Fernández Joglar: “L’asturianu pue evolucionar colos tiempos y adautase a cualesquier ámbitu profesional”

Rodrigo Fernández Joglar (Xixón, 1988) ye’l responsable de la propuesta última de TermAst. Esti pedagogu y músicu, integrante de Verdasca, presentó una terminoloxía educativa y yá trabaya n’otra sobre'l léxicu musicolóxicu.

¿Qué-y llevó a participar nel proyeutu TermAst?

El proyeutu TermAst ye una iniciativa que surde de la collaboración de l’ALLA col coleutivu Softastur y el Colexu d’Inxenieros n’Informática d’Asturies y enfótase n’ellaborar propuestes terminolóxiques pa los nuevos usos de la llingua asturiana. Nel mio casu, fice les dos estancies de práutiques de la carrera de Pedagoxía na ALLA y, na segunda d’elles, ufiertáronme la posibilidá de trabayar nuna terminoloxía pal ámbitu educativu, cosa que me prestó enforma.

La propuesta pretende ser, al igual que les anteriores, una ferramienta de consulta tanto pa profesionales del mundu educativu como pa cualesquier persona interesada en facer un acercamientu a esti ámbitu. Con respeuto a la terminoloxía educativa, podemos atopar nella una gran bayura de términos, que van dende denominaciones de  diferentes corrientes pedagóxiques a propuestes de vocabulariu pa la organización del centru escolar, pasando per diferentes trestornos del deprendimientu o ámbitos como la pedagoxía social y llaboral.

¿Cuántos términos inclúi?

La propuesta final recueye un total de 522 términos.

¿Qué tal recibimientu tuvo la so propuesta n’ámbitos educativos?

La acoyida ta siendo perbona, ya hebo dellos profesores de la facultá que manifestaron el so preste pal trabayu y por supuesto, munchos compañeros, pero hai que tener en cuenta que ta recién espublizáu y entá nun llega a tolos destinatarios a los que va dirixíu.

¿Cómo ve la situación de la llingua asturiana nel sistema educativu?

Anque suene a tópicu, mientras que l’asturianu nun tenga el mesmu estatus llegal n’Asturies que tien el castellán, va siguir arrequexada, tanto a nivel educativu como a nivel social, y eso nun se cambia namás con xestos de bona disposición, sinon que faen falta fechos y faen falta ya. Por cuenta de la situación marxinal de la llingua nel sistema educativu cada añu se pierde una montonera d’escolinos nel transitu de la Educación Primaria a la Secundaria, por nun falar de la precariedá del profesoráu de llingua asturiana. Sicasí, n’ámbitos como l’universitariu tan dándose pasos, como la garantía del derechu a lleer tesis doctorales n’asturianu. Amás, ésta ye la primer vez na hestoria qu’el Conseyu d’Estudiantes cuenta con una Comisión de Normalización Llingüística.

¿Cómo foi’l métodu de trabayu qu’utilizó?

En primer llugar realizóse un rastréu de términos per diferentes glosarios, diccionarios pedagóxicos y bases de datos n’Internet, pa ellaborar un llistáu inicial que foi creciendo a midida qu’el trabayu avanzaba, yá que, al traviés d’unos términos, surdía la necesidá d’incluyir otros. Depués, vieno’l procesu de propuesta de la forma más afayadiza pa les pallabres que nun teníen entá una forma asturiana, atendiendo pa ello tanto a criterios de usu de la propia pallabra como a los de l’ALLA.

Pal procesu de definición, acudióse a bibliografía específica del ámbitu pedagóxicu, asina como a les propies propuestes del Diccionariu de l’Academia de la Llingu Asturiana, anque en dellos casos, pola actualidá o incorporación recién de dalgunos términos, o’l grau de especificidá de los mesmos, hebo que crear definiciones o amestar diferentes aspeutos d’otres pa facer una entrada más completa. Nesti puntu hai que mentar tamién la ayuda recibida dende l’ALLA no que cinca al asesoramientu en cuestiones de normativización y lexicografía.

Pa finar, cada términu va acompañau de la so forma castellana, en casu de tenela.

¿Atopó munchos problemes nel so trabayu?

La verdá ye que dispuse de tol fondu bibliográficu que foi necesariu, tanto na Academia como na Facultá, asina que casi el mayor problema que topamos foi el puntu nel que marcar la llende del trabayu, lo que fizo que predominara un criteriu d’especificidá pa seleccionar los términos. Hai otres disciplines onde les llendes tán pernidies, pero la pedagoxía tien aspeutos en común con munches otres estayes de conocimientu, polo que dalgunes vegaes nun sabes si con una definición puedes tar entrando nel terrén de la logopedia, de la psicoloxía o de la filosofía, por poner tres exemplos.

Ésta ye la sétima propuesta de TermAst. ¿Qué supón esti proyeutu pa la llingua asturiana?

TermAst supón un aporte importantísimu de vocabulariu pa la nuestra llingua, qu’algama nueves cotes d’especificidá precisamente por tratase de propuestes feches por persones que se dediquen a esos ámbitos profesionales. Ye una apuesta clara pola vitalidá del idioma, qu’amuesa que l’asturianu ye una llingua capaz d’evolucionar colos tiempos y adautase a cualesquier ámbitu profesional. Prestaríame equí poner de manifiestu que mientres que TermAst ye un proyeutu basáu en collaboraciones desinteresaes de diferentes profesionales cola ALLA, otros proyeutos similares, como Termcat en Catalunya, cuenten con un presupuestu de más d’un millón y mediu d’euros y una plantilla profesional de cerca 50 persones. Esto da muncho que pensar, sobre too tras conocer el brutal recorte nos presupuestos de l’Academia de la Llingua Asturiana pal 2012, que recibirá una cantidá similar a la asignada va 15 años.

¿Tien previsto afondar en dalgún otru campu terminolóxicu? Vusté, amás de pedagogu, ye músicu.

Anguaño toi trabayando xunto a Santiago Fano, tamién músicu y maestru de música, nuna propuesta de terminoloxía musicolóxica, que tará terminada dientro d’unos meses.

¿Qué instrumentos toca?

El mio instrumentu principal, y que toco dende neñu, ye la gaita, teniendo la suerte de tener a mui bonos profesores tanto n’escueles de música como nel conservatoriu o bandes de gaites (Pedro Pangua, Alberto Varillas o Flavio Benito, entre otros) anque nel ámbitu del folk tiro más pol acordión diatónicu, instrumentu que deprendí de Xuan Nel Expósito. Tamién más recién, a raiz del pasu per bandes de gaites como La Raitana, intereséme por conocer un poquiñín de los instrumentos de percusión de banda, como’l tambor o la caxa d’alta tensión.

¿Qué proyeutos tien en mente anguaño?

Anguaño tamos creando repertoriu con Verdasca pa lo que será el segundu discu del grupu. Además toi trabayando tamién xunto a la mio hermana Andrea y a Elías García nun triu de folk de cámara, con arreglos pa flauta de maera, acordión diatónicu y bouzouki.