Aitor García Corte: “La oficialidá traxo dignidá a los yerbatos y yerbates”

|
Aitor García Corte

L’alcalde de Bimenes, Aitor García Corte (Xixón, 1980), pasó recién l’ecuador de la llexislatura. Nestos dos años al frente de la Casa Conceyu, a la que llegó baxo les sigles del PAS, tuvo’l retu de controlar la deuda heredada y dio avances na normalización del idioma cola declaración d'oficialidá y l’aprobación de la ordenanza d’asturianu.

Un añu depués de la declaración de la oficialidá llega la ordenanza d’asturianu. ¿Qué supón esti documentu pal conceyu?

La ordenanza d’usu vien a plasmar nun documentu lo que yá se vien faciendo cuantayá. Nun inventamos nada nuevo: ye da-y un calter oficial a la forma de comunicase coles alministraciones.

La declaración del 1997 foi recurrida nos tribunales y anulada. Sicasí, nesta ocasión nun hebo nengún problema cola so aprobación.

De momento non. El casu ye que tantes vegaes como seya anulada, tantes vegaes que la volveremos a declarar. Ye un drechu y vamos lluchar pola so reconocencia.

¿La oficialidá traxo consigo un mayor usu del idioma por parte de los yerbatos y yerbates?

La oficialidá traxo dignidá. La xente que lo fala agora ye la que lo falaba enantes. Fálalo’l que quier con total llibertá, lo mesmo que’l que nun quier nun lo fala. Trátase d’eso.

¿Cómo ta la vitalidá del asturianu nel conceyu?

Mui bien. L’asturianu ta presente a diario na vida de yerbatos y yerbates y nadie nun s’asusta nin s’avergoña d’ello. Nun hai meyor cosa pa da-y normalidá a daqué qu’eso: facelo o usalo ‘normal’.

Esti añu, na Fiesta de la Oficialidá, estrecharon un poco más l’hermanamientu con Miranda de l Douro dando-y a la Plaza de la Casa Conceyu’l nome d’esti territoriu.

Cuando se declaró la oficialidá nel 97, surdió una propuesta d’Andecha Astur pa entamar un hermanamientu con un pueblu portugués que taba intentado normalizar el so idioma (mirandés) y que yera una variedá llingüística del asturianu. Entámaronse los contautos y nel añu 99 facíase efeutivu l’hermanamientu que sigue vive anguaño. Ye importante destacar que nel añu 98 el mirandés algamó el calter d’oficial.

La carpa de la folixa volvió a quedar pequeña.

Ye una folixa mui afayadiza, pero sigo echando en falta a toda esa xente que defenden Asturies y l’asturianu. ¿Ónde Tan? ¿Acaso nun ye’l sitiu aparente pa vindicar lo nueso?

Yá lleva la metá de la llexislatura percorrida. ¿Qué balance fai d’estos dos años?

Foron dos años de munchu trabayu y munchu sacrificiu. Tenemos una deuda pergrande, pero tenemos más voluntá qu’otra cosa. Consiguimos dar estabilidá a la situación económica y consiguimos abrir el conceyu al mundu. Dientro poco daremos a conocer resultaos d’estos dos años de llexislatura.

Atopó munches dificultaes pola deuda arrastrada pol Conceyu.

Estos díes tovía s’asoleyaben los datos de la deuda de los conceyos asturianos. Nestos momentos la deuda (bancaria) por habitante ye de 260 euros, lo que se traduz nuna deuda viva del 37 por cientu del presupuestu municipal, siendo los cabezaleros de la Comarca la Sidre. Amás tamién tenemos deuda contrayida cola mancomunidá de la que dependen munchos de los servicios que tenemos, y qu’al entamu de la llexislatura ascendía a más de 212.000 euros, cifra que se remontaba al 2013. Nun añu algamamos a liquidar más de 150.000 euros.

Llueu taba la deuda con proveedores, qu’eso yera otru tema: a 29 d’avientu del 2015 –llevábamos 6 meses nel gobiernu– debíense cuasi 100.000 euros a empreses. Nun teíamos nin pa pipes, como se suel dicir.

¿Ta controlada anguaño dicha deuda?

Non sólo tenemos controlada la deuda, sinón que fuimos quien a facer un remanente positivu de 90.000 euros nel exerciciu anterior y, amás, menguamos el periodu de pagu a proveedores de cuasi 50 díes a 6. Les previsiones económiques pa los dos años que queden son buenes.

¿Cómo ta la situación de los fondos mineros que demanden al Gobiernu?

Permal. El tema la piscina fundiómos –nunca meyor dicho– y tenemos una pila proyeutos que se fexeron y nunca se remataron. En vez de valir pa lo que teníen que ser, valíen namás que pa empufar a los pueblos y encima anden engarrándose tolos grupos políticos a ver cuál ye’l que meyor defende la minería y los intereses de les cuenques. En fin…

¿Qué otros problemes tien el conceyu?

El problema que tien el conceyu vien a ser el que tienen toos, que ye’l de la perda de población y les poques perres que nos manden dende les alministraciónes autonómiques y estatales.

¿Cuáles son los oxetivos que se marca pa lo que resta de llexislatura?

La nuesa prioridá ye la de dar una estabilidá económica permanente al conceyu, y dempués, tratar de que nun desapaezan servicios básicos pa les vecines y vecinos, yá que tal y como ta la situación nun se pueden prometer coses que nun sabes si vas poder cumplir.

¿Hai alcalde pa ratu?

Depende pa qué ratu (rises).

Contador Estadistiques