Antón Caamaño: “El Gobiernu ta mui lloñe d’amosar compromisu cola escena asturiana”

|

Producciones Nun Tris, compañía que tien a Antón Caamaño y Inma Rodríguez como cabezaleros, ta acabante d’espublizar un llibro que rexistra los sos 15 primeros años de teatru asturianu. Caamaño (Xixón, 1966) faló con Asturies.com d’esti trabayu.

¿Por qué resumir estos primeros 15 años d’actividá de Nun Tris na estaya de teatru asturianu nun llibru?

Delles coses. Lo primero que son númberos mui redondos; son venti espectáculos nesta estaya en quince años. Otra ye que mos pruyía facelo enantes de que la estaya del teatru profesional n’Asturies desapaeza, que ye de lo que tien traza. Y otra, porque pa nós ye una llinia de trabayu importante; el teatru ye cosa del presente de l’actuación, nun queda rastro dengunu, y abultábamos que d’esta forma quedaría al menos documentáu un trabayu nesta xera de teatru asturianu, que coles sos virtúes y defeutos, paeznos necesario que quedara rexistrao. Añadir que, por delles circunstancies, tamos nun intre de cambéu y replantegamientos dientro’l grupu, colo que podía venir bien pa marcar esi xiru.

¿Esperaben naquellos primeros años algamar tolo que reflexa esta espublización, de nome 'Quince años a la gueta les llendes del teatru asturianu'?

Non. Son quince años, fueron perfilándose muncho los oxetivos, les metodoloxíes, la xente cola que trabayes va camudando y les sos aportaciones son distintes… Y tamién nós mesmos vamos creciendo ya investigando p’aportar otres coses al trabayu. 

¿Cómo yera la situación del teatru asturianu naquel tiempu?

Cuando nos ficimos definitivamente profesionales, que foi al pocu de que n’Asturies s’entamara a falar d’actores y actrices independientes, nel 1997, había munches menos compañíes; que yo m’alcuerde, debía haber como muncho diez. Polo demás, too igual: la desatención institucional en cuantes qu’a ayudes y canales d’espardimientu de los espeutáculos sigui siendo la mesma, más o menos, y en cuantes al teatru asturianu como xéneru o estaya, sigui venceyándose sobre too col teatru costumista.

¿Nun ameyoró nada col pasu los años?

Yo creo qu’empeoró. Los socesivos gobiernos asturianos nunca camentaron que fuéremos parte d’una industria cultural. Quixeron imponer el so modelu, que nun ye cultural, ye industria del ociu, y agora vénse los resultaos; la pila perres, tiempu y enerxia marafundiada n’instalaciones como la Llaboral o’l Niemeyer, por casu, nes que les artes escéniques asturianes tienen mui poca o nula presencia, y toda una industria, con más de doscientes persones trabayando, arrequexada nel despreciu y l’escaecimientu.

¿Foron difíciles los primeros pasos de la compañía?

Non más complicaos que cuando s’abre cualisquier negociu, supongo… Inma y yo ficimos primero una asociación cultural, que se nomaba Teatru de Trebolén, pa entamar  la nuesa actividá; esto foi nel 1992, tábemos acabantes de salir de los cuatro cursos d’interpretación del ITAE y creo que foi cuando más actuamos… Una de les idegues fundamentales que teníemos como grupu yera la de facer una base de trabayu profesional pa trabayar n’Asturies, con especial atención a los y les alumnes titulaes n’arte dramáticu,  y que la xente nun tuviera que facer lo que sigui faciendo, que ye colar pa Madrid a buscase la vida. Y pa ello había que perfacer una cadarma empresarial y artística dalgo estremada de les esistentes d’aquella, más dinámica na so xestión, y qu’atendiera, aparte de la escenificación d’espeutáculos, otros palos del trabayu d’artes escéniques, como la formación, organización d’eventos o l’animación. Tamién trabayábemos con otros profesionales de disciplines venceyaes, como malabaristes, músicos, cantantes… Too eso ye Nun Tris. Faise lo que seya, cuando seya, bien y rápido. Y por supuestu, tamién n’asturianu. Nuna primer dómina foi asina; una compañía d’actores y actrices. Cuntábemos delles vegaes con direutores d’escena de fuera d’Asturies, pa deprender tamién otros procesos de trabayu; nuna segunda época, en ciuantes Inma y yo, finaos los estudios de direición na ESAD, asumimos nós tamién la responsabilidá de la direición artística.

‘A la gueta l’ayalga’ foi la so primer obra y la que más vegaes representaron.

Entamamos a investigar sobre la mitoloxía asturiana, que d’aquella nun había tanta información. Revisamos los llibros d’Aurelio del Llano, Constantino Cabal, ya eso; per otru llau dimos con una obrina que’escribiere Novo Mier, que se titulaba ‘La Xana, el pastor y el ríu’. La obrina en sí nun nos convencía pa lo que queríemos, que yera dalgo divertío y dinámico, colo que ficimos nós una dramaturxa aonde apaicíen dellos personaxes más, inxertábense intervenciones musicales con gaita y tambor, y canción asturiana. Fízose tamién en versión de cai. Y los númberos fueron ablucantes: ochenta y pico funciones en trés años. 

Depués llegaron otres de munchu ésitu como ‘Brenga’.

‘Brenga’ yera un poco el mesmu plantegamientu, pero en gran formatu y sólo pa cai. Xurdió como espectáculu pa rematar los mercaos tradicionales. Ficiéronse munches representaciones, ente les que se citen les del Festival de Lorient la última vegada que tuvo dedicáu a Asturies; la última función echámosla tovía en San Xuan del añu pasáu. Les dos ‘Vixigones’ tuvieron munchu ésitu, y ‘Los socedíos de Nelón’, nel casu del monólogu asturianu. Una esperiencia guapa pa escolinos foi tol ciclu de ‘De boca a oreya’ y la ‘Muestra de tradición oral’, que nun sé por qué se dexó de facer. Interesantes les propuestes en materia de teatru contemporaneu, colos poemes de Naciu Llope y la ‘Fábula de Píramo y Tisbe’; y pal mio gustu lo meyor solucionao artística y formalmente, por ser propuestes de munchu riesgu, fueron ‘El criáu de dos amos’, el clásicu de Goldoni, y ‘Los amorinos de Bastián  y Bastiana’, de Mozart, la única vegada que se fizo una ópera n’asturianu. 

Son obres que toquen delles estayes. ¿Cuáles trabayaron nesti tiempu?

A grandes rasgos, y ensin entrar en diferenciar los espectáculos por formatu o por mena públicu, podemos clasificalos digamos por disciplines. Hai dos conceutos qu’interesa solliñar: ún, teatru y lliteratura son materies qu’anque delles vergaes tean venceyaes, nun son lo mesmo y lleven procesos estremaos y, dos, que’l teatru asturianu ye munches más coses que teatru costumista. Asina, como estayes nes que tengamos trabayao, pueden citase el teatru ritual, la mitoloxía, tradición oral, la comedia del arte, el monólogu, testos lliterarios adautaos y el teatru contemporaneu.

Nel llibru demanden la creación d’un Centru Dramáticu Asturianu. ¿Por qué sería importante?

Los centros dramáticos son preseos que ponen en marcha los gobiernos pa cumplir cola so obligación de curiar del patromoniu escénicu, trabayando colos clásicos; pa potenciar el trabayu de los dramaturgos actuales y pa buscar nueves formes escéniques. Asturies, amás, ye una comunidá con llingua propia, cosa que nun ocurre en toles comunidaes que tienen centru dramáticu. Amás, créase emplegu pa direutores, actrices y actores, téunicos… Sicasí, el Gobiernu asturianu ta mui lloñe d’amosar compromisu cola escena asturiana, y en términos globales, cola cultura y la llingua propies del país. Crear un centru dramáticu supondría institucionalizar el teatru asturianu y la llingua asturiana, y nun tan pol llabor. Nun hai un mal archivu, nin centru de documentación. Nun esistimos, asina qu’esi trabayu débese agora mesmo a compañíes como la nuesa, que pensamos qu’esa estaya de trabayu ye dalgo imprescindible; y asina volvemos a la necesidá d’espublizar el llibru.

El Gobiernu apoya’l teatru en llingua asturiana como al que ta fechu en castellán; o seya, mui poco. Al respeuto del teatru fechu n’asturianu, namái qu’hai una incipiente llinia de programación que ye l’Axenda Didáutica, a la qu’habría de da-y una vuelta; atiende más disciplines que la escénica y nel so menú d’actividaes entra xente que nun ye profesional; hai compañíes que tornen espectáculos fechos en castellán pa vender dalguna función…

¿Qué opinión tien del teatru costumista?

El teatru costumista ye bonu pa munches coses, ente elles l’emplegu del idioma, pero hai dalgo que nun mos presta que ye que contribúi a ver el teatru asturianu como dalgo folclórico; menor. Ye esa visión paternalista, como indiana, de la cultura y del idioma, poques gracies.

Tornando a Nun Tris, ¿cuántos actores y actrices pasaron poles vueses files nestos más de 15 años?

Actores y actrices, más de cien. Nun toes collaboraron igual, claro. Con tolos respetos a los demás, citaría a Arantxa Fenández y a Fernando Marrot como pegoyos fundamentales de la compañía, dende’l puntu de vista de la interpretación. Ana Gabriela Fernández foi fundamental tamién, non sólo como actriz, sinón porque llevó la xestión de la compañía de forma exemplar demientres el tiempu que tuvo n’Asturies; tamién, nesi sen, Lluz o Sandra desendoolcaron un llabor importante, más curtia nel tiempu. En cuantes a collaboraciones con xente d’otres disciplines, Berto Peña collaboró en ‘De boca a oreya’ como informante y en dellos montaxes como cartelista; Gloria Caamaño y Ruma Barbero tamién ficieron dellos trabayos de publicidá. Dramaturgos, aparte de lo que podamos facer Inma y yo, Adolfo Camilo, qu’escribió los monólogos de ‘Los socedíos de Nelón’, y más recientemente Lluis Portal, que fizo la torna de ‘El criáu de dos amos’ y agora la de ‘Xuanón namoráu’. Pasaron tamién artistes plásticos, como Pablo Maojo, que fizo la escenografía de ‘Los amorinos de Bastián y Bastiana’; Belen Novo, que participó y participa en dellos montaxes como baillarina y coreógrafa; cantantes llíricos, como Vanessa del Riego, Pablo Romero o Vanesa R. Touza;  pianistes, como Mario Álvarez o Manuel Burgueras –al que nun-y presta que lo digan, pero ye’l pianista acompañante de Montserrat Caballé–; gaiteros y músicos tradicionales (Valiente, Rubén Arias, Nel Llera…); y direutores que salen de la ESAD cuando nós, como Anna Rita Fiaschetti o Lara Herrero.

¿Cómo ye la vuesa actividá anguaño?

Too esto ye mui irregular. Un montaxe, na fase de preparación suel necesitar d’unos cuarenta ensayos enantes de la estrena; depués, con ún o dos enantes de cada función suel valir. Depués ta en repertoriu más o menos dos años, que ye cuando s’intenta esparder y vender. Va dos años ficimos cuatro estrenos, pero l’añu pasá dengún. Esti añu llevamos dos, ‘El pelegrín valiente’ y, agora, ‘Xuanón namoráu’.

Como pue ver, los componentes, amás d’Inma y yo, obviamente, camuden con cada montaxe, según repartu. Agora tenemos en cartel ‘Los amorinos de Bastián y Bastiana’, ‘El pelegrín Valiente’, ‘El criáu de dos amos’ y ‘La estrada’, ésta última en castellán;. Funciones comprometíes hai mui poques d’equí a la fin d’añu; posiblemente salga dalguna animación o similar. 

P’agostu tienen prevista la estrena de ‘Xuanón namoráu’.

‘Xuanón namoráu’ ye un trabayu que mos propunxo Lluis Portal. Ye un testu del 1900, orixinal de Federico Villoch, que se representaba nun teatru de variedaes de L’Habana, que se llamaba Teatru Alhambra. Vien a ser una comedia de xéneru bufu, a mediu camín ente la zarzuela, la revista y el Minstrel Show, con música cubana. El venceyamientu con Asturies vien de que’l protagonista, que lu representaba un actor asturianu, ye un emigrante asturianu en Cuba. Tamos falando entós d’un teatru fechu fuera d’Asturies, pero que trata asuntos asturianos. Queremos amás dá-y mayor pesu a la música, añadiendo dellos númberos musicales, y la torna al asturianu del personaxe de Xuanón aporta una meyor llectura del fenómenu sociolóxicu del papel de la emigración decimonónica. Actúen Vanesa R. Touza (sopranu), que fai’l papel un poco de namorada;  Lara Herrero, que fai de criada mulata; Fernando Marrot, que fai de enamoráu –anque tol mundu tá namoráu nesti montaxe–; Carlos Rodríguez, del Dúu Los Jimaguas, fai de mulatu; y yo mesmu fadré de Xuanón. El montaxe diríxelu Inma Rodríguez y tamos agora ensayando gracies a una residencia que nos concede el Teatru de La Laboral/ Ciudá de la Cultura. La estrena sedrá’l 24 d‘Agostu nel Teatru Riera de Villaviciosa, n’horariu nocherniegu y la entrada vendrá a valir seis o siete euros.

¿Hai dalgún otru proyeutu en cartera?

Proyeutos siempres hai, el casu ye ver la oprtunidá afayadiza pa ponese a ello. De mano, queremos facer dellos espectáculos de pequeñu formatu tantu de teatru como de llírica, pensando na siguiente edición de FETEN y na Axenda Didáctica. Y un montaxe grande, quiciabes ‘La muerte y la doncella de Dorfman’, en castellán.

El llibru repártenlu de baldre. La xente interesao, ¿ónde se pue facer con él?

La tirada ye curtía y tien un oxetivu sobre too comercial; de toes maneres entá queden, asina que poniéndose en contautu con nós direutamente. Tamién se va poder descargar de la nuesa web en formatu pdf dientro poco tiempu.

Na semeya, Caamaño –nel centru– col llibru na xornada de la presentación del trabayu, acompañáu por Lluis Portal Hevia y Inma Rodríguez.

Contador Estadistiques