ChusMa García Muñiz: “Pal Liet prepararemos una puesta n’escena más potente y dalguna sorpresa”

‘Ensin ti’, de Taranus, ye’l meyor cantar en llingua asturiana del añu 2012 y vas ser el tema que represente al país nel Liet International de Còrsica. Xesús Nel García Muñiz ‘ChusMa’ (Xixón, 1977) faló con Asturies.com sobre esti ésitu del grupu.

¿Esperaben ganar el VII Premiu al Meyor Cantar?

Sinceramente, non. El restu de nominaos tienen munchu nivel y una reputación grande dientru de la musica n'Asturies, asina que foi una sorpresa perbona.

¿Por qué presentaron esti tema a concursu?

Por ser el mas comercial (rises). Cuando grabamos el discu, Susana sólo taba echándonos un gabitu; agora yá ta con nosotros y tien munchu mas pesu nos temes. Entós decidimos presentar el tema del discu onde mas participaren tolos miembros d'anguaño, especialmente Susana.

‘Ensin ti’ forma parte del primer discu del grupu, ‘Taranus’, nel que participen otra xente bien conocío de la escena musical asturiana.

Si, la verdá ye que tuvimos muncha suerte nesi sen. Punxímonos a grabar nos estudios Bunker de Llanera, que lleva Alberto Rionda. Cuando taba la metá del discu grabáu, propunximos-y que s'involucrare na producción; aceptó rápidamente y, non sólo eso, sinón que participó tamién nel tema ‘Siñor de la guerra’. Esperamos poder siguir trabayando con él nos futuros discos. L'apaición de Ramon Lage, tamien d'Avalanch, debióse a les amistaes profesionales de Diego. Foi una grabación perprestosa, na que Ramón amosó una sensibilidá hacia l'asturianu tremenda, con delles anéudotes llargues de cuntar.

¿Qué tal recibimientu ta teniendo esti trabayu discográficu?

Ye peculiar qu'esti discu saliere primero en tiendes de Madrid que n'Asturies. Tamos contentos. Pa nós anguaño los discos son una carta de presentación, y amás ta teniendo abonda distribución, yí sía en discu físicu como per Internet.

Foi un álbum que-yos costó munchu esfuerciu sacar alantre.

Llegó un momentu nel que nos decatamos de que yera necesario grabar el discu; los temes taben mui rodaos y vímonos con ganes. Escoyimos l'estudiu d’Alberto porque préstanos el soníu metaleru –evidentemente– y conocíamos la so filiación pasada en grupos de folk como Asgaya. A lo llargo d'un añu tuvimos grabando, dalgo que pue sonar un poco pretencionso, pero ye que nun foi de siguío; dengún de nós ye profesional de la musica, asina que teníemos de grabar de nueche, y de xemes en cuando pasábemos meses ensin grabar. Nun sé, supongo que la mayoría de musicos d'Asturies atalanten la situación.

¿Cómo definiría’l discu ‘Taranus’?

L'estilu del discu básicamente ye folk-metal, anque ye verdá que tien unes pingarates punk. Allargando un poco esa definición, podríemos dicir que'l nuesu estilu ye un amiestu de soníu tradicional cola rabia d'un pueblu que refuga morrer…, pero tou mui epico (rises).

Pese a que se retomó’l grupu hai cuatro años, la historia de Taranus vien de muncho más atrás.

Sí, bono, ye una dómina a la qu'Antonio y yo tenemos-y munchu cariñu. Yeremos una panda guaḥes onde unos sentíen heavy y otros folk, y xuntámonos p’amestalo tou ensin saber mui bien qué facíemos. Llueu sentimos per primer vegada a Skyclad y vimos el nuesu grial…, pero taba perlloñe. Fuimos dixebrándonos en dellos grupos de folk, como La Gueta la Runa y Lloréu, y de metal, como Stormrider, pero la semiente quedó ehí. Foi un tiempu entrañable.

Como premiu agora van representar a Asturies y a la llingua asturiana nel Liet International. ¿Qué supón pa Taranus esta responsabilidá?

Ye una gran responsabilidá que mos fai muncha ilusión. Esperamos facer un bon papel. Ye probable que preparemos una puesta n'escena mas potente y dalguna sorpresa, si mos dexen los tiempos de cambeos nel escenariu.

¿Presta-yos que la edición d’esti añu sía en Còrsica, un país perguapu con gran tradición nacionalista?

Sí, yá tamos pillando unes cuantes guíes turistiques de los llocales de Nazione Corsica (rises). Según me cuntó la xente que tuvo perhí, los corsos son xente persolidario col restu de naciones oprimíes. Va ser prestoso tocar con xente asemeyao cola que sólo mos separta la distancia xeográfica.

El folk-metal ye un estilu non mui conocíu n’Asturies pero que tien munchos siguidores n’Europa. ¿Cree que’l Liet International pue suponer un trampolín pal grupu a nivel internacional?

Si, de xuru, anque sólo sía porque si-y prestamos a daquién, baxe'l discu d'Internet. Otra cosa ye dicir si esto nos llevará fuera. Alemaña o Finlandia tán mui lloñe.

¿Ye una torga cantar n’asturianu pa salir del país?

Pa nada. Yá tocamos en Galiza y Castiella, saliéronnos coses nel País Lleonés (Benavente), y hai posibilidaes de sacar el discu n'Alemaña gracies a nun canciar n'inglés. Creo que la xente ye menos integrista col tema del idioma de lo que mos fain creer los medios de comunicación.

¿Qué planes tien Taranus pa los meses próximos?

Hai de dicir que gracies a esti premiu yá nos salió dalgún conciertu, pendiente de zarrar, n'Uvieu. Tamien vamos andechar cola Coordinadora Anti-fracking d'Asturies nun conciertu en Villaviciosa. Otra manera, vamos trabayar otra vegada con Iván Menéndez, el direutor de ‘Los colores del viento’, na banda sonora del so documental próximu, y tornamos a tocar musica medieval nun espectáculu de danza'l vientre, esta vuelta nel Xovellanos, acompañando a Susana Mortem y les sos alumnes.

Si tou sal como debe, pa finales d'añu sacaremos un EP con versiones metaleres de música bretona, sefardí, xermánica y un romance asturianu. La verdá ye que nun paramos.

Na semeya, ChusMa García ye'l primeru de la derecha.