La Llegra: "Hai qu’empoderar a la militancia soberanista y afalar a la nuesa xente a ser valiente y decidío"

|
La Llegra: "Hai qu’empoderar a la militancia soberanista y afalar a la nuesa xente a ser valiente y decidío"

L'Espaciu La Llegra convirtióse dende hai unos años nun puntu d'alcuentru de la izquierda soberanista. Tres el desagospiu de La Madreña dio'l pasu de buscar un llugar propiu y asina nació'l Llar La Llegra, que cumplió recién el so primer aniversariu. Moisés Cima (Uviéu, 1983) y  Xurde Yano Montes (Uviéu, 1986) son dos de los sos miembros.

El Llar La Llegra ta acabante de cumplir un añu de vida. ¿Qué valoración faen d'esti tiempu?

Moisés: Foi un añu de munchu trabayu col que se ta avanzando haza un proyeutu políticu non necesariamente definíu pero que resulta mui constructivu a nivel personal y coleutivu.

Xurde: Nesti sen, yera importante consolidar un espaciu físicu y quiciabes eso quitó fuercies pa tirar per un espaciu netamente políticu-organizativu, ensin qu’esto quiera dicir que nun puxamos o que s’arrenuncie a facelo y construyilu pasu ente pasu.

Sicasí, la historia de La Llegra, vien de más atrás, de los tiempos del CSOA La Madreña.

X: Sí, La Madreña ye onde surde La Llegra como coleutivu. Aquel espaciu permitió que nos axuntáremos nun sitiu neutru políticamente pa la izquierda soberanista onde toles persones entraben a participar horizontalmente, ensin necesidá de que s’apautaren directrices ente organizaciones. Foi un pasu a una dinámica de participación ente militantes y xente qu'entamó a trabayar nesi intre mui interesante.

M: Ye cierto que La Madreña foi perimportante pa nós, pero hai un compromisu humanu y políticu anterior al CSOA que permitió que nos axuntáremos aquelles persones ellí. Anque hai xente que s’axunta nesi momentu, d’una manera o d’otra, toes teníemos esperiencies previes nel asturianismu o izquierda nacionalista.

Los poderes políticos finalmente cedieron al proyeutu especulativu pa esa finca.

M: Sí, al marxe de que, como dicíemos daquella, los “poderosos podres de perres” quixeren arrampuñanos aquel espaciu, nós como coleutivu siempre albidramos que les sinerxes xeneraes ente nós nel CSOA La Madreña teníen de siguir tres del desagospiu, asina que yá tábemos preparaes pa caltener el proyeutu inda selmanes enantes de que se produciere esti.

¿Qué tipu d'actividaes vienen celebrando nel llocal?

X: Hai actividaes desendolcaes pol propiu espaciu, onde se traten temes rellacionaos cola nuesa visión d’Asturies. Otres vienen propuestes por persones o organizaciones que quieren usar el Llar pa faceles porque lu ven como sitiu afayadizu. Tenemos tolos meses charres, presentaciones de llibros, de películes, talleres formativos…

M: Amás, el Llar ye tamién un llocal propiu de les organizaciones de la esquierda soberanista, como Darréu, la Xunta Estudiantil Asturiana, Conceyu Abiertu…, onde éstes desendolquen conceyos internos y organizativos, y onde se tienen materiales de tou tipu a la venta con puestinos, espublizaciones…

¿Cómo son les rellaciones colos coleutivos vecinales?

X: Tamos allugaes nun barriu mui activu socialmente, con bayura d’espacios amigos que trabayen custiones que nos interesen y que faen de la zona vieya d’Uviéu un sitiu mui atractivu pa col activismu. Sicasí, la orientación de La Llegra nun ye incidir específicamente nesti barriu, sinón que’l nuestru enfotu ye ser un sitiu de referencia pa xente de tol país y afondar nos discursos sociales y soberanistes.

Pa poder adecentalu y echar a andar el llar fixeron una cuestación popular na rede, con una bona respuesta. ¿Qué fontes de financiación tienen agora?

M: Hai xente que participa de maneres diferentes: dende apurriendo perres a donando material pa facer rifes. Por poner un casu, cuando’l crowdfunding hebo xente qu’apurrió chorizos en cuenta de perres o cestes de navidá de los sos trabayos. Con esos productos algamáronse munches perres. Va poco un collaborador averóse a dexanos una cesta de productos de Degaña y, otra, una coleición de cerveza artesano. Amás, tenemos materiales a la venta. Sicasí, va unes selmanes entamamos una campaña de collaboradores que va ser importante pa tener unos ingresos que permitan despreocupanos de los gastos fixos y poder siguir medrando.

Ún de los mayores ésitos de La Llegra nesti tiempu foi l'entamu d'un bloque soberanista pa dellos actos reivindicativos.

X: Los bloques soberanistes nel añu pasáu consiguiron afitase como una referencia nes movilizaciones, consiguiendo que s’amestare muncha xente. Llegaos a esti puntu de la dinámica #LluchandoPolaSoberanía –na que participa xente que nun ta tan implicao nel Llar específicamente– tamos mirando por dar un pasu alantre dende la movilización a la concreción política de discursos.

M: Lo más importante foi axuntar a xente que díbemos a les manifestaciones de manera individual, ensin saber mui bien ónde asitiános, y d’esta manera visibilizamos un espaciu de llucha y reivindicación esistente, unitariu y en construcción.

Estes selmanes tán celebrando dellos conceyos al respeuto. ¿Cómo van les reuniones?

X: De mano tamos diseñando un calendariu d’actuación pa los próximos meses. En concreto tenemos trés feches importantes nesti mes: el primeru de mayu, el Día de les Lletres Asturianes, y el 25 de mayu, que creemos qu’ha siguir siendo un día importante d’alcordanza, reconocencia y reivindicación.

El so oxetivu fundacional yera convertise nun llugar de referencia pal alderique dientro de la izquierda soberanista asturiana. ¿Cómo ven agora’l panorama políticu del nacionalismu asturianu?

M: Tenemos razones pa ser moderadamente optimistes. Agora mesmo hai xente que ta trabayando en xenerar discursos y llegar a una parte de la sociedá que nun se llegare enantes. Amás, abúltame qu’en cuenta de xenerar reaiciones 'en negativo' tamos afondando en crear discursos o rellatos alternativos. Eso ye lo más significativo d’esti momentu. Ta por ver a ónde nos va llevar esta dinámica.

X: Creo que sigue faciendo falta alderique, que tenemos que siguir afondando na dinámica de siguir arriqueciendo discursos, ampliar les militancies, interactuar cola sociedá asturiana y analizar los problemes y esmoliciones del nuesu pueblu. Per otru llau, fáltanos autoestima política: les posiciones que defende la izquierda soberanista son tan válides y defendibles como cualesquiera. Hai qu’empoderar a la militancia soberanista y afalar a la nuesa xente a ser valiente y decidío. De fecho, hai que reclamar que, como se ve nes posiciones de movimientos homólogos nel mundu, los postulaos de les izquierdes soberanistes son los que meyor defenden los intereses de los sos pueblos. Ye importante, tamién, que la xente non militante pero simpatizante interactúe participando de les postures que se vayan tomando: dándo-yos validez. La participación, n’estremaos niveles, ye perimportante.

¿Qué oxetivos se marquen nun futuru más inmediatu?

M: No tocante al Llar, ameyorar la comunicación y siguir averando a más xente a participar nes actividaes y xestión del espaciu: en resume, siguir afitando La Llegra.

X: No político, siguir trabayando dende la dinámica de #LluchandoPolaSoberanía, adautándola, tresformándola, axeitándola a les necesidades del movimientu soberanista no que faiga falta; texer redes; afondar na unidá d’aición; y entamar a dar pasinos visibles na construcción d’un discursu pal pueblu asturianu.

Na semeya, Cima y Yano.

Contador Estadistiques