De Miguel, Wolfe y Quintana: “‘Xota pa tres’ representa un averamientu inéditu a la música asturiana"

Jacobo de Miguel (Uviéu, 1973), Michael Lee Wolfe (Pittsburgh, 1962) y Mapi Quintana (Mieres, 1976) conformen un tríu que ta dando muncho que falar. El so primer trabayu, ‘Xota pa tres’, nun para de recibir allabancies.

‘Xota pa tres’ ta teniendo mui bones crítiques. ¿Esperábenlo?

Quintana: Yo suponía que les crítiques podíen ser bones, porque’l trabayu ta mui bien fechu. L'interés de los medios de comunicación ta siendo grande y eso sí que me sorprendió un poco más. Nun sabía que la música que facemos –non mui comercial que se diga– podía espertar tantu interés.

Wolfe: Agradacemos los comentarios. Paez que gusta’l discu. Y oxalá nestos tempos complicaos podamos presentalo en munchos llugares d´Asturies. Pero, de toes formes, ye una grabación que tien qu’abrir güecu internacionalmente y queda por ver si tamos capaces d’ello.

De Miguel: Creo qu’esti trabayu representa un averamientu inéditu a la música asturiana. Nesi sen, entiendo que ye normal que nun pase desapercibíu, porque abre una puerta nueva nel desarrollu de la nuesa música, poniéndola en contautu con músiques y sensibilidaes qu’hasta agora paecíen permanecer alloñaes d’ella.

¿Cómo definiríen esti primer trabayu del tríu?

Q: Pa min ye un puntu d'alcuentru ente los trés músicos, coles sos influencies y cultures diferentes. Ye básicamente un reflexu de lo que ta pasando n'otres partes del mundu: músicos emigrantes que se xunten con otros músicos d’otres cultures y el resultáu ye difícil d’etiquetar nun estilu musical.

W: Mapi defínelo bien. Y amás, entre tanto jazzman, jazzwoman y bluesman paez qu’hai un respetu y amor común pa colo tradicional.

¿Podría catalogase como ‘música tradicional asturiana’ o va más allá?

Q: Polo esplicao más arriba, paezme que pone-y etiqueta de ‘música tradicional asturiana’ sería incompleto.

W: ¡Pue etiquetase onde quiera ún! Pero nun se pue dicir "mas allá de la  musica tradicional". Tol mundo que forma un grupu intenta dir mas allá de lo tradicional, pero lo mas facil ye dir más bien p´atras.

DM: Afondando no que diz Michael, entiendo que’l plantegar “dir más allá” de la música tradicional tien un ciertu componente de meyora sobre’l puntu de partida, cosa que nun creo. Trátase de percorrer un camín asociáu al nuesu patrimonio musical, pero que va en paralelu; nin lo meyora nin lo empeora, simplemente abre la posibilidá de sentir música asturiana con otros oyíos.

El nome del discu diba ser ‘El xardín verde escuru de la nuechi’ nun primer momentu. ¿Por qué’l cambiu?

W: Nun hubo cambios. Hubo lo que se diz n´ingles ‘working titles’, pero cuando punxímonos a escoyer títulu, gustónos el del cantar de Jacobo ‘Xota pa tres’.

DM: ‘Xota pa Tres’, el cantar, ta compuestu pensando en Mapi y Michael, colo qu’amás representa, polo menos para min como compositor, un nexu de xunión ente los trés.

¿Cómo foi’l procesu de seleición de cantares?

Q: Realmente nun hubo una seleición. Per dalgo más de dos años fuimos armando'l repertoriu, arreglando temes tradicionales y apurriendo temes orixinales. Llegó un momentu nel que nos paecía que yá teníamos una cantidá suficiente de música como pa facer un discu y n'ochobre entamamos a grabalos.

Nel discu atopamos temes de composición propia, tradicionales o versiones adaptaes al asturianu, ente les que destaquen dos poemes árabes.

DM: Anque pue sonar a evidencia, lo que va alcontrar l’oyente ye música de De Miguel, Wolfe & Quintana. La forma más certera de definir el nuesu discu ta venceyada a entender que ye la suma de les nueses personalidaes. Por supuesto que tenemos referencies de too tipu, pero namái les utilizamos como mediu pa establecer un llinguaxe propiu. La nuesa referencia última ye’l nuesu criteriu y gustu propiu. No que se refier a los testos, dalgunos son de nós y otros son préstamos, bien del repertoriu tradicional bien d’autores consagraos. Toos ellos tán cantaos n’asturianu y caún d’ellos sirvió d’inspiración pa la interpretación de cada pieza.

¿Qué importancia tien la voz de Mapi en ‘Xota pa tres’?

W: Pa la mio idea, Mapi interpreta estos temes con maestría y delicadeza grande. Pa min ye un placer sentila.

DM: Mapi ye l’exe a partir del que se xenera la nuesa obra. La voz humana ye’l vehículu espresivu más potente que tien el ser humanu al so algame y, si l’interprete ye dalguien coles cualidaes de Mapi, conviértese nuna ferramienta imparable en cuanto a capacidá de conmover.

¿Hai dalgún cantar al que-y tengan un cariñu especial?

Q: Yo tengo-y un cariñu especial a ‘Achistáronmela/La Xiringüela’. Estes pieces enseñómeles Ambás y tuvi la oportunidá de conocer a Mariyina, la muyer que les enseñara a él. Amás fixi esti arreglu pa tocalu en ‘Camín de Cantares’ con dos referentes musicales pa min: Pepín de Muñalén y Elías García.

W: Nel mio casu, préstame enforma’l soníu acústico d’esti CD en xeneral, pero nun sabría destacar nengun cantar n´especial.

DM: Con “Me cariciabes” tengo una afinidá especial. El testu ye preciosu; la interpretación de Mapi, soberbia; y la música ensalza estos dos elementos llevando la pieza a un terrén máxicu y, al mio xuiciu, francamente guapu.

Editaron el discu con EveryGoodSong, compañía de Wolfe que mira muncho pa lo asturiano.

W: Ye cierto qu’EveryGoodSong quier trabayar en principio con artistes n’Asturies porque simplemente equí tamos. Y va perguapo, musicalmente, yá que tenemos munches coses que ta faciendo Jacobo, el nuevo CD de Marisa Valle Roso, a la Asturiana Mining Company, a Ethan Winogrand...

El pasáu día 20 presentaron ‘Xota pa tres’ en sociedá nel Teatru Xovellanos. ¿Quedaron contentos cola respuesta del públicu?
 
Q: Nun conseguimos enllenar, pero eso nun nos sorprende. La xente qu’asistió, que foi un bon númberu, salió emocionada y contenta por tar ellí. Esa, pa min, ye la meyor respuesta que se pue recibir d’un públicu.

DM: Lo que más valoro ye la impresión de que’l públicu marchó cola sensación d’asistir a un espectáculu nuevu pero al mesmu tiempu rellacionaos con ellos, yá que trabayamos con material autóctonu. El nuesu retu ye precisamente ési: poder dar respuesta a nós mesmos y al públicu asturianu d’una inquietú que creo que ta na nuesa sociedá, esto ye, cómo siguir alantre ensin arrenunciar al nuesu pasáu. Na midida en que se faiga con sinceridá y compromisu, entiendo qu’en cualquier llugar del mundu será válidu el plantegamientu; el ser humano repítese nos so deseos.

¿Tienen concretaes feches nueves pa poder sentir en direutu los cantares del discu?

Q: Vamos ufrir un conciertu’l 31 de marzu nel Teatru Filarmónica d'Uvieu.

Faciendo una mirada atrás, ¿cuándo se decidieron a trabayar xuntos?

W: Como promotor y como músicu, siempre tuvi un oyíu puestu a los jazzistes asturianos y llevaba años sintiendo maraviyes d’una tal Mapi. Cuando m’enteré que volviera a vivir n’Asturies, suxerí a Jacobo, el mio compañeru y profesor dende fai munchu tiempu, que podíamos intentar dalgo interesante con Mapi Quintana.

¿Ye’l vuesu proyeutu de llarga duración?

Quintana: La intención ye siguir trabayando xuntos mientres sigamos teniendo idees qu’apurrir; mientres sigamos inspirando a los nuesos compañeros y recibiendo inspiración d'ellos. Por supuesto, caún siguirá paralelamente con otros proyeutos, como Blima, Asturiana Mining Company, Eye in the Sky…

DM: El mesmo motivu que me llevó a De Miguel, Wolfe & Quintana ye’l que me fai mantener los mios otros proyeutos. La necesidá de buscar calces d’espresión ye una necesidá natural de cualquier creador. Cada proyeutu tiene una música o músiques asociaes a él. Hai muches coses en De Miguel, Wolfe & Quintana que tovía nun fiximos y que fadremos nel futuru, de la mesma forma qu’hai munches músiques nel restu de los nuesos proyeutos que siguirán surdiendo.

¿Cómo ven el panorama musical asturianu anguaño?

DM: Nel apartáu de la creación creo que ye incuestionable la meyoría. Hai más propuestes y de meyor calidá. Onde creo que tenemos una cierta quiebra en xeneral ye na interllocución col públicu; nun se trata de buscar culpables pero sí de que, per dambes partes, se faigan esfuerzos por buscar meyores calces de comunicación. Un públicu comprometíu fai meyor al artista asturianu y un creador asturianu consolidáu refuerza la identidá de la nuesa comunidá. Na mio opinión, yá se dieron pasos nesta direición, pero tovía nos queda llabor a toos.