F. Menéndez: “Les declaraciones de Miguel Alarcos tuvieron fuera de llugar”

Raquel Fernández Menéndez (Salas, 1993) foi, ensin querer, protagonista de la polémica que más ecu tuvo nes redes sociales n’Asturies esta selmana. La llectura d’un poema propiu nun ‘Homenaje a los poetas de la Cátedra Emilio Alarcos’ provocó una reaición desmidía nel fíu del llingüista, con ataques graves hacia l’asturianu.

¿Ta soprendida pola repercusión que tuvo la so llectura d’un poema n’asturianu?

La verdá ye que me sorprende muncho. Sacáronse les coses de quiciu. Tuvo fuera de llugar.

¿Cómo recuerda la situación?

Foi un poco desagradable nel momentu. Lleí un poema en castellanu y llueu otru n’asturianu, ésti con marmullos de fondu. Depués Miguel Alarcos dixo lo que dixo. Nun me paeció nada normal. Amás yera una antoloxía fecha con dineru públicu, gracies al esfuerciu del profesor García Martín, polo que ye lóxico qu’apaezan poemes n’asturianu.

Los ataques d’Alarcos continuaron llueu en Facebook.

Sí, creo que foi poco depués de qu’espublizara la mio quexa en Change.org.

¿Qué ye lo que más-y fadia de too esti asuntu?

El fechu de que fale d’esa manera una persona relevante na Universidá, un profesor, y amás con esi vocabulariu. Yo veo que tien ehí una rabia contenida d’años p’atrás.

La so propuesta en Change.org ta recibiendo munchos apoyos, superando yá les 2.500 firmes.

La verdá ye que toi mui agradecida a la xente. Tamién poles declaraciones que pudi lleer y que se tán faciendo estos díes en defensa del asturianu.

Fáleme un poco de la so obra.

Tengo espublizáu un poemariu en castellanu, ‘Libélula’ –ganador del III Concursu Lliterariu Universidá d’Uviéu, correspondiente al añu 2013–, pero últimamente toi escribiendo n’asturianu. Naquel momentu estudiaba Hispániques y taba más influenciada pola lliteratura española y hispanoamericana, pero tamién pola falta de normalización llingüística nun m’atrevía tanto col asturianu, que falo en casa. Depués d’escribir el poemariu, lleí bastante n’asturianu y empece a escribir poesía nesti idioma. Espero poder espublizar pronto un poemariu en llingua asturiana.