Iglesias Cueva: “L'adautación de los cursos a los niveles del Marcu Común Européu ye ún de los retos de la UABRA”

El pasáu día 13 celebróse nel Aula Magna de la Universidá d’Uviéu’l pieslle oficial de los cursos de la Universidá Asturiana de Branu (UABRA) qu’entama l’Academia de la Llingua Asturiana en Cangas del Narcea a últimos de xunetu y primeros d’agostu. Xosé Ramón Iglesias Cueva (Cualloto, 1956) ye’l secretariu de los mesmos.

¿Qué valoración fai d’esta edición de la UABRA?

Una valoración mui positiva. Caltúvose’l nivel de trabayu y estudiu de la llingua nun ambiente relaxáu, abiertu y festivu. Esti añu, amás, el númberu de participantes foi más altu.

Yá son 9 años y pue dicise que ye un eventu consolidáu. ¿Cómo foi la so evolución nesti tiempu?

Hai que tener en cuenta que la UABRA créase a partir de los cursos de branu que l’Academia de la Llingua venía organizando en Llanes, Ḷḷuarca, Cangas o Ibias, ente otros llugares, dende la so fundación nos años 80. Nuna primer dómina l’oxetivu yera la formación del profesoráu d’asturianu; pasóse dempués a una segunda na que la mayoría del alumnáu yeren estudiantes universitarios de mui diverses facultaes qu’adquiríen una formación llingüística dientro del currículu de la so carrera. Cola creación de la UABRA lo que se pretendió foi abrir los cursos a un públicu más ampliu y, per otru llau, dar más pesu a otros temes culturales o formativos, ensin abandonar los puramente llingüísticos.    

¿Qué supunxeron los cursos d’afondamientu cultural y llingüísticu pal crecimientu de la UABRA?

Como yá dixi enantes, los cursos d’afondamientu nacieron nun primer momentu como continuación y complementu formativu de los cursos llingüísticos pero, pasu ente pasu, cola creación de la UABRA van convirtiéndose nel noyu central. A lo llargo d’estos caberos años van faciéndose cursos de formación en traducción, historia, nueves teunoloxíes, lliteratura, xestión cultural, ecoloxía, cine…, siempres sirviéndose del asturianu como llingua vehicular.

Tamién hai que destacar l’aumentu del pesu de les xeres complementaries.

Les xeres complementaries –conferencies, esposiciones, recitales, etc.– tienen un pesu importante. D’un llau intenten ser una apertura al esterior, al pueblu de Cangas n’especial; y, d’otru, una forma de normalizar l’usu de la llingua asturiana en cualesquier actu o tema. Asina, tolos años plantéguense conferencies de temátiques variaes que pongan a prueba l’usu del asturianu en distintos rexistros.

¿La collaboración de la Universidá d’Uviéu y el Conceyu de Cangas ye fundamental pa la organización de la UABRA?

Sí, ye mui importante la collaboración de les dos instituciones. La Universidá d’Uviéu failo non sólo económicamente sinón tamién col sofitu históricu y de personal. Nun hai qu’escaecer que la UABRA ye una parte de los Cursos d’Estensión Universitaria que van pel tercer sieglu d’historia. La diferencia colo anterior ye que la llingua vehicular de los mesmos ye l’asturianu. Sin la collaboración del Conceyu de Cangas que tan xenerosamente cede les distintes instalaciones los cursos nun seríen lo que son.

¿Pue medrar más la UABRA o los cien alumnos qu’acueye tolos años ye’l tope?

Les instalaciones actuales permiten poco más. Tanto les aules como l’agospiu van llegando al tope. Amás nun ye conveniente que los cursos tean masificaos, pa que’l nivel de participación seya l’afayadizu. 

¿Qué retos ha d’afrontar estos cursos nel futuru?

Creo que son dos los retos pal futuru: per una parte, l’adautación de los cursos tradicionales de llingua a los niveles del Marcu Común Européu; y, per otra, el siguir afondando na conversión de la UABRA nun llugar de reflexón sobre los problemes sociales y culturales d’Asturies, continuando y asturianizando asina los Cursos d’Estensión Universitaria.  

Recién celebróse’l pieslle oficial nel Aula Magna de la Universidá. ¿Qué supón esti actu pa l’ALLA y pa los alumnos?

Ye un actu mui protocolariu mui prestosu. Ye un compromisu públicu y solemne de les distintes instituciones col asturianu. El fechu de facelu nel Paraninfu de la Universidá pretende da-y esi calter de solemnidá y homenaxe.

Semeya: Aconceyamientu de profesores na UABRA. Xosé Ramón Iglesias Cueva ye'l cuartu pela mandrecha.