Caamaño: “Ye menester un replantegamientu completu y seriu de l’actividá escénica y del sector”

El direutor d'escena Antón Caamaño Vega (Xixón, 1966) defendió recién la so tesis doctoral, que dedica a analizar la situación del nuesu teatru. Fíxolo en Vigo y en llingua asturiana, “lo más coherente pa falar de teatru asturianu”.

¿Sorprendíu pola repercusión que tuvo la llectura de la so tesis?

Esperaba que tuviera repercusión, pero nun tanta nin na manera que la tuvo. Tuvo muncha sonadía nos medios, llegáronme felicitaciones a esgaya, hai xente que me para pela cai… Toi percontentu, la verdá. Pero fálase más de la forma que del fondu de la custión, anque eso nun tien por qué ser malo tampoco.

¿Por qué escoyó Vigo?

Por dos razones fundamentales: una l’académica, porque la Universidade de Vigo ye ún de los pocos llugares del Estáu onde pueden cursase másteres y doctoraos d’Artes Escéniques. El títulu d’Arte Dramáticu ye superior, pero les escueles nun dependen de la universidá. Polo tanto, n’Asturies nun existe la posibilidá de facer doctoraos nesta materia; en Vigo sí, per aciu d’un alcuerdu que se robló cola Facultá de Filoloxía e Tradución. La reconocencia dientro del réxime universitariu de les escueles d’arte dramáticu y la so equiparación real con otres disciplines ye dalgo qu’hai qu’abordar darréu nel ámbito estatal.

La segunda razón ye qu’hai semeyances evidentes na manera d’entender l’oficiu y la tradición teatral ente Galicia y Asturies; munches más que con Madrid, por casu. Y eso ye importante pa la comprensión de la materia que se trata nel trabayu.  

¿Y facelo en llingua asturiana?

La llingua asturiana ye la mio forma natural y habitual d’espresame, nel oficiu y na vida. Creo que yera lo más coherente pa falar de teatru asturianu. Esti fechu, y más dientro d’un ámbitu académicu, implica un discursu qu’ensin escaecer los propios requerimientos de la esposición científica, arrecostina con una carga emocional ya inclusive visceral importante. Asina s’entendió por parte de los dos codireutores de la tesis, qu’enxamás punxeron torga denguna. Tolo contrario. Soi consciente de que n’Asturies hubo tesis que nun se pudieron presentar n’asturianu, y creo que ye un asuntu grave y que ta pendiente de normalizar. Pero por suerte nun foi’l mio casu. Nun quiero que se m’atribuyan más méritos de los que realmente tengo. Nin los codireutores, nin les instituciones, nin los componentes del tribunal punxeron problema dengún y asumióse la propuesta de forma dafechamente natural. Inclusive consideróse l’emplegu de la llingua asturiana tanto pal trabayu como pa la llectura como un fechu relevante y positivu.

Nel so trabayu da por muertu’l teatru profesional asturianu.

Anguaño l’actividá escénica profesional n’Asturies ye práuticamente residual. Nun lo digo yo, con echar una güeyada a les cifres y facer delles cuentuques ye cenciello decatase de que’l teatru profesional asturianu ta al final d’un ciclu. Hai munchos factores: dende l’espoxigue de l’actividá aficionada hasta’l frañimientu del paradigma de la cultura como patrimoniu públicu. Creo que yá se tocó fondu y ye menester un replantegamientu completu y seriu de l’actividá y del sector. Per otru llau, a grandes rasgos, nun ye dalgo esclusivo d’Asturies, anque como pasa con too, equí esisten determinaes circunstancies que-y apurren un calter especial a la crisis.

¿Cuándo empiecen les dificultaes pa los actores y actrices del país?

Les dificultaes pa sobrevivir son inherentes al sector. Pa entamar, trátase d’un trabayu que nun tien un réxime habitual: trabáyase por díes. La precariedá, la falta de continuidá la inestabilidá y la falta de perspeutives son carauterístiques propies del oficiu. D’otramiente, n’Asturies la única forma qu’esiste de vivir d’esti oficiu ye trabayar como freelance en delles compañíes a la vez, y/o crear una y buscar el to sitiu. Nun hai actividá relevante en doblaxe nin audiovisual, estayes que n’otres comunidaes percontién l’actividá escénica. Entós, dientro de la marxinalidá a la que se condenó al sector de mano, el remate definitivu al mio modu de ver tuvo llugar demientres los mandatos d’Areces, nos que s’impuxo una forma d’entender la cultura como reclamu turísticu, na que los políticos y los macrocentros yeren los protagonistes absolutos y nos que se refugó totalmente a la industria cultural llariega.

¿Qué midíes seríen necesaries pa revertir la situación?

En principio un cambéu d’oxetivos dientro de la supuesta política cultural esistente; un decidíu apueste pol espoxigue de la industria cultural llariega, non entendida como un fechu folclóricu ensin más aquelli, sinón como una treme onde pueda guañar actividá económica y llaboral, y que persiga oxetivos talos como democratizar la cultura o aumentar el nivel educacional y la capacidá crítico de la ciudadanía, ente otros. Depués trataríase de llantar y articular los preseos institucionales necesarios pal so desendolque. 

¿Qué supondría la creación d’un Centru Drámaticu n’Asturies?

Hai munchos modelos de Centru Dramáticu. Yo personalmente apostaría por un modelu que permitiere emponderar específicamente’l teatru asturianu “con denomación d’orixe”. Los centros dramáticos n’esencia sirven, per un llau pa curiar de la tradición teatral tanto escénica como archivística o documentalmente, y pel otru pa esparder nueves propuestes escéniques, venceyaes a un territoriu o cultura determinaos; ello ye’l Corpus que se define nel trabayu. Creo y caltengo que, efeutivamente, hai munchu material, y que podría dase un centru dramáticu asturianu inclusive na so aceición más restrictiva. Pero nun hai muncha xente dientro la estaya profesional qu’apueste por esa llínia de trabayu.

Otra cosa sedría una fórmula mesta que permitiere también espardir propuestes de teatru (y tamién d’artes escéniques que nun empleguen la pallabra como preséu) feches n’Asturies, anquen nun tuvieren que ver colo específicamente asturiano, lo que-y apurriría al Centru Dramáticu una estaya d’actuación más amplia. En too casu, la so puesta en marcha garantizaría curiar d’un patrimoniu cultural importante, implicaría’l so emponderamientu y amás supondría un xacimientu d’emplegu qu’ensin dubia contribuyiría a percontiar l’actividá escénica llariega.

¿Cómo funciona’l Corpus que define na tesis?

Como una macona onde almacenar tola información que se deriva de los diferentes analises, que funcionen a so vez como les blimes de la macona, y que tamién ta finxada pola exa del Teatru Nacional Asturianu, colos sos discutinios y consensos, y la del ciclu del teatro profesional (1985-2014). La tesis tien una cadarma abierta y poliédrica, que permite siguir afondando en caún de los aspeutos que tamos tratando –a los qu’habría que sumar la cuestión de xéneru o la memoria coleutiva– y, poro, tamién n’otros que quedaron por plantegar; dicho d’otra manera, ye daqué en permanente construcción. Per otra banda, ye la primer tesis sobre Artes Escéniques fecha por dalguien que fizo’l so ciclu formativu completu n’Asturies. Oxalá seya un camín que s’abra.

¿Ye Galicia un espeyu onde miranos?

Sí, pa deprender de lo bono y de lo malo, que tamién lo tien. Ye, al mio mou de ver, la comunidá que meyor pue valinos de referencia, más qu’Euskadi o Catalunya, o mesmamente Madrid, que yá xueguen va tiempu n’otra liga… Con too y con eso, les diferencies ente Asturies y Galicia son ablucantes. En Galicia, como nel restu de les comunidades mal nomaes “históriques”, s’entiende la cultura propia como un valor que los identifica y cohesiona como pueblu, y nel so día llantaron preseos que-yos sirven pa caltener esos valores y promocionalos social o industrialmente. Equí tolo venceyao cola cultura (o cola llingua, que ye’l mesmu casu) arrequexóse de mano al sucu de lo folclórico. Vamos polo menos trenta años per detrás.

¿Esiste un teatru nacional asturianu?

Sí. Y nun ye necesariamente lo mesmo que’l teatru costumista. Hai muncho más, y en diferentes graos d’asturianidá, por dicilo asina. Pero inclusive na so aceición más restrictiva, alcuéntrense exemplos de representaciones o testos de teatru nacional asturianu en tol percorríu qu’hai dende’l  teatru ritual hasta lo que se rexistra anguaño en materia de teatru contemporáneu, por casu. Agora mesmo hai delles propuestes na cartelera asturiana qu’asina lo demuestren.

La RTPA sigue ensin apostar pol teatru del país.

Nún de los capítulos de la tesis analízase l’efeutu de los medios de comunicación escritos y el de diversos espublizamientos, col envís de determinar el grau de presencia y de receición del fechu escénicu na sociedá asturiana d’anguaño. Ún de los miembros del tribunal de la tesis suxirió facer lo mesmo tomando como base la presencia del teatru na TPA, por exemplu. Prestaríame facelo, y con más xeitu y detenimientu del que pueda yo amosar nestes llínies. Pero asina pelo alto, alcuérdome de que va poco retransmitióse la cabera edición de Les Comedies qu’entamen Los Sidros de Valdesoto, y que gracies a ello tuvo muncha más sonadía de la que yá tien de por sigo.

Pa mio idea que nun hubo más nada nunca, a nun ser reportaxes puntuales en programes como ‘Pieces’, o la repitición de dellos monólogos asturianos grabaos fai milenta d’años. Na radio tien presencia’l teatru amateur; el profesional denguna. Emitióse tamién una serie de radionoveles qu’entamó Adolfo Camilo. Y acabóse. La RTPA nun sólo ye un preséu fundamental pa que’l teatru profesional tenga presencia na sociedá, sinón que constitúi un xacimientu perimportante y pernecesariu de trabayu direutu.