Alcoceba: ‘La cantidá d’actividaes al aire llibre que se pueden facer n’Asturies ye ablucante’

|

Coincidiendo col Mundial d’Escalada que tuvo llugar en Xixón en setiembre, la Oficina de Normalización Llingüística de la ciudá decidió dedicar el pallabreru qu’asoleya tolos años a esti deporte. Berto Xuan Alcoceba Rodrigue (Xixón, 1981) ye’l responsable del ‘Pallabreru del Monte y la Escalada’.

¿Cómo surdió la posibilidá d’encargase d’esti proyeutu?

Supongo que fue por pura casualidá. Xosé Nel Riesgo buscaba a dalguien que pudiera facer esti encargu aprovechando’l campionatu d’Escalada y contactó con Xesús Manteca, pernomáu espeleólogu collaborador davezu de ‘Al filo de lo imposible’. Él suel siguier el mió blogue ‘Camudando’l camín’ y tenemos amistá virtual na rede social, asona que supongo que-y paeció bona idega encomendame a min esti trabayu.

Lo siguiente foi más casualidá tovía, yá que Xosé Nel para per un chigre d’al llau de mio casa. Poro, taba un día tomando daqué y atacóme a la entruga de si yo yera Berto Xuan Alcoceba y si quería facer el pallabreru de la Escalada. Nun podía dicir que non. Falar del monte y la escalada n’asturianu… ¡Que más se pue pidir!

Los anteriores taben enfocaos escolinos. ¿Ésti caltién esi espíritu o mira tamién a un públicu más adultu?

Personalmente, paezme que caún de los pallabreros espublizaos tán enfocaos a tol públicu en xeneral. Sicasí, ye una ferramienta perbona pa que los escolinos deprendan dellos aspeutos del deporte tratáu en cuestión. Prestaríame munchísimo que nos colexos de Xixón los maestros d’Educación Física y Asturianu usaren el pallabreru pa fala-yos un pelín d’esta afición, que se convierte nun mou de vida pa los que vivimos nesti mundu de los deportes al aire llibre.

De toes formes, lo qu’intenté con esti pallabreru foi que llegare a tolos públicos independientemente de la so edá y, sobre manera, del so conocimiento del monte y la escalada, queriendo ser lo que ye: un pallabreru y non un diccionariu téunicu d’escalada y alpinismu nin na asemeyáu.

¿Cómo estructuró’l pallabreru?

La verdá ye que tuvi dando-y  un montón de vueltes, porque nun yera capaz de dixebrar el monte de la escalada y esto ye dalgo que va col montañismu en cuestión. La llende pente cada modalidá ye perfina y con tan sólo l’usu d’una cuerda p’asegurar un pasu, podemos pasar del montañismu a la escalada. Poro, decidíme por describir en dos grupos les distintes modalidaes más averaes al montañismu y a la escalada, anque tengan muncha rellación ente elles, y axuntar el pallabreru téunicu nun apartáu, yá que munchos de los preseos son comunes a ambos grupos.

A la fín, quedé mui contentu cola estructura porque desplícase a mou d’entrada tol mundu del monte y la escalada, pa llueu afondar un pelín más nelles col pallabreru xeneral.

¿Cuála ye la modalidá más prauticada n’Asturies?

Anque hai un espoxigue nidiu del deporte de la escalada, sobre manera na modalidá de deportiva,  Asturies ye’l país de los montes y la modalidá del montañismu, xunto con variedaes más cencielles, como’l senderismu o l’escursionismu, ye l’actividá más prauticada. Namái hai que ver el llistáu d’agrupaciones de monte qu’hai n’Asturies pa dase cuenta d’ello.

El pallabreru como tal resúmese a la tercer parte del llibru.

Si miramos la evolución de los pallabreros, vemos que col tiempu van siendo dalgo más qu’un pequeñu diccionariu, tresformándose nun llibretu con una estructura na que se presenta’l deporte, modalidaes ya inclusu hestoria. Nesi sen, fici un pallabreru nel que s’introduz al llector nel espaciu montañeru, pa que llueu tola terminoloxía que tratamos tenga sentíu y él sepa ónde se usen dellos preseos o ónde pue alcontrar un términu toponímicu.

Esti pallabreru, pese a ser el más estensu de toos, queda ensin cubrir muncha terminoloxía téunica de la escalada y el monte en xeneral. Pero nel formatu nel que me movía había que facer un trabayu curiosu, completu y que tocase toles modalidaes posibles.

Nél destaca la toponimia asturiana del monte. ¿Qué términos recueye?

De primeres, la idea yera namás enfocáu tan sólo a la escalada, pero como yá dixi, nun hai manera de dixebrar dambes modalidaes y tratóse’l tema como un pallabreru del Monte y la Escalada. Nun ye que’l mundiu de la Escalada nun diera pa un pallabreru, sinon que, al mio entender, diba convertise nun trabayu escesívamente téunicu con pocu interés pal restu de la comunidá montañera; y menos entovía pa los non aficionaos al monte. Asina, teniendo la oportunidá de facer el pallabreru, nun podía dexar escapar la posibilidá de tratar el tema de la toponima asturiana nel monte y pa ello necesitaba que la visión del pallabreru nun se centrara sólo nes actividaes, sinón nel mediu onde se prautiquen.

Paecíame perimportante y camiento que ye ún de los apartaos que más va prestar, yá que cola bayura de términos que tenemos pa nomar caún de los accidentes xeográficos del monte, tener un pequeñu diccionariu onde consultar dalgún nome failo más amañosu. El llistáu de términos toponímicos amosáu ye ampliu, anque como yá dixi daría pa una enciclopedia casi (rises). Al menos, quixi describir los más comunes falando de los distintos tipos d’ellevaciones –cuetu, picu, llomba…–, hidrónimos –riega, llamarga…–, depresiones –foz, torca, ḥou…–, ivernales –cemba, ábanu, trabe, ribaya…–, tocando asina un pelín tolos tipos d’accidentes xeográficos.

¿Cómo fixo la recopilación de términos?

Llevo dellos años trabayando estos temes toponímicos nel mio blogue, pero nunca nun tuviera que facer un trabayu d’esti estilu. Nestos años, y por supuesto a la hora de facer esti pallabreru, tuvi en contactu con Xose Lluis del Río, que ye una enciclopedia toponímica. Tanto él como Xesús Manteca tienen trabayos sobre toponimia na páxina web del Grupu d’Espeleoloxía Gorfolí, de gran valir. Aparte, non pa esti pallabreru pero sí pa ‘Camudando’l Camín’, tuvi contactu con perbonos conocedores de la toponimia montañera como Ramón Sordo Sotres, nos Picos, o Xulio Concepción nel monte Central y macizu de Penubina.

El llibrín contó con una prologuista de luxu como Rosa Fernández.

Yo fui’l primer sorprendíu, yá que foi un tema que yá tenía en mente Xosé Nel Riesgo, pero yo nun tuvi nada que ver nello; ye más, hasta’l día de la presentación nun la conocía personalmente.

Ye mui d’agradecer les pallabres del prólogu, que reflexen perbién el sentir montañeru que tenemos munchos de nós, anque nun viviésemos esos años d’aventures y descubrimientos d’antaño; anque suañemos con ello nel día a día pel monte. La verdá ye que foi un placer conocela, charrar un ratín y alcontrame con que, a pesar de les sos munches espediciones, ésitos nel Himalaya, etc., sía una persona tan cercana y agradable.

¿Qué difusión ta teniendo el pallabreru?

Quiciás por desgracia la difusión nun ta siendo pel momentu mui grande. El día de la presentación tuviemos la mala suerte de coincidir con una anuncia política y restónos tola presencia nos medios, lo que me desilusionó un pelín. Polo demás, les intenciones yeren repartilu nel Campionatu del Mundiu, anque me paez que nun foi de forma pública. Tamién se qu’habia intención de facer llegar dellos pallabreros a los distintos grupos de monte de Xixón, y supongo que d’Asturies, pal so espardimientu.

Y bono como dalgo seguru, na Oficina de la Llingua de Xixón, asitiada nel Antinguu Institutu, pueden pidise ún. Tamién ye posible descargalu na páxina de Cultura del Ayuntamientu de Xixón.

Asturies ta viviendo un espoxigue d’estes modalidaes deportives.

La verdá ye qu’anguaño n’Asturies la cantidá d’actividaes al aire llibre que se pueden facer ye ablucante. Supongo que ye dalgo xeneracional; les anteriores colaron de los pueblos y de la vida nel monte a la ‘cómoda’ vida na ciudá y nós fuximos de les comodidaes de la ciudá pa intentar respirar aire llimpio y escaecer los problemas que nos afueguen nel día a día.

Pero nos últimos años, esta tendencia ye muncho mayor, lo que tien coses positives y otres non tanto. Siempre ye positivo que la xente quiera conocer Asturies, dir al monte, prauticar senderismu, escalada… Pero muncha d’esa xente lleva consigo les zunes de la ciudá, empuercando’l mediu nel que pretende pasar un bon día. Nun ye raro ver restos de pitos o papeles nos pies de vía d’escueles d’escalada o un cumal enllenu basoria de la comida d’un grupu; y yá nun digo si caleyamos per rutes mui transitaes de senderismu, como la Sienda L’Osu, L’Alba o’l Cares, onde la masificación ye mayor.

Esto ye ún de les coses negatives y otra ye’l desconocimientu y la poca preparación p’andar faciendo actividaes al aire llibre. Per un llau paez qu’hai una especie d’interés nos medios por sacar noticies d’accidentes, perdes y rescates n’actividaes montañeres y, per otru llau, siendo sinceros ye poco lo que pasa en monte. Voi pone-y dos exemplos que vi nel mesmu día mientres una actividá nel macizu central de los Urrieles. El primeru ye un exemplu de desconocimientu, vamos ponelo con un corredor de montaña –playeros de correr pel monte, pantalonín y camiseta curtios, mochila mínima…–, dalgo mui de moda, que nos topamos demientres desmontábemos l’últimu rapel de la torre L’Osu. Esti home de xuru que me pega mil vueltes físicamente, pero preparáu y documentáu diba cero. Nun ye normal aportar al pie de vía onde tábemos nosotros entrugando si aquello yera Peña Vieḥa, un monte que ta a unos dos quilómetros en llinia recta; y eso ye un mundu nos Picos. Si a esti home pasa-y dalgo, métese la borrina o cualesquier cosa, tenemos un accidente por falta de conocimientu del mediu nel que pretendes movete. Esto vese muncho en Picos: xente mui fuerte físicamente pero que nun saben nin cuál ye’l Picu Urriellu y camienten que baxar per una canal ye un atayu pa facer más quilómetros de nun se que percorríu de moda.

L’otru exemplu pues velo a diariu xubiendo a la Vega Urriellu, con xente en playeros blandos, con bolses del Alimerka por mochila y a puntu morrer cola primer cuesta penriba la Trenosa. Equí, nin preparación física nin conocimientu de qué ruta vamos facer o qué desnivel tenemos que superar… Y esto ye a diariu nel monte asturianu.

¿Qué conseyu pue dar a les persones qu’anicien a salir al monte?

Pues como too nesta vida, lo meyor ye formase tanto físicamente como téunicamente, yá que si tamos en bona forma esfrutaremos más de tolo que nos arrodia al dir más sobraos. Per otru llau, ye importante saber orientase, tener un bon conocimientu al traviés de mapes del trazáu de la ruta, bona información de varios llugares (nun toos son fiables) y usu de brúxula y GPS a poder ser.

Aparte d'estes recomendaciones, lo meyor ye entamar por rutes cencielles, con información y percorríu claros, bien indicaos hasta dir ganando esperiencia nel monte. Nun se pue querer xubir al Torre Cerréu a la tercer ruta de monte de la nuesa vida. Hai que llevar una progresión sele y un deprendimientu personal afayaizu pa tal actividá. Por último, si tenemos priesa por facer coses difíciles pal nivel que tenemos, lo meyor ye dir guiaos por dalguien con muncha esperiencia; y si ye un guía tituláu, meyor que meyor.

¿Deberíen averase más estes práutiques deportives a los escolinos?

Creo que sí, pero, como yá dixi, ye necesario que seya siempre con seguridá y si pue ser con un guía qu'acompañe a los maestros, muncho meyor. N'Asturies hai infinidá de bones rutes que facer con escolinos y munchísimo que deprender de xente formao: dende botánica, fauna a mediu ambiente... En definitiva, conocer Asturies.

Un camientu de mio ye que pa llevar neñes y neños al monte faénse les rutes más masificaes, más nomaes, y munches d'elles pudieren ser rutes más peligroses que si facemos ascensiones cencielles. Les nomaes foces d'equí o d'allá, suelen ser percorríos encaxonaos, nes que les posibles cayíes de peñes por mor del pasu d'animales –cabres, robezos... – ye dalgo davezu, y n'ascensiones curties dende puertos a montes con mui bones vistes nun suel haber dengún peligru pa llevar neños, siendo munches vegaes per pistes o senderos en mui bon estáu.

¿Qué aspeutos positivos tienen estos deportes?

Dicía Xovellanos qu'hai xentes que son forasteres nel so propiu país, porque nunca s'ocuparon de conocelu. Pues paezme a min que nun hai mayor aspeutu positivu que conocer el too país y aprecialu. Si unos rapacinos con dalguna salida del colexu descubren un pocu más les ayalgues que tenemos n'Asturies en forma de paisaxes, podrán dicir a sos pas que salgan del chigre na ciudá y que los lleven a conocer un pelín más el so país. Con esto quiero dicir que tenemos más xente foriato pel monte caleyando que d'equí. Nun sé si foi casualidá, pero na mió visita última al refuxu de Vega d'Urriellu, sacante los guardas, yera l'únicu asturianu... Coses que pasen nesti país.

¿Ye importante la organización d’eventos como’l Mundial d’Escalada pa la so difusión ente la población?

Sí, ye perimportante. Ye un honor tener el Mundial en Xixón, pero camiento que se-y dio poca difusión pente la población. Con un campionatu del Mundu coles mayores figures presentes, que nun se llevase munchos de los díes más qu'un requexu nos periódicos llocales ye bien triste. Yá nun digamos la televisión autonómica, que tuvo presente lo xusto y sacaba namái unos segundos al final del bloque de noticies. Pero bono, supongo que los deportes minoritarios ye lo que tienen: son menos importantes que si a tal o cuál xugador del Sporting o Uviéu duel-y un calcañu.

D'otra miente, tengo que dar la norabona al Ayuntamientu Xixón col montaxe que fizo nos campionatos estatales d'Escalada de Dificultá, montando'l rocódromu na Plaza Mayor, lo que ye espeutacular. Amás, tuvo un ésitu rotundu cola plaza enllena los díes que se fizo, dando una difusión d'esti deporte perbona.

¿Asturies ye un referente mundial nel montañismu y la escalada?

Home, pues nun se bien que dicir. Asturies casi nun ye referente de nada nesta vida y nin siquiera'l monte asturiano ye una referencia pa los mesmos asturianos. De xuru, qu'hai xente asturiano que salió a caleyar más nuna visita a Pirineos que per Asturies y eso ye bien triste. Siempre digo que si los vascos tuvieren los montes asturianos, seríen un auténticu referente de turismu deportivu, cultural, gastronómicu... Pero cuando un pueblu nun se quier lo suficiente y nun sabe vendese, pues tenemos lo que tenemos. La creyencia que lo de fuera siempre ye meyor que lo d'equí y lo que nos toca yer sufrir feries d'Abril y demás fataes.

Por suerte, fuera apréciase lo que tenemos n'Asturies y poquín a pocu, gracies munches vegaes a xente foriato, como los hermanos Pou, faense actividaes de renome mundial qu'atraen a escaladores a los nuesos Picos. Pero bono, Picos ye Picos y ye una auténtica maraviya. Quiciás echo un pelín en falta qu'escaladores deportivos s’asítien n'Asturies pa tastiar la bonísima peña calizo que tenemos.

Falábemos de les competiciones d'escalada que tuviemos en Xixón. Qué meyor oportunidá de promocionar los conceyos más nomaos na escalada deportiva que convidando a los participantes a pasar unos díes nes nueses escueles, pero como siempre paez que nun tenemos a naide al volante n'Asturies. Pese a esto, sí ye cierto, que cada añu se ve más xente estranxero de monte per Asturies y eso ye una perbona noticia.

¿Ta cuidáu’l monte asturianu?

Non, y menos que va tar col pasu los años. Les polítiques de los gobiernos asturianos tán vaciando les fasteres occidental y oriental d'Asturies, queriendo metenos a toos a vivir nel centru. Con esta política de cero aides pa que la xente siga viviendo nos pueblos, desaparecerá la ganadería y l'agricultura, quedando'l monte estráu de broza. Con ello, perderánse les siendes y caminos pelos que los montañeros o turistes conocíen, esfrutaben y daben riqueza tamién a los pueblos que visitaben.

Tengo un collaciu que siempre dixo ‘Asturies, Paraísu Matorral’ y tenía bona razón. Si'l monte nun se cuida, nun se caltienen los praos y los mayaos, con quemes controlaes, el monte va ganado tarrén y piérdese dafechu.

¿Cómo ye l’usu del asturianu y la toponimia ente los montañeros asturianos?

El coleutivu de montañeros representáu pola Fempa fai bien pocu pol asturianu. Ye más, paezme que torga l'usu normal de la llingua pa colos temes del monte asturiano. Parte del mio trabayu col blogue ye intentar de caltener, na midida lo posible, los nomes tradicionales de montes, mayaos, cumales... Y ye una tarea perdifícil cuando la mayoría d'esi coleutivu ye favoratible a camudar nomes: d'Urriellu a Urriello, de Pienzu a Pienzo, cuando nun son del Naranjo de Bulnes o el You Santo envede Ḥou Santu.

Al mi mou de ver, ensin falar de los organismos de xestión de Parques Naturales y ayuntamientos, que suelen ser contrarios al usu de la llingua nos cartelos poniendo nomes de cumales mal y otros erros importantes, el coleutivu montañeru sacante delles escepciones nun fai nengún favor a la llingua asturiana. Ún de los casos más sangrinos ye un conocíu foru de monte col nome de los nuesos Picos, onde un porcentaxe peralto d'usuarios, foriatos y asturianos, aparte de despreciar sistemáticamente l'usu de la llingua, exercíen d'auténticos talibanes pa quien la usaben o  trataben de poner un pocu de sentíu común pa cola toponimia asturiana de monte.

D'otra miente, tenemos el casu contrariu, y mui d'agradecer, del coleutivu d'espeleólogos asturianos, que lleven bien d'años trabayando pol espardimientu de los nomes tradicionales de les cavidaes qu'esploren. Nesti casu, l'usu del asturianu ye defechu sistemáticu y el nome de la federación (Federación d'Espeleoloxía del Principáu d'Asturies) y munchos de los documentos y trabayos qu'espublicen son siempre n'asturianu. 

¿Tien pensao afondar nesti campu terminolóxicu con dalgún proyeutu como pudiera ser una propuesta terminolóxica pal proyeutu TermAst?

Pel momentu nun tengo nengún proyeutu en mente, anque sedría mui bona idega axuntar al proyeutu TermAst tola terminoloxía montañera posible. De toes formes, nel intre con poner al día mi blogue yá tengo trabayu abondo pa una temporadina, anque me prestaría dalgún día espublizar un llibru con rutes a montes d'Asturies.

En pocos díes va celebrase la Selmana Internacional de Montaña de Xixón. ¿Va tener protagonismu nel eventu esti pallabreru?

Pues si'l Campionatu'l Mundu d'Escalada yera una oportunidá única pa presentalo, les distintes xornaes de montaña que se celebren n'Asturies pudiera ser perfeutu pa dalo a conocer un puquiñín más. Espero que sea asina y volvamos a mete-y un emburrión al Pallabreru del Monte y la Escalada, dando la oportunidá a más xente de facese con esti pallabreru del Monte y la Escalada.

Na semeya, Alcoceba en Torre Coello (Cabrales).

Contador Estadistiques