. Nun s'estrañe si dientro d'unos meses faigan la campaña a otru partíu o personaxe de signu contrariu si tien dalguna posibilidá d'algamar el poder.