Fuente: “Na escena rock n’asturianu nun hai relevu xeneracional”

Sambre va continuar esti vienres n'Uviéu colos conciertos de presentación de ‘L’arume’, un EP con cuatro cantares. Hugo Fuente Piñera (Xixón, 1978) ye’l cantante d’esta banda de punk-rock con gaita en llingua asturiana.

¿Por qué apuesten por un EP tres grabar un discu de llarga duración nel 2009, ‘Na solombra’?
 
Apostamos por un EP porque teníemos ganes de volver a grabar y nun queríamos esperar a tener 12 o 13 temes pa un discu de llarga duración. Pue pensar vusté que somo unos vagos,pero non, la realidá ye qu’anguaño yá casi naide merca cedés. Personalmente pienso que’l formatu clásico d’editar un discu de 12 temes y vendelu a 15 euros ta muertu porque nun lo compra casi naide, asina que preferimos sacar un EP con menos cantares y poques copies que se pueda vender mui baratu pa recuperar los gastos d’estudiu y fabricación.
 
L’arume’, que tán presentando estos díes, yá salió hai unos meses de fábrica.
 
Llegó de fabrica a mediaos de xineru. Sacáronse 300 copies, de les que 150 quedaron en posesión del grupu pa regalar a los nuesos collacios, familiare y allegaos; el restu son pa vender nos conciertos. ‘L’arume’ nun se pue atopa nin en bares nin en tiendes.
 
¿Por qué’l nome de ‘L’arume’?
 
Ye’l titulu d’ún de los temes del discu. Igual que fiximos nel trabayu anterior, ‘Na solombra’, tamién quiximos poner al discu’l titulu d’un de los cantares que lu componen.
 
¿Qué van atopar les persones que sientan esti trabayu?
 
Van dar con cuatro canciones, trés de ellas cantaes –siempre en llingua asturiana– y otra instrumental.El discu abre con ‘La mio ciudá’, un tema rápidu con muncha presencia de gaita. Siguen-y ‘Salitre’, ‘La nueche ye mía’ y zarramos coltema que da títulu al discu, ‘L'arume’.
 
Son cuatro cantares mui potentes que siguen la llinia del grupu dende los sos entamos.
 
Los temes son una evolución de lo que ye’l discu anterior. Quiciabes nésti los cantares son un poco más rapidos y curtios, yá que pue que ‘Na solombra’ pecara de canciones demasiaes llargues.Pero basicamente siguimos na mesma llinea que dende qu’empezamos col grupu: punk con toques rockeros, gaita y llingua asturiana, lo que nosotros mesmos bautizamos como ‘punk-rock and folk!’.
 
Nesti tiempu tuvieron delles actuaciones con bandes internacionales  importantes dientro del panorama punk-rock, la última esti xueves colos canadienses The Mahones y los gallegos Bastards on Parade. ¿Con quién vos prestaría tocar que tovía nun lo fixeren?
 
La verdá ye que nun tenemos quexa nesi sen. Llevamos pila de conciertos per tola xeografia asturiana, anque como banda de direutu que somos, prestaríamos tocar más de lo que tocamos..., y tamién cobrar más, nun lo vamos negar (rises). Con los Mahones ye la segunda vegada que tocamos y con los Bastards on Parade, tamién. D’igual forma, tuvimos ocasión de compartir escenariu con bandes como Dreadnoughts, Far from Finished,Pipes and Pints, Born to Lose, Troublekid, Real McKenzies... Pero tamién destacaríamos toles bandes asturianes coles que tocamos: xente como Misiva,Nocivos, Taranus, Fala non Caduca, Skama la Rede, Burning Lust, Stanley Road, Dixebra, La Tarrancha...,y munches más, pol bon rollu qu’hai ente toos.
 
Sobre la banda cola que nos prestaría tocar, pues podría dicir mil y caún del grupu otres distintes, pero personalmente yo me quedo con dos: The Pogues y Dropkick Murphys, pola influencia que tienen dambes nel soníu de Sambre
 
El vienres repiten n’Uviéu nesta pequeña xira de presentación de ‘L’arume’.
 
Repetimos en La Antigua Estación, llocal que siempre nos trató mui bien, el vienres 18 de mayu a partir de les 9 la nueche. Va acompañanos la banda de Mieres A-66 y sobra dicir que la folixa ta asegurada.
 
¿Ye Sambre una banda de direuto?
 
Por supuesto que sí, como la mayoria de bandes que conozo.Los conciertos de Sambre destaquen porque nunca se sabe cómo pueden acabar y porque tenemos un bon grupu de siguidores que nos acompañen siempre que pueden en tolos conciertos pa facer que la conexón ente banda y publicu sía perfeuta.
 
¿Quiénes componen la banda anguaño?
 
 Pues los mesmos qu’entamamos, a esceición del baxista, yá que l’anterior, Gabriel Méndez, tuvo que dexalo. Nel so llugar entró Nacho Serrano. Los demás siguimos siendo Raul López y Jose Luis Peke a les guitarres, Xuan Naveiras a la gaita, Daniel Sánchez a la batería y un servidor a la voz y tamién, en dalgunos cantares, a la mandolina.
 
¿Cómo ve la situación actual de la escena rock n’asturianu?
 
Pues la verdá que bastante mal, básicamente porque nun hai relevu xeneracional. Nun salen grupos nuevos o, polo menos, yo nun los conozo. Siguimos la mesma xente qu’habia hai años, asina que, o entra xente mozo con ganes de facer coses nueves o la cosa pinta bastante mal. Como puntu positivu diria que tenemos la suerte de que l’asturianu tea abriéndose a otros estilos musicales que nun sían el folk o el rock. Anguaño nun ye raro dar con grupos de rap, pop o hardcore que metan nos discos dalgún tema n’asturianu, y eso siempre ye bono.
 
¿Supón l’idioma una torga pa davos a conocer fuera d’Asturies?
 
Non, anque tampoco ye que punxéramos munchu enfotu en danos a conocer fuera d’Asturies. Tuvimos oprtunidá de tocar fuera en delles ocasiones, pero al final, por incompatibilidá de feches o por tema de trabayu, quedó en nada. Ye una espina que tenemos y que nos queremos sacar.
 
¿Qué proyeutos tien Sambre en mente?
 
Pues tampoco nos complicamos muncho la vida nin somos mui esixentes con nós (rises). Pretendemos pasalo bien faciendo lo que nos presta y tocando ú nos llamen. Lo demás yá vendrá solo.