Diez: “El cantu tradicional d’un país diz muncho de la forma de ser d’esi pueblu; el nuesu tresmite fuercia y caráuter”

¿Imaxina a 8.000 persones baillando música tradicional asturiana? Nel 2013 diose esi casu, pero non n’Asturies, sinón en Roazhon (Rennes), a mil quilómetros del país. Foi gracies a Amieva, banda formada por una asturiana d’esi conceyu, Clara Diez Márquez (Uviéu, 1989), y trés músicos bretones que ta acabante de sacar un discu.

¿Qué fai una asturiana per tierres bretones?

Colé d’Asturies va 5 años por cuestiones personales y quedé porque la situación económica y cultural ye tristemente bastante más positiva que n’Asturies hoi. Agora tengo un proyeutu d’investigación sobre la llingua asturiana na Université de Bretagne-Sud, n’An Oriant, y otru musical entamaos, y cuento quedar pa siguir con ellos.

¿Cómo naz el proyeutu d'Amieva?

Amieva naz de la mio voluntá por siguir col llabor pa cola música tradicional y pa cola llingua que desendolcaba n’Asturies enantes de vivir lloñe. Bretaña ye un marcu perfeutu pal trabayu con actividaes culturales. Tienen una apertura a otres cultures enorme, y eso fae les coses munchu más fáciles.

 Namás llegar a Bretaña tuvi la suerte de rellacionami con músicos interesaos pola cultura asturiana y el mecigayu fízose naturalmente. Amieva entamó como un tríu de curdión, vigulín y voz, y un añu dempués, metimos un batería pa tener un soníu más contundente.

¿Quién compón la banda?

Los músicos que formamos Amieva somos cuatro. Ta’l curdioneru Fañch Loric, qu’amás tien el rol de baxista con un sistema de baxos amplificaos integráu nel so curdión diatónicu, y ye’l compositor del grupu. Tocó en grupos perconocíos como Yudal Combo o Cocktail Diatonique. Llueu Yann le Nay al vigulín, músicu tamién en Bleizi Noz o Taptasmel, que ye’l mio compañeru de melodía, la mio segunda cuerda vocal. Y Erwann Ganier, batería que vien del mundu del rock y la música esperimental. Por último toi yo mesma, a la voz y la búsqueda de repertoriu. Soi la más ‘tradi’: yo canto igual que si tuviera con una pandereta y otres trés o cuatru moces cantando una xota Tresmonte.

Nesti tiempu intervinieron en munches fest-noz y festivales, como l'Interceltique de Lorient del añu pasáu.

Dende qu’entamó’l grupu ficimos unes 30 feches. Tuvimos en festivales, efeutivamente, como l’Intercélticu de Lorient, onde ficimos una creación col cantante xamaicanu Winston McAnuff y el músicu francés Fixi, curdioneru del grupu Java, o l’Eurofonik en Naoned (Nantes), el Nuits de Nacre en Tulle… Y nuna montonera de festoù noz per tola Bretaña, delantre de cientos y a vegaes miles de persones.

Pa la xente que nun tea mui avezada a la cultura bretona, ¿en qué consiste una fest-noz?

Una fest-noz –folixa de nueche, lliteralmente– ye una fiesta onde se bailla música tradicional bretona. Organícenla asociaciones o ayuntamientos y normalmente hai un chigre y daqué pa xintar. Suel haber trés o cuatro formaciones musicales, de les más tradicionales de binioù y bombarda –sedría como una pareya de gaita y tambor– o cantantes de kan ha diskan –cantu con rempuesta pal baille–, a los grupos que faen música pal baille dende distintos universos: funk, música lletrónicu, beatbox, jazz…

Hai cientos de bailladores que respeten toles visiones de la tradición, dende la más purista a la más renovaora. L’ambiente ye mui enerxéticu y súdase abondo.

¿Asturies necesita poca presentación en Breizh?

Nun crea… Poca xente sabe ónde ta Asturies. Galiza ye muncho más conocida. La xente tien una visión d’España como un país onde fai sol, cómese ‘paela’ y somos probes pero salimos tou’l día de folixa. Pero cuando-yos cuentes qué ye Asturies, que’l clima ye’l mesmu qu’en Bretaña, que tenemos montañes de dos mil y munchu y que falamos una llingua que nun ta protexía, interésense y siéntense identificaos cola nuesa realidá cultural.

¿Qué-yos llama más l'atención a los bretones de la nuesa música?

Lo que más-yos choca ye la forma de cantar. Yo siempre digo que’l cantu tradicional d’un país diz muncho de la forma de ser d’esi pueblu. El nuestru cantu tresmite fuercia y caráuter, y eso ye lo que me diz la xente cuando me sienten cantar. Llama-yos l’atención la semeyanza de ritmos, que ye ablucante tamién. Nun puen creese que lo que tán baillando seya repertoriu asturianu.

¿Con que repertoriu trabayen?

N’Amieva bebemos de la fonte del repertoriu tradicional vocal asturianu, del repertoriu instrumental bretón y componemos temes pal baille d’inspiración bretona. Facemos música asturiana pa baillar en fest-noz. Ye una manera de promover la música tradicional y la llingua d’Asturies dende’l so campu, pa que se sientan a gustu y la divulgación seya esitosa.

Tán acabante d'espublizar un discu con cuatro cantares.

Sí, llámase ‘Asturies é kanal/Breizh é tañsal (Asturies canta, Betaña bailla)’. Ye un discu de cuatro pistes que grabamos en Naoned en xineru d’esti añu, un trabayu qu’asoleyamos dempués d’acabar de montar tou’l nuesu repertoriu, unes dos hores de música. Tamién ye un mediu de promoción pa los festivales de música un pocu más grandes, que piden una publicidá del grupu más profesional.

La foto que presenta’l discu amuesa la filosofía del grupu, el nuesu respetu pola tradición, a la que miramos con güeyos de modernidá. El nuesu compromiso pa cola llingua asturiana llevónos a buscar nos nomes de la toponimia del conceyu d’Amieva pa escoyer los títulos de los cantares del discu. Tamién ficimos partícipes del nuesu proyeutu a cuatro poetes mozos: Pablo Rodríguez, Miguel Monteavaro, Moisés Cima y María Llatores, qu’escribieren les lletres de los nuesos cantares, caúna nel asturianu de la zona onde se recoyó’l cantar. Ta tou esplicáu na páxina web del grupu, que dientro pocu tendrá la so versión n’asturianu y en bretón.

¿Cómo se pue consiguir?

Vendémoslu personalmente, polo que n’Asturies ye un pocu difícil de consiguir. Por eso tenémoslu xubíu a les plataformes de música en streaming como Spotify o Deezer. Ehí pue sentise gratis y toles vegaes que se quiera. Si daquién quier mercalu, pue ponése en contautu con nosotros per Facebook.

¿Qué supón pa vusté espander la nuesa cultura per Breizh?

Ye un arguyu mui grande poder siguir trabayando en Bretaña pol mio país; eso fai la señardá más llevadera. Amás los bretones interésense enforma polo nueso. Ellos tienen una conocencia mui grande de la so tradición, lo que-yos permite mirar les otres cultures dende un puntu de vista diferente y más ricu.

Nel 2013 canté nel festival de Yaouank –el fest-noz más grande de Bretaña– en Roazhon delantre de 8.000 persones. Perdíase la vista dende l’escenariu de la montonera xente que taba baillando; baillando asturianu y n’asturianu. Esi foi unu de los momentos más fuertes que viví na mio vida. Y esi tipu de situaciones tamos lloñe de poder viviles n’Asturies, por desgracia.

¿Cuáles son los planes próximos de la banda?

Esti mes tenemos varios ensayos p’acabar de montar cuatro cantares nuevos. Dende mayu y hasta payares tenemos varies feches programaes, en dellos festivales y festoù noz per tola Bretaña. Y dempués del branu vamos trabayar nun proyeutu de creación musical del que nun podemos adelantar munchu, namás que Amieva crucia l’océanu pa xunir otru picu al exe Asturies-Breizh.

Y siguimos rodando’l repertoriu pa grabar l’añu qu’entra un discu completu. Tenemos como proyeutu venir grabalu n’Asturies y invitar a tocar con nós a músicos y collacios asturianos. Yá ficimos una collaboración con dos músiques asturianes nel Festival Intercélticu de Lorient: Leticia González, a la voz, y Cristina García, al vigulín, y resultó una esperiencia mui prestosa.

¿Cuándo vamos poder ver a Amieva actuando n'Asturies?

El proyeutu d’Amieva nun tará completu hasta que nun vengamos tocar a Asturies. La nuesa música ye ‘reversible’ y val pa baillar tantu equí como ellí. Pero’l panorama de la música tradicional n’Asturies nun ye mui favorable nesti momentu. Hai grandes dificultaes pa topar ónde tocar y daquién que lo financie, pero vendremos pa enseña-yos a los que lo quieran sentir lo que se fai pol país dende fuera, eso seguro.

Na semeya, Le Nay, Ganier y Loric xunto a Diez.