Menéndez: “Los diez años paecíanos una bona ocasión pa reflexar el nuesu trabayu nesti tiempu”

La Banda Gaites Camín de Fierro celebra diez años de vida cola espublización d’un discu que presentó recién nel Teatru Filarmónica. Balbino Menéndez Suárez (Sabadía, 1977) ye’l direutor de la banda xunto con Arsenio Ruiz González.

‘Diez años nel camín’ dan pa muncho…

Supón, en primer llugar, algamar un llogru. Nun ye  fácil pa una banda de gaites en xeneral, y pa nós en particular, que tamos afincaos en conceyos despoblaos y avieyaos – Proaza, Santu Adrianu y Teberga–, alcanzar los diez años. Pero, sobre manera, significa recuerdos, recuerdos de los momentos difíciles; de los ex componentes que, por un motivu o otru, nun pudieron llegar hasta equí; de les persones que nos ayudaron nel camín; de los ésitos; y, en definitiva, de les motivaciones coles que comenzamos el nuesu caleyar.

Tamién ye’l nome del discu qu’espublicen pa celebrar el so décimu aniversariu.

La fecha paecíanos una bona ocasión pa dexar reflexao nun formatu perenne’l nuesu trabayu nestos diez años. Por eso, la metá de los cortes del discu tán interpretaos pola formación de banda de gaites, esto ye, gaites, caxes, timbales y bombu. Nestes pieces pretendemos reflexar el nuesu trabayu diariu en pasucais, romeríes, bodes y festivales; y nelles aspiramos a esprimir al máximo les capacidaes espresives d’una banda de gaites. Otra manera, siempre ye un placer tar acompañaos de bonos músicos y convinimos que’l momentu merecíalo. D’esta manera, la otra metá del discu ta formada  bien por  temes ayenos a la gaita –tango, BSO– y importaos al nuesu estilu, bien por pieces de gaita esportados a otros estilos –rumba–, toos ellos col refuerzu d’otros instrumentos como guitarra, telcaos, batería, seición de metales, etc., y con collaboraciones d’artistes asturianos.

La so presentación tuvo llugar el 30 de setiembre pasáu nel Filarmónica con un conciertu especial. ¿Quedaron contentos del resultáu final d’esta actuación?

El resultáu d’un concierto valóralo siempre’l públicu, y a xulgar pol númberu –aproximadamente aforu completáu– y polos aplausos, l’ésitu foi importante. Creemos que l’espectáculu qu’ufrimos, nel que combinamos música, lluz, baille y proyeiciones, sorprendió a propios y estraños, y consiguió coneutar tanto colos aficionaos a la gaita como colos aficionaos a la música en xeneral. El resultáu foi un conciertu d’una hora y media de duración, dinámicu y entreteníu, que fixo que’l públicu en más d’una ocasión se llevantara de les sos butaques y diera palmes acompañando a la banda.

Pa esta cita contaron con delles collaboraciones especiales.

Tanto pal discu como pa la presentación d’ésti en públicu contamos cola collaboración d’artistes asturianos que ponen la guinda al nuesu trabayu y qu’amás dan prestixu al resultáu. Foron Xuan Nel Expósito, le Pandereteres de Fitoria y Anabel Santiago.

¿Cómo foron los anicios de la Banda Gaites Camín de Fierro?

Duros, como supongo los de cualquier banda de gaites. Duros a tolos niveles, tanto a nivel personal como musical y, por supuesto, a nivel económicu. Pa que se faiga una idea: una caxa cuesta alredor de 500 euros; una gaita, 1000; un traxe de paisanu, 600; y ún de muyer, 800. A partir d’ehí son necesaries actuaciones qu’amorticen les inversiones iniciales y que permitan adquisiciones futures. Por otra parte, los resultaos musicales nun lleguen d’un día pa otru; ye necesario munchu trabayu y dedicación, y, cuando se parte de cero, fai falta una evolución pa la que nun hai atayos. A too esto hai que sumar qu’esto ta sustentao nel asociacionismu y toles connotaciones qu’esto conlleva alredor de les rellaciones dientro d’un grupu humanu.

¿Por qué esti nome?

Cola denominación ‘Camín de Fierro’ intentamos destacar ún de los tantos puntos en común de los trés conceyos. Ye equí onde apaez tola historia minero-siderúrxica de la zona: nel valle había esplotaciones mineres d’onde salía’l mineral que yera unviáu por ferrocarril hacia la cuenca del Nalón, salida natural de la zona, en Trubia. Esti tren mineru abrió’l camín ente les montañes de los conceyos, anguaño tresformáu nuna vía cicloturista conocida a tolos niveles col nome de ‘Senda l’Osu’. Esti ye l’orixe del nuesu nome: el camín de fierru que comunicaba los nuesos pueblos.

Dende los sos entamos la banda cuidó de manera especial la indumentaria de los sos miebros.

La indumentaria ta diseñada basándose nel traxe tradicional asturianu de la zona centro nos sieglos XVIII y XIX –época preindustrial–. Trátase d’un traxe de semi-gala, sobriu y elegante, nel que predomina’l negru, dando uniformidá al conxunto, y con notes discretes de color en verde y coloráu. Negru, verde y coloráu, los colores del carbón, el monte y el fierru.

¿Qué repertoriu utilicen?

La mayor parte del repertoriu ta formáu por temes tradicionales asturianos, gallegos, bretones o escoceses. Tamién hai pieces compuestes por autores asturianos, estrayíes de discos de grupos de música folk como Los Ciquitrinos, N´Arba o La Bandina, ente otros. 

¿Cuántos miembros componen anguaño la banda?

Principiamos nel añu 2002 con 12 componentes y agora somos 20. Sicasí, casi siempre nos movimos nunes 18 personas, coles xubes y baxaes habituales nuna banda de gaites.

¿Trabayen colos neños de los conceyos de Proaza, Santu Adrianu y Teberga?

La mayor parte de los músicos procede de la Escuela de Música Tradicional de los Valles del Osu, perteneciente a la Mancomunidá de Municipios de Proaza, Quirós, Santu Adrianu y Teberga. Nella los alumnos se formen tanto nes disciplines instrumentales como en Llinguaxe Musical y Folclore. Esta escuela ye la cantera qu’asegura una fonte de nuevos músicos que, poco a poco, van entrando a formar parte de la banda, dando continuidá al proyeutu. Tamién nestos años últimos hubo incorporaciones de conceyos vecinos como Grau, La Ribera o Uviéu.

Nestos diez años, ¿cuál foi’l momentu más especial que vivió Camín de Fierro?

Foi un momentu especial el primer festival con cierto renome y prestixu al que fuimos, nel añu 2009: el Festival de Saint Loup, en Guingamp/Gwengamp (Breizh, Francia). Tamién foi especial collaborar con Carlos Núñez nel Festival d’Artes y Tradiciones Populares de Confolens (Francia).

Nes salides fuera d’Asturies de la banda, ¿qué ye lo que más llama l’atención al públicu?

Lo primero entra pola vista y, nesi aspeutu la nuesa indumentaria xuega un papel mui importante. Evidentemente, cuanto más lloñe tamos d’Asturies, más sorprende. Lo siguiente ye’l nuesu instrumentu y la nuesa música, yá que, si bien la gaita nun ye estraña nos países nos que nos movemos, la música asturiana tien personalidá propia y ye apreciada allá onde vamos.

¿Hai dalgún sitiu onde vos prestaría tocar?

Nun entraríen equí los sitios onde nos prestaría tocar. Hai sitios n’Asturies onde nun tocamos y onde nos prestaría tocar, asina que, por estensión, imaxine cuántos sitios quedaríen onde desearíamos tocar n’España, n’Europa y nel mundu.

¿Qué planes tienen agora en mente?

De momento descansar y reponenos física y económicamente. Pal futuro vendrán de xuru proyeutos y ilusiones nueves; festivales nuevos; repertoriu nuevu; músicos nuevos: viaxes nuevos…