Daniel García de la Cuesta: “Europa ye’l llugar onde más gaites esisten vives na tradición”

Daniel García de la Cuesta (Xixón, 1962) ta nestes feches dando a conocer ‘Les Gaites’, trabayu nel qu’indiga l’orixe y desendolque d’esti instrumentu y el d’otros venceyaos. El músicu tradicional faló con Asturies.com d’esta investigación.

¿Cuándo empezó a trabayar en ‘Les Gaites’?
 
Nun ye un trabayu con una fecha d’aniciu, pero entamé a tocar la gaita al entamu de los ochenta y tamién a recoyer datos d’aquella, y agora, col pasu’l tiempu, ye cuando puede vese lo arrecoyío. El fechu de qu’esistiere un Muséu de la Gaita en Xixón, que visité de neñu con mio pa cuando taba tovía nos baxos del Antiguu Institutu, ye lo qu’afalagó’l mio maxín, y sedría l’amistá a lo llargu d’años y los conocimientos que m’apurrió Luis Argüelles, direutor del muséu, yá nel recintu del Muséu Etnográficu del Pueblu d’Asturies, lo que m’empobinó, ensin dubia, a trabayar na recuperación del patrimoniu cultural asturianu, y especialmente na música. A ello, hai qu’axuntar un momentu social d’espoxigue nel interés de conocer lo nueso dende lo cabero de los setenta.
 
Tamién fue un encontu pa conocer el mundiu les gaites les facilidaes que m’ufiertaron, per un llau, Faustino Menéndez, facedor de gaites que trabayaba nel muséu, y que fizo la mía, y les primeres clases a les que fui con Pepe Blanco, José Blanco Alonso, a los qu’agradeceré siempre tolo que deprendí, y que valióme de pegoyu pa tolo que vendría más llueu. Ensín estes trés persones y la posibilidá de ver qu’había gaites en munchos llugares del mundiu, nun me paez que fuere posible entamar un trabayu como’l que se presenta agora. Tenemos que tar arguyosu de tener n’Asturies un muséu como ésti, al que recomiendo facer delles visitines y enseñalu a la xente que vien d’otros llaos, amás de que, como centru de documentación, col Archivu la Tradición Oral y de la Música Tradicional Asturiana, yá ye un llugar señeru pa cualquier persona que-y peta facer investigaciones sobre’l nuesu patrimoniu musical.
 
¿Qué van atopar los llectores nes sos páxines?
 
Esti trabayu, ente otros aspeutos, ye una esbilla de munchos, munchísimos datos que vienen d’hai cuantayá, y que tien el so pegoyu en, sobre tou, trés trabayos: el de Grattan Flood, ‘The story of the bagpipe’, del 1910; el d’Anthony Baines, ‘Bagpipes’, del 1960; o’l de Francis Collinson, ‘The bagpipe: the history of a musical instrument’, del 1975.
 
Vienen dándose dende hai sieglos referencies de que les gaites aporten dende Asia, lo que nun puede documentase, o que nel exércitu romanu tocábase la gaita y que la espardieren per onde pasaben, lo que tampoco ye asina, faciéndose interpretaciones de figures como si fueren gaiteros na antiguedá qu’al consultar los orixinales conservaos en dellos museos y llugares vese que nun lo son, lo mesmo qu’asocedió con dalgunes interpretaciones de testos d’autores griegos y romanos onde se veía l’usu de gaites y que nun yeren bones interpretaciones. L’estudiu fonderu del vocablu gaita tamién mos apurre una güeyada estremada de lo que venía afitándose. La esbilla que venía faciéndose de que les gaites col roncón p’arriba son atlántiques y les gaites col roncón p’abaxo son mediterránees, como si tuvieren oríxenes estremaos, nun diz verdá cola hestoría del instrumentu, na que’l verdaderu elementu d’estudiu ye’l pelleyu.
 
Tamién pueden topase les etimoloxíes de munchos instrumentos y nueves llectures sobre instrumentos como les albogues o la gaita zamorana. Nesti trabayu pónense al día munches d’estes cuestiones documentando les novedaes. Tolo que s’afita nel trabayu tien el so encontu na documentación consultada y apúrrense les referencies pa poder sopelexalo too y que valga pa estudios futuros.
 
¿Cuándo hai constancia de la esistencia de gaites n’Asturies?
 
Primeramente, faise nel trabayu una esbilla de qué ye lo qu’entendemos por gaita y dientru de los instrumentos con fuelle, y ente les novedaes que se presenten nesti llibru, tá la del espardimientu d’una imaxen de lo cabero del sieglu XII que pasó desapercibida y mal documentada hasta agora, y que tá nel ábside de la ilesia románica de San Jorge de Manzaneda, nel conceyu Gozón. Ésta puede ser la representación más vieya d’una gaita na Península Ibérica. De toes formes, hai qu’estremar siempre ente cuando apaecen datos o iconografíes, y l’usu concretu d’un instrumentu, yá que nun tienen por qué dir xuntos, nin representar dafechu l’instrumentu que se tocaba, anque mos da una pista. Del usu d’instrumentos ensin fuelle venceyaos a les gaites, tipo ‘auloi’, ente los pueblos del norte peninsular –Kallaikous, Astouras, Kantabrous y Ovaskones hasta’l Pirinéu– ya fala’l xeógrafu Estrabón hai unos 2000 años.
 
¿Cómo foi l’orixe d’esti instrumentu?
 
Equí tenemos qu’estremar que lo qu’anguaño entendemos n’Asturies por gaita, y n’otros llugares cercanos, ye un oxetu que foi conformándose asina per un desendolque hestóricu, que ye’l que s’estudia nesti trabayu. Asina, enantes del usu d’un fuelle yá esistíen otros instrumentos qu’al xuntase daríen no que sedríen gaites de fuelle. El propiu nome del instrumentu va damos una pista de per onde viaxó, al igual que los nomes d’otros instrumentos de vientu d’esta tipoloxía empareyaos pel usu de dalgunos materiales. Gaita significa cabra, polo que, hasta que nun s’usó esti elementu, nun podía conocese per esti nombre, sinon con otros. L’estudiu de la etimoloxía d’esti vocablu apúrremos muncha información, asina como’l de munchos otros étimos usaos yá dende l’antigüedá, lo que s’amuesa nel llibru pa poder facer comparances y conocer la so hestoria. Podemos documentar instrumentos con fuelle o vexiga yá nel sieglu 5 a.n.e. y dientro del mundiu griegu.
 
¿Qué papel cumplía naquelles sociedaes?
 
Si falamos d’instrumentos asemeyaos d’hai más de 2000 años, tenemos documentación del usu en rituales, entierros, xuegos y espardimientu. Nun seríen ámbitos mui estremaos de los que conocemos agora. Llama l’atención l’usu profesional, de pagu, ente los auletas y los gaiteros, tovía anguaño.
 
¿Cómo evolucionó l’instrumentu?
 
Nel noroeste peninsular tenemos una gaita de la mesma tipoloxía: roncón p’arriba y punteru cónicu. Y en cada gaita conserváronse, o perdiéronse, diferentes aspeutos de l’antigüedá: unes tienen dixitación pesllada, otres despesllada, l’afinación, los ornamentos, etc. Na gaita asturiana pueden atopase aspeutos antiguos como la dixitación pesllada, qu’amuesa una antigüedá como ente aquellos instrumentos que se toquen col vieyu sistema de soplíu continuu, que ye anterior al usu de fuelles, por embargu la payuela paez de les más evolucionaes.
 
El llugar onde se manguen anguaño los asientos del punteru y el soplete nel fuelle, tamien amuesa una evolución nes gaites asturianes. Los procesos d’aculturación y d’incultaración van faciendo que los pueblos adapten a los sos gustos y necesidaes los instrumentos 
 
¿Qué otros instrumentos tán venceyaos coles gaites?
 
Poles sos carauterístiques, podemos venceyar a los antiguos ‘auloi’ griegos y etruscos y les ‘tibiae’ romanes, d’onde paecen venir los oboes y clarinetos, y tamién a los ‘askaules’, les‘launeddas’, tovía n’usu, y tamién les ‘albokak’, que siguen utilizándose n’Euskadi y que tán venceyaes con un instrumentu de fuelle usau ente Turquía y Xeorxia, el ‘chiboni’.
 
¿Ónde tien la gaita una presencia tovía importante anguaño?
           
Europa ye’l llugar onde más gaites esisten vives na tradición, y nel llibru apúrrese un mapa colos llugares y nomes d’instrumentos del mundiu les gaites que val pa tener una referencia visual con echar una sola güeyada.
 
¿Qué tal recibimientu tá teniendo’l llibru?
 
Tá tovía presentándose. Tá recién arroxáu, pero yá hai una bona previsión, tantu d’Asturies como d’otros llugares, onde tán interesaos en conocer el trabayu, yá que nesti casu les presentaciones del llibru conlleven una charra onde s’amuesa l’estudiu fechu y se cuenten les novedaes, lo que ye más prestoso pal autor al poder compartir les coses en direutu y poder desplicar aquelles custiones que surden ente los asistentes. Ye probable que pase más de seis meses presentando’l trabayu. Les prósimes sedrán n’Avilés, les Cuenques, nel aula de Musicoloxía de la Facultá n’Uviéu, festivales de gaites, etc.
 
Destaca pola gran cantidá d’imáxenes qu’inclúi, más de 500.
           
Yera imprescindible ilustrar l’estudiu porque hai tantísimes gaites y otros instrumentos venceyaos dende l’antigüedá, que colos medios que tenemos anguaño ye pena nun poner les imáxenes.
 
¿Foi complicao documentase pa la ellaboración d’esti trabayu?
           
Sí, esti tipu de trabayos llévente por munchos caminos y centrase, esbillar y acuriosar los testos y les imáxenes faise tan abegoso como’l propiu estudiu. Lo que se fai nel llibru ye poner les fontes d’onde se saquen los datos pa que tol mundiu pueda consultalos. Afortunadamente, munchos documentos pueden consultase per Internet y pa ello facilítense los enllaces y les fórmules d’accesu, amás de la bibliografía utilizada. Hai que facer alcordanza de muncha xente que m’echó un gabitu col estudiu, apurriéndome conocimientos, datos, llibros, semeyes, tornes, etc., ensin les que’l trabayu non podría facese. Agradézco-yoslo muncho.
 
¿Tá teniendo repercusión fuera d’Asturies?
           
Como dicía, nun hai 15 díes que salió y yá hai contautos con centros asturianos y otros centros culturales de Galicia, Euskadi, Cantabria, València, etc., onde se presentará’l trabayu. Esti tipu de trabayos tarden en llegar, pero son pa quedase nel tiempu. El llibru pue conseguise n’Asturies nos puntos de venta d’avezu, pero cualquier persona que nun tope con facilidá’l trabayu puede ponese en contautu comigo na seña dagarcues@yahoo.es, o consultar la mio páxina web www.myspace.com/danigarciadelacuesta.
 
¿Qué otros proyeutos tien en mente?
           
Pues tengo ente manes, ente otros, un trabayu que, ensin priesa y ensin pausa, tá dándome que facer. Ye l’estudiu y recuperación d’un instrumentu ya esapaecíu y que se tocó n’Asturies ente los sieglos XIII y XVI, polo menos, del que recoyí casi doscientes cites d’usu en dellos monasterios asturianos y que se conocía por tabla tañida. N’otros llugares tá tovía vivu.