Hevia: “Los equipos direutivos son axentes bien importantes pa caltener y favorecer l’enseñu del asturianu”

|

L'estudiu 'Valir cultural y educativu de la escolarización de la Llingua Asturiana' de l’ALLA amuesa la bona disposición de los direutivos de centros públicos de Primaria pa col enseñu del idioma. Isabel Hevia Artime (Antromero, 1982) ye la so autora.

¿Qué datos nuevos aporta esta investigación?

Nos últimos años, diversos estudios sociollingüísticos fechos n'Asturies punxeron de relevancia la reconocencia del calter de la llingua asturiana. Con esta investigación quedaría cubiertu un ámbitu educativu que dende'l puntu de vista sociollingüísticu apenes ta ensin esplorar. L'estudiu céntrase nos xestores de los centros, que suponen un pilar fundamental dientro’l procesu de normalización de la llingua asturiana nel ámbitu educativu. Los Equipos Direutivos, dende la so capacidá pa facer posible procesos de cambiu, suponen axentes bien importantes nel momentu de caltener y favorecer la enseñanza del asturianu: informando adecuadamente a les families, na organización d'horarios y espacios o sofitando la matrícula d'esta materia, etc. Asina, la conocencia sobre'l valir cultural y educativu de la llingua per parte d'estos profesionales ye un requisitu previu pa promover posteriores cambios que faigan posible la inclusión efeutiva y necesaria de la llingua nel currículum.

Vieno d’un encargu de l’Academia de la Llingua Asturiana (ALLA).

L'Academia de la Llingua Asturiana tenía enforma interés dende va tiempu en facer esti estudiu, polo que solicita la collaboración d'una persona esperta nestes cuestiones. Resultaba-y interesante contar con un profesional que pudiera facer una investigación de tipu sociollingüísticu, pero nun perdiendo la visión pedagóxica de la cuestión. Por eso, pensóse en cuntar con una persona esperta del Departamentu de Ciencies de la Educación de la Universidá d’Uviéu y contactaron conmigo, puesto que yá collaborara cola Academia de la Llingua en dellos estudios como nel ‘II Estudiu sociollingüísticu de Lleón. Identidá, conciencia d'usu y actitúes llingüístiques de la población lleonesa’ (2007) y nel ‘Estudiu sociollingüísticu de Zamora (Fastera occidental)’ (2011). Por tanto, yá cuntaba con una esperiencia investigadora nesti tipu d'estudios y como profesional de la educación, tengo una alta conocencia del contestu d'investigación.

¿Cómo enfocó la investigación?

Col oxetivo de poder analizar les actitúes que los xestores –direutores, xefes d’estudiu o secretarios y secretaries– manifiesten respeuto a la enseñanza de la Llingua Asturiana, buscóse una ferramienta que fixera posible llegar a una muestra representativa. Por ello, l’instrumentu emplegáu foi un cuestionariu zarráu que recoyía les opiniones y actitúes acordies con una serie d’afirmaciones coles que los xestores teníen qu’espresar el so alcuerdu o desalcuerdu. Los resultaos llógrense tres un procesu de recoyida d'información que toma como referencia les valoraciones de 148 miembros de distintos equipos direutivos, distribuyíos en centros de toda Asturies nel cursu 2012/2013. D'esta manera analícense los discursos, argumentaciones y significaos que los xestores atribuyen a la presencia escolar del asturianu. Los centros seleicionaos pa facer les encuestes escoyéronse tres un procesu de muestreu onde se busca una representatividá de resultaos, de tal forma que en cada zona d'Asturies –oriente, occidente, centru y cuenques– considérase un númberu de centros que faigan que la distribución de la población y la muestra coincidan. Tres la seleición de los centros, nos meses de marzu a mayu del 2013 ficiéronse les encuestes de manera presencial en caún de los centros.

¿Cuálas foron les conclusiones principales de la mesma?

Los datos de la investigación muestren que pa los direutivos de los centros públicos d'Educación Primaria paez indiscutible'l valir social y educativu de la Llingua Asturiana, percibiéndose una perbona predisposición pa que los escolinos conozan y usen la llingua asturiana. De fechu, una gran mayoría (91,2 por cientu) muestra una opinión favorable a que la llingua asturiana forme parte del currículum escolar, tal como asocede n'otres comunidaes autónomes onde hai delles llingües.

Lo que nos diz la investigación, ente otres cuestiones, ye que les actitúes de los equipos direutivos son bien positives y muestren una predisposición pa favorecer la enseñanza de la llingua asturiana, siempre y cuando se reciba apoyu por parte de l’alministración educativa autonómica.

¿Sorprendieron-y los resultaos?

Los resultaos vienen a demostrar la percepción que yá teníemos sobre esta cuestión. Mientres realizábemos la investigación, la bona acoyida por parte de los xestores de los centros y les conversaciones que teníemos con ellos sobre estes cuestiones, yá nos avanzaben los datos qu'apaecen nel estudiu. Lo que sí resultó llamativo ye comprobar los porcentaxes tan altos en dalgunes afirmaciones, lo que nos demuestra que les actitúes y concepciones pedagóxiques que tienen estos profesionales pa cola enseñanza de la llingua asturiana nun son suficientes pa facer efeutivo l’asitamientu de la enseñanza de la llingua. El marxe de maniobra de los xestores vese llendáu poles directrices alministratives, independientemente de les ideoloxíes de caún d’ellos.

La mayoría de xestores señalen conocer l’idioma.

Efectivamente, una de les entrugues que se plantegaben nel cuestionariu facía referencia a la ‘conocencia’ y ‘conocencia y usu’ de la llingua asturiana por parte de los xestores. Nesti sentíu, los datos son claros: un 80,40 por cientu conoz l'asturianu y un 66,90 diz conocer y usar l'asturianu. Esti datu ye bastante esperanzador, al comprobase que nos equipos direutivos hai una base social que, de combinase con una afayadiza política educativa, favorecería una meyora nos niveles de conocencia del asturianu de los escolinos y, por tanto, de la sociedá en xeneral.

¿Qué ye entós lo que falla pa que namái’l 53,96 por cientu de los alumnos estudiaran la materia nel cursu pasáu?

La cuestión referida a la matriculación del alumnáu na asignatura de llingua asturiana nun l'abordamos específicamente nel estudiu y, por tanto, nun podemos facer inferencies sobre ello. Pero, dende'l mio puntu de vista, hai munches causes que pueden tar influyendo en que'l porcentaxe d'alumnáu que cursa esta asignatura nun sía mayor. Causes que pasen toes elles pola necesidá de la reconocencia de la oficialidá de la llingua asturiana y, por tanto, que la llingua nun se consideré namás como una asignatura voluntaria o optativa en dalgunes estayes educatives, sinón como una llingua d’acoyida de conocencies d'otres materies educatives.

¿Cree qu’esti estudiu fadrá a la conseyería recapacitar sobre la so postura con respeuto al idioma na Educación?

Sería mui ambiciosu pensar que l'estudiu va camudar la concepción de quienes tomen les decisiones en materia educativa n'Asturies. Lo que sí espero ye que lo llean y se dean cuenta de que los xestores de los centros educativos sofitaríen les polítiques que dende la conseyería ficieran en favor de la enseñanza de la llingua asturiana.

¿La entrada de la LOMCE pue ser una oportunidá pa normaliza la situación de l’asignatura?.

La LOMCE contién una disposición adicional onde se diz que nes comunidaes autónomes nes qu’esistan llingües non oficiales que gocen de protección llegal y con reconocencia curricular, éstes ofertaránse nos términos que determinen los órganos autonómicos competentes. Por tanto, nel casu d'Asturies, la LOMCE dexa en manes de la Conseyería d’Educación del Principáu d’Asturies la responsabilidá de normalizar la enseñanza de la llingua asturiana. D'ella depende agora mesmo la normalización de la enseñanza de la llingua y nun debería perdese la oportunidá p’ameyorar la enseñanza de la llingua y qu’ésta sía una realidá.

Tamién paez básico que se reconoza la especialidá docente.

N'Asturies nun esiste la especialidá docente de Llingua Asturiana nin Gallego-asturiano y, por tanto, nun hai una convocatoria pública d'oposiciones al cuerpu de mayestros y mayestres y profesores de Llingua Asturiana y Gallego-asturiano. La creación de la especialidá sería un primer acercamientu pa ‘normalizar’ la situación d'estos profesionales, dando llugar a la convocatoria pública d’oposiciones y l’axudicación definitiva a un centru determináu. Anguaño los docentes camuden cada cursu de centru, dificultándo-yos el desarrollu d’actividaes y proyectos de fomentu del asturianu y la so estabilidá llaboral. Ésti ye un puntu clave y uno de los problemes fundamentales de la enseñanza de la llingua asturiana. Nesti sen, casi'l 90 por cientu de los Equipos Direutivos ven necesaria la reconocencia de la especialidá del profesoráu de Llingua Asturiana, lo que repercutiría mui positivamente non solo na enseñanza de la llingua, sinón tamién nel meyor funcionamientu de los centros.

¿Cree qu’en Secundaria se repetiríen los datos qu’amuesa esta investigación fecha en centros de Primaria?.

Na Educación Secundaria la enseñanza de la llingua asturiana ye bien distinta y atopamos una situación onde nun se cumple la Llei d'Usu al ufiertase como una asignatura optativa en competencia con otres asignatures. Esto fai que la matrícula nesta asignatura baxe nesta estaya educativa y se produza una situación poco favorable pa la enseñanza de la llingua. Por tanto, ye d'esperar que los porcentaxes nun sean tan bonos como los llograos na estaya d’Educación Primaria.

¿Cómo ve’l futuru del idioma?

Lo importante ye ver un futuru a la nuesa llingua, un futuru próximu onde espero que se produza la normalización de la llingua y que dende l'alministración se trabaye n'ameyorar la enseñanza de la mesma. La educación ye fundamental pal futuru de la nuesa llingua.

¿Ye básica la oficialidá pa evitar el desaniciu del idioma?

La oficialidá de la Llingua Asturiana contribuyiría a solucionar munchos de los problemes de la inclusión efectiva del asturianu nel currículum y, por tanto, del so caltenimientu na sociedá asturiana. La oficialidá ye daqué necesario polo que tenemos que siguir lluchando. Nun hai dulda d’ello.

¿Cuándo vamos poder consultar l’estudiu al completu?

Los resultaos qu’ufre esta investigación espublizaránse de manera completa na revista ‘Lletres Asturianes’ que saldrá na primavera del 2014.

 

Contador Estadistiques