Lombardía: “Prestaríame reactivar FonoAstur pa dalgún proyeutu guapu”

|
Lombardía: “Prestaríame reactivar FonoAstur pa dalgún proyeutu guapu”

Lisardo Lombardía (Llaviana, 1955) recibió'l llunes, representáu pola so fía Ana, la medaya de plata d’Asturies. Esti gallardón ye tamién un reconocimientu pa “toa una xeneración que lluchó y llucha por asitiar la cultura tradicional asturiana nun llugar d’altor”.

Esti Día d’Asturies ye enforma especial pa vusté.

Claro, nun contaba con ello pa nada. Agradezo esti reconocimientu no mas fondo. Ye una gran satisfacción comprobar que siguen el to trabayu y que lu valoren.

¿Cómo s’enteró de la decisión del Conseyu de Gobiernu d’otorga-y la medaya de plata d’Asturies?

Llamóme per teléfonu’l conseyeru nel mesmu momentu que salía pa Cuba nun viaxe programáu va tiempu. La mio fía Ana sedrá la encargada de recoyela.

¿Ye tamién un premiu a la cultura asturiana?

Les razones qu’estima el Principáu pa concedémela nun seríen posibles si nun hubiera toa una xeneracion que lluchó y llucha por asitiar la cultura tradicional asturiana nun llugar d’altor, de cultura viva con ambición universal.

¿Cuándo empezó a interesase pola cultura de nueso?

Siendo bien mozu nel mio conceyu. La so vivencia yera natural, pero yo entamo a implicame nel movimientu cultural asturianista nel 1975.

Llegó un momentu nel que dexó a un llau la so profesión de médicu pa entregase dafechu a la investigación etnográfica. ¿Qué lu llevo a ello?

La pasión pola nuesa cultura; la convicción de que les tradiciones d'Asturies merecíen abondo mas y qu’habia que ponese a trabayar nel so espardimientu.

¿Qué supunxo la formación de la Fundación Belenos naquellos primeros años de la década de los 80?

Belenos, primero como Conceyu d'Estudios Etnograficos y llueu como fundación, ye fundamental pa entender una forma d’axitación cultural seria y al empar llúdica y ensin complexos. Pero tengo que dicir que yo soi mamás ún de los dos miembros fundadores. En Belenos cooncidimos un piñu de xente colos mesmos enfotos y convicciones sobre la nuesa cultura: normalidá nel usu del asturianu, que la etnografía d’Asturies tenía que dase a conocer acordies al so valir y que’l nuesu pais tenía tola llexitimidá pa reivindicar la so pertenencia al mundu celta contemporaneu, que nun ye otra cosa qu'un apueste pol esporpolle y la modernidá de la nuesa cultura identitaria.

El primeru en nomase de Belenos foi Ástur Paredes y el noyu entamador del grupu amas d'él, fuimos Antón Alvarez Sevilla y yo. Inaciu Llope vendría un poco más tarde.

La creación de FonoAstur foi tamién un reblagu a la producción discográfica asturiana y n’asturianu.

Dende la so fundación en 1987 y hasta 2007, el catalogu de Fonoastur llegó a tener 180 referencies. Fonoastur foi efectivamente un reblagu importante pal desendolcu del folk asturianu. Significativamente l'orixen del sello foi la grabación del primer discu de Llan de Cubel. Lo d'editar n’asturianu como llingua vehicular foi natural, un actu militante en pura coherencia. Non por nada los que m'acompañaron nel entamu foron Chus Pedro Suarez y Xosé Suárez Arias-Cachero ‘Felechosa’. La sociedá como tal disolvióse al marchar yo pa Bretaña, pero pa dalgún proyeutu guapu prestaríame poder reactivala. 

Naquellos tiempos Asturies empezó a tener presencia nel Festival Interceltique de Lorient, del qu’agora ye direutor. ¿Cómo los recuerda?

Yo fui l'introductor d'Asturies na organización del Festival Intercelticu de Lorient. La hestoria sería mui llarga de contar… Los mios primeros contautos foron en 1979 y unvié y llevé dossieres de forma personal en 1981 y 1983. Éstos termiraron de concretase en 1984, cuando nos vimos Jean Pierre Pichard y yo. El direutor del Interceltique vien a Asturies pal festival d’arpes que yo organizara en San Isidoro ya invitame al festival de 1985 con una “pequeña” representación: na menos que’l grupu Beleño.

A partir d'esi añu la representacion foi aumentando. Yo convertíme nel delegáu d'Asturies pal festiva y nel 1987 Asturies algama ser miembru dafechu con tolos derechos del FIL. Naquellos entamos fuimos a presentar lo meyor que dibemos teniendo con muncha imaxinacion ya enfotu. Lo que víamos en Lorient, los intercambios y el trofeu Macallan ayudaron muncho a la nuestra evolucion. Y la imaxen d'Asturies foi instaurándose como ún de los encontos mayores de la programación.

Anguaño Asturies participa por igual coles otres naciones celtes con una representación de muncha calidá. ¿Cómo se ve n’actualidá la música y la cultura asturiana en Breizh y nel restu de delegaciones?

Como terminé de dicir, Asturies tien prestixu y ta perbién considerada. Asturies en Lorient y nel restu de les delegaciones ye sinónimu de seriedá y calidá ensin desdexar el nuesu sentíu de la fiesta. Y la Sidra y los productos asturianos cada vegada son más apreciaos. Y lo mas importante, la xente sabe que ye Asturies y ónde tamos. Lorient asitió Asturies nel mapa.

¿Cree que fai falta un mayor enfotu por parte de l’Alministración pa cuidar les nueses tradiciones?  

Los recursos invertíos na nuesu cultura son une escelente inversión, de gran valir añadíu. Creo que l'apoyu y la inversión na cultura propia debería entrar na llista de prioridaes en tempos de crisis.

En términos económicos, la diversidá, lo diferente, ye una imaxe de marca. P’Asturies sedría un elementu de gran valir añadíu nel so atractivu.

Semeya d'Édouard Hue espublizada baxo llicencia CC BY-SA 3.0.

Contador Estadistiques