‘Cai’: Los responsables de Cultura del Pricipáu deberíen colar

David Suárez ‘Cai’ ye conceyal de Cultura, Educación, Mocedá, Turismu y Política Llingüística en L.lena, conceyu onde la so formación, Bloque por Asturies, gobierna en coalición con Izquierda Xunida dende 2007.

Vamos entamar diendo pal pasáu, concretamente a estes mesmes feches pero fai cuatro años. En L.lena vivióse una especie de motín popular en respuesta a la xestión cultural que tenía l’anterior gobiernu ¿Qué mos pue cuntar d’ello?
La verdá ye que dióse un fechu insólitu, que ye que los grupos de L.lena nun podíen tocar en L.lena. Teníen que tocar siempre de baldre, nun podíen usar el teatru… y foi un poco lo que motivó esi “motín” que fizo que nos punxéremos a reflexonar qué ye lo que queríemos pa L.lena y por qué la xente del conceyu nun podía tocar equí. Ye que coses asina dante rabia, porque ye cuestión de voluntariedá; simplemente el fechu de que digan “Oye, vamos acordanos de vosotros ¿Queréis tocar? ¿Nun queréis tocar?”. Entós d’aquella pensemos qu’había que cambiar les coses, pa qu’hubiera tamién más participación de la mocedá, de la xente menos mozo, de les persones que tienen coses que facer y enseñar a los vecinos y vecines d’equí.

Anguaño usté ye’l responsable de Cultura ¿Cómo ye la situación actual?
Dende qu’entremos nel gobiernu siempre quiximos cuntar cola participación de tola xente que tenga coses que dicir, qu’haiga un foru permanente dende tolos ámbitos, non namás coles fiestes. Eso da como resultáu pues coses como Les Feries d’agora, nos que pue tocar la xente de La Pola, o se cuente con tol mundu que tea faciendo coses y que nós lo sepamos. Ta calteniéndose un diálogu permanente y continuu con tola xente que quiera aportar, facer crítiques constructives, qu’opinen cómo tien que ser la política en L.lena… intentamos cuntar con tola xente posible y creo qu’esa ye una de les banderes d’esta llexislatura, que la ciudadanía puea participar nel so propiu gobiernu directamente y indirectamente.

Los últimos fechos en cuantes a política cultural del Principáu dan a pensar que paez la coyuntura política nun ye mui bona pa un conceyal de cultura asturianista…
La verdá ye que la xente responsable de Cultura del Gobiernu Principáu d’Asturies lo que tien que facer ye colar urxentemente, porque l’apoyu que tamos teniendo ye mínimu o nulu. Si voi a términos de perres por exemplu danos más la obra social de Caxastur pa facer actividaes que lo que ye la Conseyería de Cultura.

Hai un malestar permanente, tu date cuenta qu’Asturies somos un millón d’habitantes y tien una producción cultural en tolos ámbitos terrible. A nivel lliterariu, a nivel musical, a nivel artísticu… y nun se ve. Tamién hai que partir de la base de que tolos que somos falantes de llingua asturiana paez que tamos condenaos al exiliu.

Y usté, con una visión asturianista, ¿Qué midíes ta tomando en cuantes a la xestión de cultura en L.lena?
Vamos ver, dende la Conceyalía de Cultura cuando planificamos la cuestión diéronse dos fechos. Dende’l puntu de vista de la xestión, pues xestionar cuntando colo d’equí y colo que nun ye d’equí, pero dando prioridá a lo local. Y depués el tema participativu; la cultura tien que ser participativa y no que se puea hai que da-y salida a la xente d’Asturies, a la xente de L.lena… Pesie a que les perres que tenemos pa cultura nun son toles que quixéremos, intentamos que la ciudadanía puea tener la oportunidá de ver equí espectáculos internacionales que normalmente pasen per ciudaes más grandes. Pero vamos, ensin escaecer a la xente d’equí, qu’hai que cuntar con ellos y estudiar siempre les propuestes que planteen.

Cuando una administración recorta presupuestos, normalmente los primero en retayar son les perres pa Cultura ¿Usté que diz nesti sen?
La cosa ta mala. A la par que refugo’l llabor de tola xente que ta trabayando na Conseyería de Cultura, porque nun se que tán faciendo ehí, tamién digo que ta mui bien hormigonar caleyes y facer edificios, pero tamién hai qu’invertir en cultura. La cultura xenera munchos puestos de trabayu directos y indirectos y ye importante que se tenga en cuenta. Ye un grave error que los presupuestos que primero se recorten sean los de mocedá y cultura.

Y en cuantes a la normalización llingüística ¿Cómo se viven en L.lena y qué piensa de lo que vien asocediendo? Va poco los trabayadores de Servicios de Normalización Llingüística sacaron un comunicáu protestando pola actitú de la Dirección Xeneral de Política Llingüística y pol zarru de servicios como’l de Mieres…
El de L.lena ye ún de los Servicios de Normalización Llingüística yo creo que pioneru, lleva yá siete u ocho años. Equí facemos dos tipos de normalización: la social y la institucional, intentando amás que pase per toles árees de gobiernu y toles árees sociales. Equí en L.lena nun ye un problema normalizar la llingua asturiana, porque la xente participa. El problema ye que n’Asturies los servicios n’otros conceyos se monten y se dediquen a otres funciones qu’a lo meyor nun ye la normalización de la llingua asturiana, sinón a montar fiestes y dedicase a otres coses. Amás, desafortunadamente tenemos un cargu institucional tan altu y importante como ye la Dirección Xeneral de Política Llingüística y nun se ta faciendo nada.

Fai falta una rede solvente y estable, tamién en materia llaboral. Sobre l’actual Rede de Servicios de Normalización dicir más de lo mesmu, que tán pidiendo una serie de reivindicaciones a lo llargo de tola llexislatura y nun se tán atendiendo. Yo nun se a qué se dedica la Directora Xeneral de Política Llingüística, hai inclumplimientos constantes de la toponimia y un llargu etcétera qu’amuesa la incompetencia de la Conseyería de Cultura nuna materia fundamental, porque la base de la cultura ye la llingua.

Per otru llau tamién digo que la esperiencia de L.lena ye daqué peculiar, porque equí l’usu del asturianu vese normal, ensin olvidanos de que ye la xente la qu’escueye l’idioma, equí nun hai nenguna imposición, pero hai que tener en cuenta que la llingua qu’hai que fomentar ye l’asturianu. Un exemplu que te pueo dar ye’l de la propia páxina del Ayuntamientu, que ta n’asturianu dafechu y el que quiera vela en castellanu tien que calcar na opción, yo creo que somos de los pocos Conceyos o l’únicu que facemos esto.

Y la xente del conceyu ¿Cómo responde a les polítiques de normalización?
Yo creo que bien. Hai que sacar les cabeces poco a poco. Respetando y fomentando en positivu la xente lo ve bien. Tamos sorprendíos equí, porque ye la xente los que nos piden por exemplu cartelos de rebaxes o coses asina pa la normalización. Nesi sentíu igual hasta tamos desbordaos en cuanto a que si hubiere más persones más se podía facer pola llingua asturiana, pero bono hai muncha voluntariedá per parte de la población. A mi préstame decilo, pero yo creo que L.lena ye un conceyu onde la llingua asturiana va perviviendo.

P’acabar col tema de cultura… ¿Qué propondíes pa da-y puxu en toa Asturies a les polítiques culturales?
Hai varies propuestes clares, pero una que ye clave ye crear una bona rede de cases de cultura, de teatros… onde puea haber bona programación. Notros sitios ta faciéndose; cada vez que miro pa Cataluña o pal País Vascu a nivel de conceyu tán faciendo unes polítiques culturales que plasmen a ún.

Pero caro, pa esto primero tien qu’haber un apoyu claru dende’l gobiernu d’Asturies pa que nos conceyos haiga polítiques culturales. Lo que nun podemos facer ye, por exemplu, montar una Llaboral y dexar que’l Teatru Xovellanos muerra en Xixón. Tolos conceyos tienen derechu a tener programación y eso solo pue pasar cuando haiga una bona red de programes y polítiques culturales dende l’alministración asturiana.

Pero bono, volvemos a lo mesmu. Que la situación ye llamentable. Yá te digo qu’obra social de Caxastur danos más perres que’l Gobiernu d’Asturies, lo que tenemos sal casi too de presupuestu puru y duru, y xugándotela. Ye necesariu un apueste, por tolo que te dicía enantes, que la cultura xenera puestos de trabayu y porque ye un derechu, como la vivienda y más coses básiques.

Vamos agora a asuntos rellacionaos cola formación na que milita. Bloque por Asturies y Izquierda Xunida rompieron l’alcuerdu nacional el pasáu mes de xunetu, pero en L.lena siguís col pactu de gobiernu ¿Cómo se vivió esto nel conceyu?
En principiu hubo nerviosismu, pero tampoco foi un escándalu, porque’l programa que llevemos a les elecciones y la política local nun siempre tien que ver cola política n’ámbitu asturianu. Equí les rellaciones son perbones y por unanimidá Bloque por Asturies y Izquierda Xunida decidimos seguir pel momentu xuntos hasta mayu de 2011, que ye’l compromisu qu’alcordáramos en mayu de 2007.

Tampoco queríemos tresmitir a los vecinos y vecines que’l gobiernu de L.lena taba débil, porque yera mentira. Equí nos une’l programa electoral y el compromisu que garremos cola xente’l conceyu, que punxeron la confianza en nós pa representalos y xestionar el conceyu estos cuatro años.

Va poco Francisco Javier García Valledor dixo en declaraciones que n’Izquierda Xunida hai xente que ta la espera d’esi posible nuevu proyectu asturianista, d’izquierda y ecoloxista ¿Los militantes d’Izquierda Xunida en L.lena podríen sumase?
N’Asturies ábrese un escenariu nuevu. Nun me atrevo a aventurar qué ye lo que va pasar en mayu de 2011, pero pa mí ye un escenariu esperanzador a nivel asturianu el fechu de que xente cercano por fin vayamos y trabayemos toos xuntos con vistes a cambiar les coses. En L.lena nun me atrevo a dicite si va haber un escenariu igual, habría qu’esperar, pero la intención ye poder seguir trabayando xuntos.