Galán: “Fuimos quien a camudar la imaxe que la sociedá y los medios teníen del movimientu de reivindicación llingüística"

|
Inaciu Galán

Inaciu Galán y González (Xixón, 1986) dexa de ser presidente d’Iniciativa pol Asturianu depués de cumplir los dos mandatos que marquen como máximo los estatutos de la entidá. El III Congresu, del que saldrá’l so sustitutu, va celebrase esti sábadu a les 16.30 hores na sala de conferencies del xixonés Antiguu Institutu.

8 años pasen mui rápido…

¿Paez-y? A min dacuando paezme que pasó un sieglu (rises) Quiciabes ye porque fueron ocho años nos qu’Asturies vivió cambios políticos bien grandes y que tuvieron na cuestión llingüística movimientos mui significativos, que mos fixeron tar mui activos. Paezme que nesti tiempu l’asturianismu tuvo tamién un procesu de maduración como colectivu y qu’eso foi mui positivo. De dalguna manera fixímonos mayores, y tamién per primer vegada consiguimos que la cuestión de la oficialidá dexara de ser minoritaria y seya agora una reivindicación o una cuestión programática de la mayoría de los partíos, o a lo menos de la mayoría de la representación na Xunta Xeneral.

Tres esti tiempu Iniciativa pol Asturianu convirtióse nuna entidá valorada y con pesu ente la sociedá asturiana, con propuestes tán destacaes como l’entamu de los dos seminarios al rodiu de la oficialidá.

Allégrame que la organización seya valorada y tenga pesu, pero polo que significa pa la utilidá de la mesma. Nunca fui d’Iniciativa como quien ye d’un equipu de fútbol, con pasión ciega. Les organizaciones véoles como ferramientes pa los oxetivos que se planteguen y por eso me presta Iniciativa, porque creo que tuvo y tien esa utilidá, que fai coses significatives y que ye una voz que se tien en cuenta y que diz coses qu’aporten en positivo. Los dos ediciones del ‘Seminariu: oficialidá, el camín constitucional de futuru pal asturianu’ permitieron dar información a la sociedá y a la clas política, axuntar a persones mui relevantes alredor de la oficialidá, siguir trabayando nel consesu. Creo qu’esi ye’l camín.

¿Qué ye de lo que ta más arguyosu?

A nivel internu, ser una organización que vieno a aportar y a sumar, non a tar n’engarradielles absurdes. Tamién creo que fuimos quien a introducir un ambiente más optimista nun movimientu que tiende a ser mui derrotista. A nivel social, que ye lo más importante, paezme que fuimos quien a camudar la imaxe que la sociedá y los medios teníen del movimientu de reivindicación llingüística. Agora vennos como un colectivu más constructivu, más seriu, menos agresivu, y paezme qu’eso ye mui positivo a la hora de poner sobre la mesa les nueses reivindicaciones. Esto permitió, amás, que dientro d’Iniciativa pol Asturiana entrara xente de toles sensibilidaes y de tolos partíos, y que pudiéramos trabayar de cerca coles organizaciones polítiques, que son les qu’al final van tener que dar los pasos pa que l’asturianu tenga futuru. 

Depués hai munchos proyectos de la organización que creo que sumen abondo dende distintos ámbitos: la presencia na Feria Muestres, nes redes sociales, los cursos, el programa de radio, Alderiques d’Asturies… Son munchos y creo qu’aportaron abondo.

Nos sos mandatos tamién trabayaron por visibilizar la situación del asturianu fuera de les nueses llendes.

Ési foi un llabor clave, anque se vea menos n’Asturies. Güei conócennos muncho más n’otres partes del Estáu y d’Europa. Al poco de nacer, en 2011, fuimos fundadores xunto a entidaes de tol continente d’ELEN (European Language Equality Network), una entidá gracies a la que tuvimos presente y tenemos voz en foros internacionales de la importancia del Parllamentu Européu, el Conseyu d’Europa y l’Altu Comisionáu de Drechos Humanos de la ONU. Esto fixo qu’aumentara la presión internacional y tamién que se conoza más la realidá llingüístca d’Asturies y del restu de territorios onde l’asturllionés ye llingua propia.

Tamos tamién n’otra entidá, l’Asociación poles Llingües y les Cultures Europees Amenazaes (ALCEM) y collaboramos con entidaes de Llión y de Miranda del Douru de forma continuada, tendiendo pontes dientro del dominiu llingüísticu, que mos paez dende l’entamu una cuestión a la que-y dar importancia.

¿Marcha con dalguna espina clavada?

La principal, que sigamos ensin consiguir la oficialidá. Pero toi tranquilu. Si facemos les coses bien vamos consiguilo pronto. Agora toca dialogar muncho y facer pocos esparabanes. Hai que midir mui bien los pasos y nun quemar cartuchos de forma innecesaria. Afitemos el sofitu a la oficialidá, garanticemos que tenga los votos, y entós, sí, trabayemos pa que s’abra de forma rápida la reforma del Estatutu, na mio opinión nuna reforma amplia que nun focalice tola cuestión na oficialidá, porque eso ye lo que quieren precisamente los enemigos del asturianu. Nun tien nengún sentíu dir a una derrota parllamentaria cuando tamos nun momentu nel que podemos consiguir la victoria. Y nesti momentu la opción más factible pasa por que Foro vuelva a la postura favoratible a la oficialidá. Magar que nun tenemos que dexar de trabayar nel diálogu con PP y Ciudadanos, porque’l consensu ha ser lo más ampliu posible que podamos.

Y mientres, tenemos de siguir trabayando pa que los partíos que lleven la oficialidá nel prgrama, impulsen midíes muncho más ambicioses dende’l Gobiernu d’Asturies y los cuasi setenta conceyos que gobiernen. Nun pue ser que’l sofitu a la oficialidá nel programa dempués nun se vea reflexáu en midíes concretes nes polítiques del día a día.

28 de 45 diputaos na Xunta Xeneral son favoratibles a la oficialidá del asturianu o a trabayar pa la so declaración. ¿Nun ye un consensu suficiente pa llevala alantre?

Pa ello vamos siguir trabayando y van siguir trabayando quien garre’l relevu esti sábadu. Como ye sabío, los votos de la FSA-PSOE, Podemos ya Izquierda Xunida, que lleven esplícita la oficialidá nel programa, sumen 26 diputaos. Y préstanos pensar, y n’eso soi optimista, que los dos diputaos de Foro Asturias pueden sumase a esa mayoría y consiguir los 27 que faen falta pa consiguir 3/5 de la Xunta Xeneral. Pero nun va ser un camín fácil, como tampoco lo foi dir convenciendo a les distintes fuercies polítiques nestos cuarenta años. Hai que recordar qu’en 1987 nun había un solu diputáu favoratible a la oficialidá nel parllamentu asturianu. Eso faime ser mui optimista, porque vamos siempres a meyor.

Mañana los socios van escoyer al presidente nuevu. ¿Qué candidatos aspiren a garrar el relevu?

Nesti momentu sé que se ta configurando a lo menos una llista, pero hasta onde sé, la pelea ye más por evitar la presidencia que por facese con ella (rises). Entiendo que ye un puestu nel que tas mui espuestu y que precisa echa-y munches hores, dir a munchos actos, etc., porque Iniciativa pol Asturianu intenta tar siempres en tolos ámbitos posibles, pero toi seguru que quien venga fadrá un trabayu estupendu. Aprovecho p’animar a quien mos llea a que se sume, si nun ye na dirección, polo menos asociándose a la organización. Tamos llegando a los 500 socios y socies y habríemos ser munchos más. 

¿Va siguir venceyáu al trabayu diariu de la organización d’una o otra manera?

Sí, a lo menos de momentu pidiéronme que siga na directiva, yá como vocal, nun segundu o tercer planu, porque piensen que dalgo puedo aportar. Echaré un gabitu en tolo que pueda, pero pienso, como cuando establecimos esta llinde a los mandatos en 2011, que ye bono que se renueve la organización, qu’otres persones garren el testigu y la visiblidá pública.

No personal, ¿qué proyeutos tien en mente?

Pues amás de siguir col mio trabayu como profesor y periodista, mientres pueda siguir compatibilizándolos, esti branu va tocame rematar la tesis pa poder depositala en setiembre. Toi trabayando nuna tesis sobre la situación del asturianu nel franquismu, que ye apasionante pa min, pero que necesita un bon emburrión nestos meses. Tengo tamién un llibru de rellatos a piques de salir y otros proyectinos míos y colectivos que van sumándose al llabor. Lo que seya que faiga sedrá siempres dende’l compromisu llingüísticu, que nun naz más que de la normalidá d’usar la mio llingua naquello que faigo, y trabayar pa da-y futuru.

Contador Estadistiques