Llucía Fernández: “Andecha y Agora Repúbliques dan voz al pueblu asturianu n’Europa y Asturies”

|
Llucía Fernández

Andecha Astur mira pal país y pal continente nestes eleiciones, a les qu’acude con Llucía Fernández Marqués (Xixón, 1974) como candidata. La formación nacionalista comprométese a dar voz a les asturianes y asturianos na Xunta Xeneral y n'Europa al participar na coalición Agora Repúbliques, con 3 eurodiputaos anguaño.

¿Cuáles son les espeutatives d’Andecha Astur pa esti 26-M?

Dependemos de los asturianos soberanistes y de toos aquellos que dicen querer la oficialidá y defender los drechos del pueblu asturianu pa que mos den el so votu nun exerciciu de sentíu común y coherencia. Esperamos que los miles de votos que recibimos pal Senáu se xunten con munchos más y se conviertan en más miles de votos p’Andecha y Agora Repúbliques que dean voz al pueblu asturiano n’Europa y n’Asturies.

‘Asturies nes tos manes’ ye’l nome del procesu participativu qu’entamaron pa ellaborar les sos propuestes. ¿Qué tal respuesta tuvo?

Perbona. Recibimos decenes de rempuestes, la gran mayoría con midies concretes y perinteresantes cincando a dellos temes: renta básica, midies pa dar puxu al seutor agrariu y ganaderu, meyores n’educación, sofitu a la dependencia… Hebo una que mos paeció perinteresante: que los asturianos emigraos n’España tengan drechu a escoyer ú quieren votar, n’Asturies pola so naciencia o na comunidá española u tean censaos nesti momentu. Toes elles foron valoraes ya incorporaes al nuesu programa.

Amás de la campaña en redes ficimos conceyu con delles asociaciones y organizaciones pa conocer más a fondu la so situación y recoyer les sos demandes. El resultáu ye un programa estensu con midies interesantes y factibles del que tamos mui arguyosos.

¿Qué ye lo que más-yos esmolez a les asturianes y asturianos?

Nun tener de qué vivir dignamente, la menacia costante de la emigración (propia o de los más queríos), la perda de drechos y llibertaes, el baxu nivel de la educación y la sanidá, l’avieyamientu y l’aparente falta de futuru –sobro tou nos pueblos–, la contaminación, la perda cultural y llingüística… Los asturianos tienen muncho de lo que s’esmolecer.

¿Ye’l votu a Andecha un votu útil?

Si votu útil quier decir un votu que val, sí. Si por ‘útil’ queremos dicir vota al que tien más posibilidaes de sacar puestín, porque asina podemos dicir que ganó’l nuesu candidatu anque mos vaiga arruinar la vida, entós non. Porque útil, teóricamente, ye que val pa daqué, y nun soi a ver cómu votar lo que nun quiero, incluso tapando les ñarres comu lleí perende (lliteral); cómu poner a Asturies en bandexa pa que siga siendo vendía al meyor postor puede ser útil.

Vienen usando la falacia del ‘votu útil’ dende l’entamu d’esta mal llamada democracia que mos punxeron enriba, primero, col votu del miéu. Lluéu, alternando colos votos del castigu pa un y otru lláu. Va pocu, tornaron col votu del miéu. Y agora, n’Asturies, hai quien quier vendenos el más ridículu, el votu útil de la fe ciega.

Y digo fe, porque fe ye creyer no que nun se vio. Creyer que los mesmos que fasta agora tuvieron a la escontra la nuesa llingua, y del nuesu país, los que mos robaron, los los que ficieron tolo posible por desaniciar Asturies, los que mos ficieron tragar, ensin votalu, un Principado que mos conderga a ciudadanos de segundes. Y los sos socios colaboradores, los que pauten con ellos, de sópitu esmolecense por Asturies y pola so llingua y tán dispuestos a concedemos el gran favor de facela oficial… Pero non muncho, nun seya que mos pongamos toos a falar llibremente.

La oficialidá del asturianu ta más presente que nunca na axenda política y en campaña. ¿Va ser una realidá nel casu de que s’algame la mayoría suficiente na Xunta Xeneral pa reformar l’Estatutu?

El pueblu asturianu ta presionando fuerte y llevando a partios tradicionalmente opuestos a la mesma a replantegase les sos postures. Nos confiamos en que la presión popular llegue a consiguilo, pero nun podemos evitar tar roceanos.

Por agora la oficialidá ta siendo utilizada esclusivamente comu caladeru de votos. Como preba d’ello, el fechu de que namás Andecha Astur presente la so documentación, campaña completa y programes n’asturianu y sobre tou, que seya la única organización que permite votar n’asturianu –gracies a una resolución del Tribunal Supremu del 2000, cuando Andecha llevó esti drechu a los tribunales–.

Si los que presumen de defensores de la llingua lo fueren realmente, sedría oficial hai años. El PSOE tuvo infinidá d’oportunidaes y Podemos, ente munches otres cuestiones, pudo plantegalo comu irrenunciable na negociación de los presupuestos, pero nun lo fizo porque pa ellos ye un tema secundariu y lo principal yera obedecer les directives dictaes dende Madrid.

Vusté tamién va nes llistes d’Agora Repúbliques pa les Europees, continuidá de la coalición Los Pueblos Deciden. ¿Qué supunxo p’Andecha Astur tener un enllaz direuto col Parllamentu Européu al traviés d’un eurodiputáu?

Supunxo na menos que participar activamente nes polítiques europees qu’afeuten a Asturies ensin inxerencies esternes. Hai que tener en cuenta que ye ellí onde se decide un altísumu porcentaxe de les polítiques que mos afeuten, polo qu’albidramos qu’Asturies tien que tener allí voz propia, ensin intermediación española.

Supunxo poner enriba la mesa los fraudes de los que yéremos víctimes, nun escaezamos que foi Andecha la que denunció el casu d’El Musel ya’l de los Fondos Mineros. Fizo que l’asturianu tea presente ca vegada que se fala de les llingües d’Europa, que se considerare la opinión en contra d’Asturies a la de valorar la instalacion d’esplotaciones de fracking nel nuesu territoriu, que los datos reales actualizaos de la contaminación atmosférica n’Asturies aportaren ensin escales al Comisionáu Europeu del Mediu Ambiente, con quien aconceyé personalmente, col resultáu d’un apercibimientu a España y l’apertura d’un procesu d’investigación…

Tou esto con un únicu parllamentariu. Maxine vusté esta llexisllatura, na que cuntaremos con trés o cuatro. De fechu, yá tamos preparando dellos temes pa trabayar dende allí. Pronto daremos noticies.

Contador Estadistiques