Fernández Coalla: “Los partidarios del ‘Non’ nun ye que nun quieran la paz, sinón que quieren otru tipu d’alcuerdu”

|
Víctor Fernández Coalla

Coló pa Colombia hai cuatro años, onde dirixe la consultora estratéxica Coalla & Stein, y yá ta perfeutamente integráu na sociedá colombiana. Víctor Fernández Coalla (Uviéu, 1966) ye tamién presidente del Centru Asturianu de Cali, ciudá onde vivió’l plebiscitu sobre los Alcuerdos de Paz ente'l Gobiernu de Colombia y les FARC-EP.

¿Ónde s’alcuentra Cali dientru d’esti conflictu armáu?

Santiago de Cali, asitiada nel occidente colombianu, cerca del Pacíficu, ye la tercer ciudá en númberu d’habitantes del país, namái per detrás de la capital y de Medellín. Hestóricamente’l Valle del Cauca, y entá más el Cauca, foron llugares onde estuvo peractiva la guerrilla de les FARC hasta hai bien poco y actuando relativamente cerca de la capital, llegando a sufrir abondo en munchos momentos de la hestoria d’esta guerra. Yera un tema preocupante dende llueu hasta que entamó l’alto’l fueu nel que s’albidraba una lluz.

¿Cómo se vivió en Cali esti alcuerdu y el plebiscitu?

L’alcuerdu de les negociaciones de La Habana llevóse con secretismu estos años últimos hasta que se conoció pola opinión pública’l documentu final del, nel que muchos puntos yeren motivu fonderu de conflictu ente la sociedá colombiana. Taba por ver si a pesar de la importancia de pesllar un tiempu sangrín y escuru por un tiempu de paz, la sociedá taba dimpuesta a “tragar tolos sapos” qu’imponía l’alcuerdu: casique una compra o un cheque en blancu pa la guerrilla de les FARC que tanto daño ficieron. Ési yera el altu preciu a pagar.

Per otru llau, la xornada de votación nel plebiscitu del domingu foi de total normalidá democrática y yo destacaría tal vez qu’esti tipu de consultes nun son mui normales (hai más de 50 años que nun había un plebiscitu en Colombia) y pueden dar llugar a sorpreses pal que les propón, como asina asocedió.

¿Cuáles son les razones poles que’l pueblu colombianu refugó esti alcuerdu de paz?

Dellos factores xuntáronse pa ello. El casu concretu d’un plebiscitu que, como yá dixi, ye una consulta fuera de contestu qu’en muchos casos pue dar llugar a sorpreses; l’escesivu grandonismu y escesu de confianza de Santos, que nun ta precisamente nel meyor momentu de valoración política interna; el propiu conteníu de los alcuerdos de La Habana que poco reconocíen los delitos de sangre y el terrorismu de les FARC; el mieu tamién de que antiguos terroristes tuvieren dellos privilexos nes cortes del Estáu; y el mieu que supón tamién el denomáu ‘castrochavismo’, qu’empapa la situación de la vecina Venezuela, pueden ser causes que llevaron a mucha xente partidaria de la paz a votar que non a los alcuerdos.

Dempués de la solemnidá de la firma en Cartagena y la repercusión mundial de la mesma, ¿sorprendió’l resultáu?

Sí, en bona midida sí sorprendieron abondo los resultaos también internamente, pero queda la esperanza de que’l resultáu al ser tan pareyu tien que facer reflexonar a toles partes, al saber que los partidarios del ‘Non’ nun ye que nun quieran la paz, sinón que quieren otru tipu d’alcuerdu, al que va tocar que llegar con consensu porque tola sociedá colombiana, los del ‘Sí’, los del ‘Non’ y los munchos que nun votaron, tán fartos de tanta guerra ensin xacíu que destrúi vides y nun fai país.

¿Qué papel xugó Uribe na campaña?

L’ex presidente Uribe taba dafechamente na opción del ‘Non’ a los alcuerdos y salió victoriosu nesta ocasión anque fora por pocu marxe. Tocará-y xugar agora entá más un papel de conciliador y de consensu coles otres partes en xuegu, dalgo que s’agüeya abegosu. Eso manifestó’l domingu depúes de la comparecencia del presidente Santos.

¿Y agora qué pasará cola paz?

Yo creo que ye’l tiempu de la pedagoxía. Más que nunca esti país necesita facer pedagoxía de la paz y xuntar pontes pa construyir y liderar xuntos una estratexa nueva. Ensin dulda tamos nun camín abiertu p’hacia la paz nos que toles partes tán d’alcuerdu a siguir, y anque se perdió una primer oportunidá, debe siguir apostándose por ella. La diferencia de votos tan curtia ye quiciabes y precisamente un gran revulsivu pa convertir la paz y unos nuevos alcuerdos nun gran pactu d’unidá nacional, que pieslle definitivamente la división en dos partes que pue vese anguaño na sociedá colombiana. Eso ye lo que la sufrida y bona xente d’ésti país merez.

Vusté preside’l Centru Asturianu de Cali. ¿Qué nos pue contar d’él?

El Centru Asturianu de Cali ta nesti momentu en procesu de constitución con tolos papeles yá metíos na Cámara de Comerciu de Cali, que ye la entidá que xestiona y controla’l texiu asociativu de la ciudá. Seríamos el primer centru asturianu de too Colombia y ta formáu sobre manera poles families d’asturianos emigraos por motivos profesionales equí y por delles persones colombianes con afinidá y ciñu por Asturies y lo asturiano, amás de dalgunos asturianos mayores que vinieron a estes tierres hai más de 50 y 60 años. Vamos pasu ente pasu. Somos pocos pero perbién aveníos.

Comentarios

Nel entamu los alcuerdos lleváronse de manera secreta, pero dende va muncho tiempu, la mayor parte del tiempu, los alcuerdos foron públicos y diéronse adelantos de lo que ehí taba escritu. Y los alcuerdos tan lloñe de ser un cheque en blancu, esistíen penes pa los guerrilleros, penes que teníen que pagase con penes alternatives en muchos casos, y nos casos que nun hubiera aceitación y reconocencia había penes de cárcel, poro que eso de que nun se "reconocíen delitos de sangre y terrorismu" nun ye ciertu. Amás, el castrochavismu ye una invención de la estrema drecha colombiana pa desinformar. Agora tocanos esperar propuestes d'Uribe y les sos secuaces, pero parez que nun tienen. Oxalá la paz llegue rápidu y xente como Uribe dexe d'obstaculizar.

Por otra parte, percontentu cola noticia del Centru Asturianu en Cali. Soi caleñu, y deprendí la llingua pela rede. Hai que sofitar el proyeutu y por supuesto la paz en Colombia.

Contador Estadistiques