Miguel Fernandi ‘Burilo’: “Echo en falta xente mozo nos conciertos de rock”

Skama la Rede tien nel mercáu’l so cuartu discu, ‘Avante’, nel que suma’l trombón a los instrumentos habituales. El so cantante Miguel Fernandi ‘Burilo’ (Lluanco, 1979) prepara la voz pa una primera quincena de setiembre cargada de conciertos.

El primer día de venta nel Rebolleres Rock casi s’escosen les 100 copies que taben nel puestín. ¿Continúa la bona recepeción de ‘Avante’ ente’l públicu?

Namás puedo falar de lo que tamos distribuyendo nós como grupu, porque nun tengo datos firmes de la discográfica. Pa ser veranu, onde casique ye imposible vender nada, tenemos vendíos cerca de 300 CDs. Fundamentalmente vendemos muncho nos conciertos y agora, que volvemos a xubir a los escenarios, esperamos da-y un emburrionín curiosu.

Trátase del cuartu trabayu de la banda nos sos diez años de trayeutoria. ¿Ye un discu más maduru?

Son tópicos lo de la madurez y estes coses. Yo creo, y tamién ye un tópicu, que ye'l meyor discu nuestru. Ye'l que más tiempu echemos componiendo, ensayando, grabando y mezclando. Dímos-y munches vueltes a les melodíes y a les lletres. Como anécdota, cuando llega'l discu de la fábrica sueles tar un pocu fartucu d'él de tantes vueltes que-y disti. 'Avante', que nos llegó la última selmana de xunetu, sigue tando nel reproductor de CD del mio coche davezu.

Nél destaca la incorporación del trombón como instrumentu de la mano de Fabián Díez Zapico. ¿Llega pa quedase?

Eso espero. A Fabián engañémoslu n'agostu del añu pasáu pa dir a tocar al Festival d'An Oriant. A Fer, el trompeta, saliera-y un trabayu dos selmanes primero de marchar y yera-y imposible actuar. Fabián vino un día a ensayar y dio trés conciertos. La combinación de trompeta y trombón paeznos mui guapa y decidimos que quedara. Ye un más de Skama La Rede anque sabemos que tien otros compromisos con otros grupos y siempre vamos intentar que lo pueda compaxinar too.

El que nun marcha ye'l periodista David Artime.

Nin con agua ferviendo. David, 'El Roxu' pa nós, ye casique un miembru más del grupu. Diba ser guitarrista de la qu'empecemos pero pamidea que s'asusto y nunca vino a ensayar. Ye mui importante contar con xente qu'escriba lletres y él da mui bien cola filosofía del grupu. A mi cuéstame bastante cuntar munches histories de siguío y, nesi sen, l'ayuda de David viénnos mui bien. Amás, pa esti discu otra xente del grupu tamién s'animó a escribir como nel casu de Fonsu'l baxista. Siempre presta que los cantares tengan variedá de temátiques y de puntos de vista.

¿Qué otres novedaes trai ‘Avante’?

Creo que podemos tar falando del primer discu onde los cantares, ensin ser un discu conceptual, si tenien cierta relación. Otres vez díbemos faciendo canciones sueltes, a lo que salieren y de lo que falaren. Pa 'Avante' pensemos un poquiñín les temátiques.

Amás, creo que ye'l discu más 'punki' de los cuatro que saquemos pero mui 'bailongo' cola combinación de trompeta, trombón y gaita.

¿Por qué decidieron grabar otra vuelta ‘Coses de la edá?

Teníemos una delda con esi cantar. Fuera'l primeru que compunxéramos y nun entró nel primer discu, 'La nuesa hestoria', por nun repitir munchos de la maqueta. Va tiempu que-y diéremos una vuelta y que tamos tocándolo en directo. Yera'l momentu de volver a grabalu y que lo conociera aquella xente que nun sigue al grupu desque empecemos.

Tamién destaca la versión de la ‘La casa gris’, de Llan de Cubel, que ye habitual nos sos conciertos. ¿Ye un cantar especial pal grupu?

Equí voi conta-y una contradicción. Nunca fuimos mui amigos de facer versiones pero si tuviemos unes cuantes nel repertoriu nestos casique once años. 'Rabia' de Skalariak, 'Tumba 37' de La Polla, 'Da-yos caña' de Dixebra o 'Chacho' de Los Berrones, por exemplu. Con Llan de Cubel compartimos local d'ensayu al principiu de Skama La Rede y el cantar préstanos muncho hasta'l puntu de decidinos a grabalu. Ye imprescindible nos conciertos.

Nun ye l’únicu tema que grabaron recién.

Falando de versiones, cuando tocamos en casa siempre incluyimos nel repertoriu un amiestu mui macarra de 'La Playa de Rebolleres' y 'Soi de Verdicio'. Pablo Quiroga propúnxonos grabala pal discu de 'Canciones de Chigre' y nun tuviemos problema. De dalguna manera prestábanos que quedara puesta nun discu pero nun la veíemos pa incluyíla nún nuestru. Asina que planchao.

Y d'otru llau, unos amigos en común que taben preparando un programa pa TPA pidiérennos permisu pa usar el cantar 'Asturies borracha' como sintonía. Al final, decidimos grabar otra vez les partes instrumentales pa qu'encaxeren meyor y agora ye'l cantar col qu'abren y cierren 'Al platu vendrás'.

Esi programa de TPA ye bien criticáu dende dellos sectores pol usu diglósicu que fai del idioma. ¿Qué opina sobre l’asuntu?

Son temes complicaos. Yo creo que l'amestáu nun ye un mal usu llingüísticu pa determinaos programes sobre temátiques como puede ser l'humor. Seguramente nun taríemos con esti debate si l'asturianu fuera la llingua vehicular, polo menos en parte, d'otros formatos más serios. Lo que si me gustaría, y falo en nome propiu, ye que la retulación de los programes tuviera un poco de cuidao col asturianu. Hai veces que manca a la vista.

Llega un setiembre cargáu de conciertos pa la banda.

Tuviemos un veranín tranquilu, sobre too, por temes personales de xente del grupu y agora volvemos a la carga. La primer fin de selmana de setiembre tenemos doblete, yá que vamos tar nes fiestes de La Camocha (vienres 5) y nos Alcuentros Alternativos de Bimenes (sábadu 6). El martes 16 tócanos visitar Villaviciosa pa les fiestes d'El Portal. La verdá ye que teníemos ganes de dar unos conciertos conciertos per Asturies de siguío porque la primer parte del añu tuviemos bastante fuera del país tocando.

Skama la Rede ye una banda que garró un importante nome fuera de les nueses llendes, como amuesen les munches actuaciones que dan n’otros territorios. Sicasí, al igual que toles bandes de rock qu’empleguen l’asturianu, nun cuenten con presencia nos grandes festivales del Estáu. ¿A qué cree que se debe?

Ye complicao. Hasta va unos años yera raro ver bandes en catalán o n'euskera, y namás Obrint Pas y Betagarri, salvo otres escepciones, consiguieron tener cierta regularidá. Les bandes que canten en gallegu tampoco asomen muncho. Creo que ye cuestión de que los responsables dean un pasu alantre nesi sen. Ente'l públicu nun creo qu'haiga problemes, tolo contrario.

Otra manera, ¿tamos nuna época d’escasez de bandes n’asturianu anguaño na escena?

Creo qu'hai escasez de bandes moces en xeneral. Nun se si hai crisis del rock pero munches veces echo de menos a xente mozo (18-20 años) nos conciertos nos que toco o a los que voi. Si que ye verdá qu'hai tiempu que nun sal una banda nueva de rock n'asturianu y ye dalgo que me preocupa. A ver si los rapazos estos de 'Ochobre' que toquen versiones de 'Avientu' se consoliden y faen coses propies tamién.

La xente interesao en mercar el discu, ¿ónde pue atopar ‘Avante’?

Nos puntos de venta avezaos de Discos L'Aguañaz, que tien un bona rede de chigres, llibreríes y tiendes de música, y nos nuestros conciertos.

Amás de presentar el trabayu nuevu sobre los escenarios nos meses próximos, ¿tienen dalgún otru proyeutu en mente a curtiu o mediu plazu?

La verdá que nada n'especial. L'oxetivu ye siguir ensayando y intentar dir a sitios nuevos ensin olvidanos de los de siempre. Si que nos prestaba tocar daqué más fuera del Estáu español porque les veces que lo fiximos –Portugal, Bretaña, Alemaña y Italia– quedemos mui contentos, pero nun ye fácil.

Por último, y yá nel so terrén profesional, ¿pa cuándo podremos disfrutar de partíos comentaos n’asturianu en RPA o TPA?

Si soi sinceru, nun lo sé. La casa quedó mui contenta col Compostela-Oviedo que fiximos en RPA y d'aquella la intención ye que nun quedara en dalgo anecdótico. Habrá qu'esperar.

Semeya obra d'Ana Corredera.