El día 23 va celebrase'l Conceyu Fundacional del procesu Compromisu, impulsáu pol Bloque y pola UNA, y sofitáu por un bon númberu d’independientes. El profesor y escritor Carlos Suari (Avilés, 1982) ye una de les persones qu’apoya’l proyeutu.
                                                                                                            
¿Qué lu lleva a participar en Compromisu?
 
Una llectura d'esa realidá global que tantísimu impautu tien n'Asturies: la de la imposición d'un modelu que lleva per delantre derechos individuales y coleutivos, identidaes y cultures, formes de vida y medioambiente. Amás, paezme que pasamos per un momentu onde queda más que demostrada la necesidá de facer una política llimpia, ciudadana y cercana; una política que, en tola so dimensión, vuelva'l poder al pueblu. Too esto, pa min, ye l'asturianismu que tenemos que facer a partir de Compromisu.
 
¿Qué diferencies hai respeuto a otres iniciatives anteriores? ¿Qué nuevo ufre Compromisu a una persona que nun apoyó los proyeutos entamaos pol Bloque y los partíos integraos n’UNA?
 
Munchísimo. Falaría, de primeres, d'una cuestión d'oportunidá. Col procesu Compromisu ta poniéndose enriba la mesa un plantegamientu práuticamente horizontal, mui democráticu y autoconstructivu, que dexa que la xente entre y faiga'l proyeutu dende dientro, axustándolu a les idees de caún, permitiendo que caún comprenda dende'l primer momentu la razón de les coses nesa nueva opción política que va surdir de Compromisu. Amás, pémeque resulta especialmente interesante pensando na xente que nun vien militando en nada y na xente que depués d'años de militancia, ‘quemara’. Sálvense d'esta forma bona parte de les inercies, rocees y prexuicios qu'hasta la fecha taponaben el crecimientu d'una alternativa a la que, tengo pa min, tenemos derechu. Merecémosla.  
 
¿Ye ésti’l tren caberu del nacionalismu asturianu?
 
Non. Una de les zunes más clásiques na dimámica de partíos y coaliciones eleutorales nel ámbitu del asturianismu y de la izquierda foi hasta agora la pretensión de querer crear “el proyeutu definitivu”; xenerar unes urxencies estresantes que quitaben fuelgu, capacidá de reflexón y de discutiniu y que, sobre too, desaniciaben cualesquier posibilidá de facer política dende la estratexa. Nun se pue dicir qu'un fracasu parcial implique la muerte d'una óptica ideolóxica; taremos peor pol desgaste, pero nun hai tren caberu que valga.
 
¿Qué espaciu políticu pretende ocupar esti proyeutu?
 
Los parámetros son conocíos: l'asturianismu, la izquierda y l'ecoloxismu. Sicasí, paezme –y esto ye dalgo mui personal– qu'hemos trabayar muncho por afitar un modelu autónomu de lluches integraes ya interdependientes; un asturianismu sistémicu y desacomplexáu. Pémeque esta ideoloxía ha ser la de la xente que conoz a la xente, los sos problemes individuales y coleutivos, los pueblos, el territoriu..., y que, poro, ye la qu'ufierta soluciones más empátiques y afayadices.
 
El 23 de xunu va celebrase’l Conceyu Fundacional. ¿Quién pue participar nél?
 
Como pue vese na web oficial del procesu y como dicía na entruga anterior, los parámetros ideolóxicos, bastante abiertos, tán ehí. De nueves como opinión personal, prestaríame dicir qu'hai que xuntar otru ingrediente al perfil de toda persona llamada a participar en Compromisu. Precisamos tola capacidá d'escucha y negociación del mundu, empatía, tolerancia y ánimu constructivu. Tol mundu tien la mesma cuota de participación y repercusión, y ello ye una novedá con munchísimu potencial si sabemos saca-y provechu.
 
¿Cómo ta siendo la respuesta de la xente?
 
Pémeque positiva, polo menos en cuantes a participación d'independientes, que ye de lo que puedo fala-y. El númberu d’apuntaos al censu xube tolos díes y cuento qu'estos díes pueda dar otru bon reblagu. Ente ellos hai asturianistes con militancia actual, xente que dexó les militancies polítiques va un tiempu y persones qu'enxamás la tuvieron.
 
¿Otres formaciones asturianistes, más allá de Bloque y UNA como impulsores de Compromisu, tán interesaes n’asistir al Conceyu Fundacional?
 
Como independiente que soi, nun conozo esta cuestión. Lo que me prestaría ye que la xente priorizara la so llealtá al movimientu y al país, per delantre de la llealtá partidista, sía ésta pa Bloque, UNA, Andecha o PAS, por nomar dellos. Los caminos solitarios de toes estes opciones tán torgaos pola maleza. La escura realidá del asturianismu políticu ye implacable; nella sobren engarraes, fracasos electorales, desmovilización interna y alloñamientu de la sociedá asturiana.
 
¿Cuáles van ser los siguientes pasos previstos tres el 23-X?
 
Anque nun lo paeza, entá queda muncho hasta esta fecha importantísima. Depués, más trabayu d'axuste internu: la creación de la organización política. Nello vamos poner de gala les nueses capacidaes polítiques. Necesitamos desactivar les repunancies, saber axuntar idees colos demás y entender que l'ésitu de la negociación nun ta n'imponer les nueses idees particulares sinón en consiguir lo válido pa toos.
 
¿Compromisu ye un proyeutu a curtiu o llargu plazu?
 
Ye importante recordar que Compromisu ye'l nome del procesu fundacional y que sedrán les persones participantes les qu'escueyan cómo llamar a la formación política que salga d'equí. Cuento que nun queda otra que'l plazu llargu; ye la forma de garantizar qu'esa opción pola que llevamos naguando tantos años sía una realidá definitiva y non un capítulu.
 
Como independiente nesti procesu, a la xente que tovía tenga duldes n’apuntase al censu, ¿qué-y diría?
 
Mui cenciello. Cuanto más de toos sía esti entamu, más de toos va ser la sigla pola que lluchar nel futuru. El momentu de resalvar les duldes, el mieu y el desenfotu ye agora.