Hai 25 años nacía l’espíritu de Bimenes. El Conceyu yerbatu declaraba la oficialidá del asturianu, torgada a lo poco nos tribunales, que nel 2016 volvía a proclamar yá con Aitor García Corte (Xixón, 1980) al frente del Consistoriu, alcalde que prepara con ciñu la Fiesta de la Oficialidá del sábadu na que la conseyera va lleer el pregón.
5 de xunetu del 1997. ¿Qué recuerdu-y trai esa fecha?
Enantes nun había redes sociales nin tan siquiera móviles. Por aquella yo tenía 17 años y entéreme de la declaración d’oficialidá por un bandu del conceyu. Un bandu que punxeron nel horru de mios güelos. Alcuérdome perfeutamente.
Bimenes abría un camín al que-y se sumaron otros munchos conceyos.
Llamáronlo l’espiritu de Bimenes. Nunes selmanes yá declararen la oficialidá una veintena de conceyos de tolos collores políticos, dende IU, al PSOE Y PP.
Nel 2016, yá con vusté al frente del Conceyu, daben el pasu de declarar otra vegada la oficialidá. ¿Por qué nesi momentu?
Al pocu de declarar la oficialidá nel 97, los tribunales valtiaron la declaración argumentando que nun yera una competencia municipal. Los drechos nun deben negociase, y nesti casu consideramos que debíamos pelear por los nuesos drechos llinguísticos. Teníamos mayoría pa entamar la iniciativa y tornamos a declarar una vegada más la oficialidá. Porque ye’l nuesu drechu.
Yá pasaron 25 años d’aquella primer fecha. Un bon motivu pa celebralo a lo grande, amás depués de los dos años duros de pandemia, ¿non?
Nun dexamos de celebrar la oficialidá nengún d’estos dos años, aunque fora con una programación puramente institucional, pero celebróse. Esti añu queremos tornar a la normalidá pa celebrar de la meyor forma posible esos 25 años. Durante tola selmana tán celebrándose actividaes culturales y deportives al rodiu de la llingua y llueu pal vienres y sábado vien la parte folixera, cola Nueche en Danza y col conciertu de Dixebra.
Va encargase de lleer el pregón nun día tan señaláu la conseyera Berta Piñán.
Ye la persona indicada pa lleer esti pregón del 25 aniversariu. Una de les meyores escritores n’asturianu vives qu’hai anguaño. Qu’una conseyera venga a lleer el pregón de la oficialidá diz muncho. Ye la primer vegada qu’asocede y ye perimportante da-y visibilidá a esti tema. Porque nun escaezamos que les coses consíguense dende les instituciones, non nes redes sociales nin miagando peles esquines. Non, nes instituciones.
Tamién va tar representáu, un añu más, Miranda de l Douru, territoriu portugués onde’l mirandés, llingua perteneciente al tueru asturlleonés, ta reconocío. ¿Qué tipu de rellación esiste ente los dos conceyos?
Esti añu hubo cambiu d’alcalde y de color políticu. Dende ochobre hai una alcaldesa conservadora que respeta, curia y promociona el mirandés –igualito que los d’equí–. Yá tuviemos varios alcuentros y too mui bien. En Miranda hai mui bona xente, y vamos siguir teniendo una rellación ‘d’hermanos’. La selmana qu’entra devuélvo-yos la visita, pa festeyar el Día de la Ciudade.
L’asturianu ye oficial en Bimenes pero entovía non nel país. ¿Cómo vio’l procesu de reforma del Estatutu?
Deceicionome muncho. Podía poneme a despotricar tolo que llevo en papu, pero nun me paecen les formes nin la meyor defensa pal asturianu. Siguiente entruga…
¿Cree que los falantes d’asturianu vamos ver reconocíos los nuesos derechos nun futuru próximu?
Sí, confío. Dende Bimenes, y dende la agrupación asturianista, vamos siguir trabayando pol asturianu como vamos siguir trabayando por facer una Asturies meyor. Una Asturies pa toos y toes.
Queda menos d’un añu pa les eleiciones municipales. ¿Tien tomada una decisión sobre si va presentase a la reeleición?
Como bien diz, queda un añu. Nun añu puen pasar munches coses, la decisión nun ye mía, ye de tola agrupación. Les eleiciones son en mayu del 23, y a diferencia de los que tán tol añu faciendo campaña, hasta entós lo único que nos preocupa ye trabayar y resolver los problemes de la xente. Cuando llegue’l momentu yá veremos.
¿Cómo valora esta llexislatura?
Foi una mala llexislatura, malos tiempos. La pandemia tracamundió tolos planes y descuadró cualesquier presupuestu. Tuviemos que dexar aparcaos dellos proyeutos y hubo que tar modificando partíes presupuestaries ca pocu.
Llegó a comentar va tiempu de la posibilidá de que ‘Asturianistes’, marca cola qu’algamaron la mayoría absoluta nesta llexislatura en Bimenes, presentara candidatura a la Xunta Xeneral. ¿Maduraron yá esta opción?
Voi dicir que ya nun tamos baxo la marca ‘Asturianistes’, acoyímonos al nome que teníen los compañeros de Nava al nun concurrir cola marca PAS nes anteriores eleiciones. Tamos agora trabayando nunos estatutos y un reglamentu pa facer un partíu. Ye muncha la xente que nos pide dar el saltu y que medremos el proyeutu. Pero pa saltar, hai que tar seguru de que’l ríu lleva agua. El proyeutu asturianista de Bimenes funciona por una razón bien cenciella: más que compañeros de partíu, somos collacios, vecinos que nos respetamos y que nun dexamos que la política mande per enriba de la amistá y del compañerismu. L’unicu interés que tenemos ye facer coses buenes pol nuesu conceyu. Si esto crez, corremos el riesgu de qu’esto fraye. Ye lo una de les que coses que nos torna.
Na semeya, García Corte cola camiseta conmemorativa de los 25 años que se va vender güei y mañana na Fiesta de la Oficialidá.
Adxuntu | Tamañu |
---|---|
![]() | 1.03 MB |