Díaz Trancho: “Consiguimos poner el focu na importancia de la tresmisión xeneracional del idioma"

El domingu celébrase nel Muséu del Pueblu d’Asturies el VII Día de la Reciella y la carrera 'Entaína'. Iris Díaz Trancho (Xixón, 1981) ye socia de ‘Reciella. Families pol Asturianu’, coleutivu qu’entama esta xornada que nació pa visibilizar la importancia de la tremisión oral del idioma y pa que les families disfruten d’una xornada n’asturianu dafechu.

¿Percibe ganes del Día de la Reciella?

Percíboles más que nunca. El videu del cantar d’esti añu, ‘¡Préstame pola vida!’, ta siendo un ésitu, con una gran difusión per redes, hasta’l puntu de que llegó a xente que nun conocía’l Día de la Reciella y que ta descubriéndolu estos díes por él.

Yá van siete ediciones. ¿Cómo evolucionó esta xornada dende los sos anicios?

La idea cola que nació sigue siendo un poco la mesma. La novedá importante foi hai cuatro años Entaína, la carrera de relevos que simboliza la tresmisión del idioma de xeneración a xeneración. Lo que sí cambió ye l’asistencia de xente, cada vez mayor pola mayor difusión del eventu.

¿Por qué vieron necesario entamar una iniciativa asina?

El Día de la Reciella naz, per un llau, pa visibilizar la importancia que tien la normalización de la tresmisión oral del idioma. Trabayamos munchísimu nesi sen dende Reciella, yá que ye clave pa la sobrevivencia del idioma. Per otru, pa que les families puedan disfrutar d’un día d’actividaes nel so idioma

Na so organización collaboren numberosos coleutivos y entidaes.

Ensin ellos nun sería posible’l Día de la Reciella. Amás de la participación de los socios y socies de Reciella na organización o la barra, la so presencia ye fundamental pal entamu de talleres o actividaes.

¿Qué ye lo que más-yos presta a les neñes y neños?

Présta-yos too. Tienen momentos d’actividaes y descansu, nun sitiu mui amable como ye’l Pueblu d’Asturies. Ye un sitiu zarráu, con prau, perfeuto pa pa pasar un día en familia. Llueu, sobre les actividaes, depende un poco de les edaes y de los sos intereses.

Entaína ye’l momentu más esperáu por toos. ¿Quién pue participar nesta carrera?

Llámamoslo carrera por dicir dalgo, porque ye casi un paséu. Nació hai cuatro años pa intentar visibilizar con una carrera de relevos, en concretu pol relevu ente los miembros d’una familia diferente cada añu, la tresmisión patrimonial del idioma. El Patronato Deportivo Municipal pon una salida, tien un llargor d’un quilómetro y nella pueden participar families completes.

Falaba enantes de ‘¡Préstame pola vida!’, cuartu cantar asoleyáu pa promocionar el Día de la Reciella con mensaxes positivos hacia l’idioma. ¿Perduren éstos nel tiempu ente la reciella?

Sí, inclusive habría que plantega-y a David Guardado sacar un discu con ellos. Él encárgase de les idees y de falar colos grupos. Son temes que tresmiten valores positivos del usu del asturianu, como l’añu pasáu foi ‘¡Espoxiga!’, que reflexaba l’idioma como una plantina malina que se riega falándola, o ‘N’asturianu sumes’ l’anterior.

¿Cómo evolucionó Reciella dende qu’echó a andar hai 8 años hasta agora?

Nun tenemos un gran interés en tener millones de socios, yá que valoramos que les families se conozan. Vamos creciendo poco a poco en númberu, pero lo que sí algamamos ye poner un poco’l focu na importancia de la tresmisión xeneracional del idioma. Cuando aconceyamos con políticos decátamonos de que yá ta camudando dalguna mentalidá.

¿Qué esperen de la llexislatura nueva?

Tenemos pidío un conceyu cola conseyera de Cultura nueva. L’enfotu ye munchísimo mayor con respeuto al idioma; veráse qué pasa con esta problemática de la tresmisión patrimonial. Tenemos munches idees y esperamos que se pueda facer, o que seyan quien a faceles visto’l panorama... Ye dalgo fundamental.

Na semeya, la familia Díaz Trancho na salida del 'Entaína' del añu pasáu, con Iris nel centru, cuando foi la familia encargada de portar el relevu.