Menéndez Peláez: “El pensamientu de Xovellanos sigue teniendo una gran actualidá”

Asturies celebra esti añu’l bicentenariu de la muerte de Gaspar Melchor de Xovellanos. Jesús Menéndez Peláez (Ḷḷaviu/Lavio, 1944) ye presidente de la Fundación Foro Jovellanos, que participa na comisión conmemorativa del bicentenariu.

¿Qué actividaes programaron pa conmemorar esti bicentenariu?
 
Son munches y de naturaleza distinta. En primer llugar, va haber un programa ampliu de publicaciones; yá foron presentaes una biografía billingüe español-inglés en collaboración cola Fundación Cristina Masaveu; tamién se presentó una seleición de los documentos de la Casa Natal de Xovellanos custodiaos nel Archivu de Mohías, documentación que se remonta al sieglu XV perinteresante pa conocer tolo relacionao cola familia de los Xove-Llanos. A lo llargo del añu diremos espublizando cuatro o cinco publicaciones nueves, ente elles un númberu monográficu de Cuadernos d’Investigación que va recoyer la puesta al día de les parceles distintes de Xovellanos nestos doscientos años: economía, política, xurisprudencia, lliteratura, música, llingua asturiana, etnografía, pedagoxía…
 
Llueu, tamién vamos entamar conferencies sobre dellos aspeutos del pensamientu de Xovellanos y a poner en marcha un programa pedagóxicu ampliu peles parroquies, colexos y institutos de l’Asturies más afastada: Ibias, Ozcos, Quirós, Ayande, Cangas del Narcea, El Campu o La Pola Ḷḷena.
 
Tamién ta la esposición ‘La lluz de Xovellanos’, qu’acueye’l Palaciu Revillaxixéu y el Muséu Casa Natal de Xovellanos, y que cuenta col retratu de Xovellanos que cuelga de les paredes del Museo del Prado y que ye obra de Goya.
 
Ye un percorríu pela vida y obra de Xovellanos, intentando la so contestualización. Tamién apaecen otros retratos de personaxes que rodearon la vida de Xovellanos. Una seición importante ye la qu’evoca tolo relacionao con Asturies. El catálogu que s’edita ye la meyor guía y va quedar como testimoniu escritu pa la posteridá.
 
¿Qué papel xugó Xovellanos na vida política del so tiempu pa ser recordáu d’esta forma 200 años depués de morrer?
 
Foi l’epicentru del sieglu XVIII español, cuando empieza a configurase l’Asturies y la España moderna. Ye una figura poliédrica. Tien munches cares y en toes elles foi un home mui destacáu: economía, política, pedagoxía, historia del arte, xurisprudencia, lliteratura…Nuna época de crisis –non solo económica, sinón de los valores– como la de nueso ye necesario recurrir al pasáu pa nun perder la memora histórica. Amás, Xovellanos diagnosticó cuáles yeren los problemes d’Asturias, que coinciden colos problemes de güei. El so pensamientu sigue teniendo una gran actualidá.
 
¿Qué supunxo pa l’Asturies de la época contar con una personalidá como la de Gaspar Melchor?
 
Xovellanos foi, ensin dulda, el referente asturianu más importante na corte madrilana. Anque por pocu tiempu, foi ministru de Gracia y Xusticia. Los sos múltiples escritos n’economía, derechu, pedagoxía o arte marcaron la evolución d’estes disciplines na posteridá.
 
¿Con que faceta de Xovellanos se quedaría?
 
Col so papel na economía, la pedagoxía y l’arte.
 
Tamién fue una gran defensor del asturianu.
 
Sí. Nesti aspeutu, dos foron los sos grandes proyectos: crear una academia de la llingua asturiana y ellaborar un diccionario. D’igual forma, yera un falante d’asturianu.
 
¿Cree que los asturianos conocen el llabor de Xovellanos?
 
En Xixón hai abondes instituciones culturales que lleven el so nome, inclusive negocios familiares acuéyense al patronazgu de Xovellanos. Sábese que foi un home importante, ensin especificar la profesión; en dalguna ocasión confundióse a Xovellanos con un obispu; n’otres, con un pintor.
 
¿Cómo lu conoció vusté?
 
Na Universidá d’Uviéu. Ehí tuve como maestru al Prof. Caso González, el gran xovellanista de tolos tiempos.
 
¿Qué foi lo que más-y impactó de Xovellanos?
 
Que foi un home de estáu ensin escaecer los problemes del so Xixón natal.
 
Vusté preside la Fundación Foro Jovellanos. ¿Cómo nació esta Fundación y con qué oxetivos?
 
Na xénesis ta una tertulia d’entusiastes xovellanistes que se reuníen nel añu 1995. Formaron una asociación y, de forma posterior, configuróse como fundación. El so oxetivu principal ye divulgar y investigar tolo relacionao cola vida y obra de Xovellanos, asina como’l so entornu, esto ye, la ilustración.
 
¿Cuáles son les actividaes que realiza’l Foro?
 
Dos son les actividades principales que realizamos. Una ye divulgar y investigar al traviés de conferencies, coloquios y publicaciones. Nesi aspeutu ye mui importante’l nuesu fondu editorial con mediu centenar de publicaciones. Dalgunes d’estes publicaciones son consideraes de gran impautu científicu n’instituciones nacionales y internacionales. Tamién tenemos un conveniu cola Universidá d’Uviéu que nos permite programar un cursu d’estensión universitaria con enseñanza reglada. Dende’l puntu de vista divulgativu, programamos un proyeutu ampliu de conferencies que van ser impartíes por especialistes nes cares distintes del poliedru que ye Xovellanos: economía, xurisprudencia, etnografía, lliteratura, política…Too ello va facer d’esti añu 2011 un añu xovellanista auténticu.