Menéndez Blanco: “Podemos trazar les rutes d'avance del exércitu romanu y cuantificar la so presencia"

Andrés Menéndez Blanco (Uvieo, 1985) ye miembru del equipu del proyeutu Romanarmy.eu, que nel añu últimu llocalizó más de venti asentamientos militares temporales romanos n'Asturies, Llión, Galicia, Portugal y Cantabria. L’arqueólogu faló con Asturies.com sobre estos descubrimientos y la téunica emplegada pa dar con ellos.

¿Qué ye'l Romanarmy.eu?

Romanarmy.eu ye un proyectu independiente que formamos hai menos d'un añu siete persones d'Asturies, Galicia y Portugal. Trátase d'un grupu multidisciplinar compuestu por arqueólogos dedicaos al estudiu de campos diferentes de la disciplina (José Costa, Rebeca Blanco, João Fonte, David González, Valentín Álvarez y yo) y un periodista especializáu na divulgación y socialización del patrimoniu (Manuel Gago). Hasta'l momentu ye una iniciativa autofinanciada polos propios integrantes que pretende unir fuercies p'avanzar na investigación y divulgación d'esi procesu de conquista y, más en xeneral, la presencia militar romana nel noroeste.

¿Qué supón pa l'arqueoloxía los descubrimientos del so grupu de trabayu?

Hasta agora'l nuesu trabayu más intensu centróse na localización y estudiu de restos materiales del exércitu romanu, concretamente los campamentos que facíen cuando avanzaben pel territoriu. Hai qu'aclarar que nun somos nin los únicos nin los primeros que nos dedicamos a esto y que se conocen asentamientos militares romanos en Galicia, Llión o pel norte de Castiella dende hai décades. De toes formes, esos afayos pioneros yeren pieces sueltes d'un puzzle qu'amás, por dicilo d'alguna manera, aparecieran cuasimente por casualidá.

El primer saltu cualitativu y cuantitativu nel nuesu ámbitu xeográficu diose en Cantabria nos años 90, cuando l'arqueólogu Eduardo Peralta descubre y entama la investigación de varios campamentos de marcha romanos. Na década siguiente alcuéntrase'l campamentu d'El Picu Currieḷḷos n'Asturies, que foi estudiáu por un equipu dirixíu por Jorge Camino dende'l 2001. Nel 2007 atopamos nós el campamentu de Moyapán nel conceyu d'Ayande y a partir d'ehí nun pararon d'aparecer asentamientos nuevos per tol territoriu. Por midir la importancia de too esto con númberos, solo n'Asturies pasamos de desconocer completamente les evidencies d'esa presencia del exércitu a tener cuasi venti campamentos documentaos. Dicho d'otra manera, hai quince años había autores que cuestionaben la entrada del exércitu pal norte de Payares, agora sabemos que tuvieron y podemos encomenzar a trazar les sos rutes d'avance y cuantificar esa presencia, que nun foi nada pequeña.

¿Cuáles son los afayos concretos del grupu?

Llevamos documentaos yá más de venti asentamientos militares temporales n'Asturies, Llión, Galicia, Portugal y Cantabria. Estos campamentos facíalos l'exércitu pa pernoctar durante los sos avances. Esto quier dicir que depués de cada xornada d'avance llevantaben estos recintos pa guardase ún o varios díes hasta que retomaran la marcha. Al ser estructures pa una utilización temporal dexen unos restos mui probes, les más de les veces nun se ve más qu'un sucu qu'arrodiaba'l recintu. Son mui interesantes les series de campamentos a lo llargo de dalgunes rutes históriques. Por exemplu topamos cuatro na sierra que separa les conques hidrográfiques de los ríos Navia y Eo, trés d'ellos del mesmu tamañu y separaos por una xornada d'avance a pie. Esto suxer que pudieran tar fechos pol mesmu continxente y de manera consecutiva, durante'l so avance pela sierra.

¿Les téuniques utilizaes foron pioneres nel estudiu de les campañes astur-cántabres?

En verdá, menos el LiDAR, les demás técniques nun son nueves. Lo que nós fiximos foi desenvolver un métodu de busca qu'axuntara toles técniques que sabíemos que funcionaben y de les que podíemos disponer dientro de les nueses limitaciones económiques. Por exemplu, la observación de les colecciones de fotografía aérea que pueden consultase de manera llibre n'Internet fueron claves, pero tamién realizamos análisis con Sistemas d'Información Xeográfica y recurrimos a otres fontes como la toponimia o la tradición oral. Per otru llau, pa optimizar el trabayu, valoramos cuáles yeren les zones con más potencial arqueolóxicu, o dicho d'otra manera, ónde había más posibilidaes d'alcontrar xacimientos nuevos.

El recursu últimu qu'incluímos nesta metodoloxía ye'l procesáu de los datos LiDAR puestos a disposición llibre pol Instituto Geográfico Nacional a finales del 2015. A partir d'estos datos creamos modelos tridimensionales del terrenu con alta definición que valen pa reconocer relieves pequeños, sobre too esos sucos que comenté enantes qu'arrodiaben los campamentos y qu'a veces nun lleguen a vese na foto aérea. Gracies a esta técnica sumamos cinco campamentos nuevos esti iviernu pasáu, y toos ellos ensin salir de casa mientres esos xacimientos taben tapaos pola ñeve...

¿Qué ye lo más singular que nos presenten estos campamentos afayaos?

En cuantes a les estructures, lo más significativo ye la so forma cuando se ven en planta. Los cánones siguíos pol exércitu romanu recomienden facer campamentos de planta rectangular con esquines arredondiaes, cola forma d'una carta de xuegu. Pero claro, la topografía munches veces nun dexa trazar estes formes y tienen qu'adaptase a les formes de los montes. Por eso topamos bien d'ellos con formes irregulares, pero que de toes formes siempre intenten tirar lliñes rectes y esquines arredondiaes. Otru elementu mui característicu son los accesos con ‘clavícula’, un refuerzu que poníen nes entraes a los recintos. Y por supuesto'l sitiu; ye mui importante'l llevantamientu de los campamentos en puntos estratéxicos, fáciles de defender, y qu'a la vez tean bien comunicaos.

¿La llinia del proyeutu ye siguir centrada na busca de campamentos o abrir otres llinies d'investigación?

Nós estudiamos un conflictu onde actúen dos partes, romanos y indíxenes, y lo primero que necesitamos ye localizar los restos arqueolóxicos d'esi momentu. Por eso ún de los primeros pasos ta siendo la busca de campamentos. Pero la misión última de l'arqueoloxía nun ye buscar nin describir les evidencies materiales, sinón entender les sociedaes y los procesos históricos qu'hai detrás d'elles. Esto significa que les lliñes d'investigación van ser toles que faigan falta pa tener respuestes satisfactories a toles preguntes que se puedan formular.

¿Hai planes d'escavación d'estos campamentos o nun tendríen un interés destacáu pa la so investigación más alla de la so llocalización?

Una intervención más profunda nos campamentos ye esencial. Por exemplu, una prospección más intensiva y l'apertura de sondeos arqueolóxicos ye la única manera de poder fechar estos recintos con cierta precisión. Pero estos trabayos conlleven unos gastos económicos pa los que nós nun tenemos financiación. Desque cambie esta situación esi será'l pasu siguiente a dar.

Una vegada conocida les rutes, ¿sería posible dar con llugares de batalla destacaos que citen fontes clásiques?

Les fontes clásiques son mui probes y ambigües, representen la visión del ganador y dalgunes tán escrites varios sieglos depués de les guerres. Dan una información que ye difícil d'interpretar y, pa encima, ye poco fiable. Por ello ye mui importante que l'arqueoloxía tenga un discursu lo más independiente posible y que nun prepare la so axenda a partir d'esos testos. Pa entendelo dientro d'un contestu más cercanu, ye como si intenten reconstruir dientro de 2000 años la guerra d'Irak a partir d'un discursu de George Bush y los arqueólogos d'esi tiempu gasten les fuercies en buscar los almacenes d'aquelles armes de destrucción masiva qu'él dicía... Los testos clásicos tienen qu'analizase como discursos políticos romanos. Per otru llau, anque esos episodios pudieron ser reales y diéramos colos sos restos arqueolóxicos sería mui difícil saber que tamos delantre de la mesma cosa.

¿Faen los descubrimientos d'esti proyeutu revisar la historia oficial de les guerres astur-cántabres?

La verdá ye que yo nun m'atrevería a falar d'una historia oficial de les guerres astur-cántabres. Antes de tener evidencies arqueolóxiques había interpretaciones variaes de cómo pudo ser esi conflictu, casi tantes como autores que trabayaron sobre'l tema. Como dicía enantes, les fontes escrites, que yeren el recursu principal pa estudiar les guerres, son mui probes y ambigües. La situación xeográfica de dalgunos episodios que describen puede variar en cientos de quilómetros asegún les interpretaciones d'unos o otros autores. Tamién tán dándose pasos mui importantes n'arqueoloxía castreña que yá entamen a explicar les sociedaes indíxenes con cierta profundidá. Esto permítenos formular hipótesis más complexes sobre les formes de resistencia que pudieran ofrecer a la invasión romana.

N'Asturies hebo siempre la dispusta ente los romanistes y indixenistes, con visiones estremaes de cómo foi la conquista romana (pacífica o cruenta) y la so causa (les mines, propaganda, pacificar territorios...). ¿Podemos dicir que toos tienen parte de razón?

Son debates que nacieron cuando nun había una base arqueolóxica consistente tovía. Y nun ye qu'agora téngamos tola información necesaria pa dar una respuesta unívoca y concluyente, pero sí tenemos más datos pa dar explicaciones más satisfactories. Ye claro que nun hai una causa sola y que la motivación principal ye qu'Augusto ta asentando un modelu d'Estáu nuevu, l'Imperiu, y necesita recursos y propaganda favorable en Roma. El desenvolvimientu de la conquista yá ye otra historia. Había diferencies importantes entre les sociedaes qu'habitaben el noroeste de la Península y la costa cantábrica, y eso implica formes de conflictu distintes. Por exemplu, documentáronse varios casos d'asedios de castros en Cantabria y el norte de Castiella mientres que n'Asturies o nel norte de Galicia nun hai nengún indiciu d'asediu o destrucción intencionada y violenta. Nun podemos afirmar tovía nada sobre cómo foi esa resistencia armada o si, directamente, la resistencia indíxena d'esta zona nun foi coles armes. Trátase d'un conflictu asimétricu onde un xigante militar ataca a unes comunidaes con una capacidá de reacción mínima y que, por tanto, la so respuesta nun puede ser igual que la que vemos nuna guerra entre dos partes iguales. En cualquier casu sí ye evidente a estes altures que la conquista romana d'entre los años 29 y 19 a.C. supón una ruptura radical pa les sociedaes locales. El noroeste enantes de Roma tien mui poco que ver colo qu'hai 100 años depués de la integración nel Imperiu.