La selmana pasada, la CSI convocó una concentración nueva de protesta pola situación llaboral de los trabayadores de la RTPA. Óscar Vega Fuentes (Xixón, 1978) ye responsable de la seición sindical de la Corriente nel ente públicu.

¿Por qué foi la movilización última?

Movilizámonox baxo’l lema ‘Nun somos mercancía nes manes de Recursos Humanos’, inspiraos nel 15-M, pa denunciar la política llaboral de la RTPA y el fin de les represalies. Esixíamos en concreto’l piesllu del espediente abiertu a un compañeru al qu’acusen de desobedecer una orde. Trátase d’un compañeru de la seición sindical de Corriente Sindical d'Izquierda (CSI) que col so comportamientu nun fai otra cosa que poner n’entredichu les irregularidaes esistentes en cuanto a les contrataciones temporales, la non cobertura de vacantes y l’usu por parte d’empreses esternas de departamentos onde debiera trabayar personal de TPA. La llista de coses que faen que nos sintamos mercancía nun ye pequeña.
 
Ésta nun ye la primer vez que CSI convoca una protesta nesi sen. ¿Qué ye lo que ta pasando na RTPA?
 
La CSI vien denunciando, na midida de les sos posibilidaes, una política llaboral que fomenta la precariedá y los despíos, que se dan de manera principal nes contrates, onde son habituales los incumplimientos del conveniu. Tamién denunciamos la problemática estructural de la RTPA en cuanto a plantiya, onde hai un abusu nidiu nel usu de contrates y esternalizaciones. Consideramos que la estructura actual lleva a la RTPA a tener gran parte de la so plantiya necesaria cedida de manera illegal. Esiste un informe d’Inspeición de Trabayu favorable a dos trabayadores que denuncien esta situación que, de confirmarse nel xuiciu de xunetu, pue tener implicaciones sobre’l resto de compañeros que tán en condiciones iguales.

Otros dos compañeros sobre los que yá hai una sentencia firme pa que s’incorporen a la redaición d’informativos, pasáronlos al edificiu de la Productora de Programes del Principáu. Trátase d’una represalia qu’amás d’incumplir la sentencia tamién va en contra del Conveniu de TPA, que pretende esconder baxo l’alfombra un casu que cuestiona la estructura llaboral. La radio pública d’Asturies nun tien nin un solo trabayador. Ta 100 por cien esternalizada.

Poco a poco van dir xudicializando les rellaciones llaborales –como yá pasara na televisión gallega– si non se cambia esta situación. Pa nós la solución pasa por reducir el pesu de les contrates y ampliar la plantiya de RTPA. Al menos los informativos, tanto de la radio como de la televisión, deberíen de facese de forma íntegra por personal de la plantiya de RTPA. Facilitaría la eficiencia, la organización y habría menos precariedá llaboral. Miente quien afirma que sal más caro. Anque la nuesa actividá se centra más nes problemátiques llaborales, entendemos que como trabayadores d’un mediu de comunicación públicu tamién tenemos la responsabilidá de contribuyir, al traviés de la reflexón y la crítica, a que la programación de la RTPA respuenda a esi carauter de serviciu públicu. La radio y la televisión siguen siendo un mediu mui potente, con muncha capacidá d’influencia. Son fonte d’información, opinión y entretenimientu; dinamizadores culturales, económicos y creativos. Col tiempu conviértese nun archivu audiovisual p’Asturies y, en combinación con Internet, tien un potencial tovía por esplorar na llinia que yá apunta TVE. Non too ye cuestión d’audiencia, que tamién. La sociedá debe creer nella como cree na sanidá o la educación pública, y defendela como una ferramienta pa construyir una sociedá meyor. En xeneral, les televisiones públiques tán mui desacreditaes porque tán siendo utilizaes como medios propagandísticos al serviciu de los gobiernos que les controlen.
 
¿Quiénes son los responsables d’esta situación na que tán los trabayadores del ente?
 
Anque’l responsable direutu de la xestión llaboral ye Manuel Castrillo, direutor de RRHH, y tien una implicación direuta en munches maturrangues y irregularidaes que se dan na xestión llaboral de la RTPA, nun podemos escaecer que la decisión de mantener esta estructura llaboral ye política y que la RTPA depende de la Conseyería d’Alministraciones públicas que dirixe, agora en funciones, Ana Rosa Migoya. Ella ye la cara pública y responsable verdadera del asuntu.
 
¿Esiste un mieu real ente los trabayadores de la RTPA a llevantar la voz?
 
Hai munchos factores que lleven a los trabayadores, tanto de la plantiya como de la RTPA, de manera xeneralizada a la non movilización y el silenciu. Nun son factores diferentes nin ayenos a los del resto de la clase trabayadora o la sociedaá en xeneral, anque ye cierto que’l sector audiovisual ye, de forma especial, poco protestón en comparación con otros. El mieu ye ún d’ellos: a perder el trabayu, a metese en problemes y a les represalies que, de manera más o menos visible, yá produxéronse en numberoses ocasiones.
 
¿Hai dalgún tipo d’amenaza?
 
La principal amenaza, pal mio mou de ver la más grave, ye’l “nun vas a trabayar más n’Asturies”. Eso contaminalo too y ye un exemplu paradigmáticu del grau de clientelismu esistente na Alministración Pública, de soberbia y de falta de espíritu democráticu de la Direición de la RTPA. Desconocemos si esti aspeutu va camudar o non na fase política nueva que s’abre n’Asturies. Si el tipu de xestión que se fai na RTPA tuvo instalada na Alministración pública asturiana nos años últimos, a naide ha d’estraña-y el fundimientu eleutoral n’Asturies del PSOE.
 
¿Qué tán faciendo dende’l Comité d’Empresa pa cambiar esta situación?
 
Nel Comité d’Empresa, que yo presido, tán representaos cuatro sindicatos: CC OO, con dos miembros; y UXT, USO y CSI, con ún caún. Tenemos visiones y práutiques diferenciaes y non siempre ye fácil remar nel mesmu sen, o namái remar, anque tamos obligaos a entendenos y toles seiciones sindicales facemos esfuerzos pa ello. Como comité de empresa creo que tamos faciendo poco pa camudar les cosas. Tamién fáltanos esperiencia y formación, polo que nos vemos sobresaturaos ante la cantidá de problemes y irregularidaes sobre les que deberíamos tar trabayando. Añádase qu’ensin capacidá de movilización, y pol bloquéu mediáticu que sufrimos, ye mui difícil visibilizar les problemátiques y emburriar los cambios. Amás, el llabor constante a la contra de la Direición fai mui complicáu’l papel del Comité d’Empresa. Y la propia estructura de la empresa, casi entera esternalizada, facilita la desunión y l’aislamientu. Piense que la RTPA saquenla alantre más de 300 persones y, de forma llegal, el comité namái representa a unos 80. Dende la CSI echamos de menos más firmeza, más denuncies nos tribunales y una apuesta más clara a favor de movilizarse y facese ver.
 
Ún de los medios qu’usa la so seición sindical pa denunciar tolo qu’acontece na RTPA ye una páxina web.
 
Esa web ye la ferramienta d’espresión oficial de la seición sindical. Permítenos tener una presencia n’Internet, llegar a la xente que nun mira los corchos o que nun trabaya nel nuestro centru y consultar los convenios. Tamién facilita la comunicación col personal de les contrates y funciona a mou d’archivu sobre la nuesa actividá y los nuesos comunicaos. Dende últimos del 2009 colgamos yá más de 50 artículos. Sicasí, tien carencies de diseñu qu’intentamos dir meyorando.

 
¿Empeoraron les condiciones llaborales dientro la RTPA dende’l so entamu?
 
Sí, esternalizáronse departamentos. Esos trabayadores, a día de güei, tienen condiciones peores. Principiamos con sueldos mui baxos y ofreciéronos incrementos a base de complementos. Ún d’esos complementos na actualidá dexamos de cobralos, que na práutica supón un 10 por cientu. Nestos momentos tenemos amás el sueldu conxeláu. Los contratos d’interinidá mantiénense de forma irregular de manera indefinida y esisten vacantes ensin cubrir. Si un trabayador marcha o lu echen, como yá ocurrió, nun saquen convocatories públiques pa cubrir el puestu. Los xestores de la RTPA demostraron más interés en dir esmantelando lo poco público que tien la cadena que xestionarla en función a les sos necesidaes.
 
¿Cómo ye la situación nes productores?
 
Tamién empeoró. En primer llugar porque toda condición de precariedá que se mantién nel tiempu supón un empeoramientu de la calidá de vida de quien la sufre. Pero ye qu’amás los sueldos nun solo nun xubieron, sinón qu’en munchos casos baxaron y en dalgunos la tendencia foi que’l mesmo trabayu o más lu faiga menos xente. Los contratos de la RTPA coles productores viéronse recortaos y esi recorte pagáronlo los trabayadores. Ta entrando dalguna xente nuevo, recién salida de los módulos, que lo faen en peores condiciones que los que ya tán. Esa creo que será la tendencia. La ilusión y les ganas de la xente foi a menos por too esto.
 
¿Qué futuru espera-y a la RTPA nesta llexislatura?
 
El cambiu de Gobierno va trayer cambios, ensin llugar a duldes. Desonocemos de qué color serán esos cambios o si cambiarán les cosas pa que too siga igual o peor. Si Asturies quier tener una radiotelevisión pública lo que debe plantegase ye qué radiotelevisión quier, qué necesidaes tien, y xestionar en función d’eso y non d’intereses políticos. En cualquier casu, hai que dexar claro que nun tenemos mieu al casquismu. El nuesu llabor sindical na RTPA siempre foi a favor d’una radiotelevisión pública que sía útil a la sociedá y non al gobiernu de turnu, y asina va siguir siendo. Nin tuvimos nin vamos tener una posición diferente en función de quién gobierne. Siguiremos defendiendo que sía pública y que lo sía más. Respeuto a la posiblidá de privatizar del too a la RTPA, como se faló en tiempu d’eleiciones, primero tienen que cambiar la llei. 
 
¿Habrá recortes de presupuestu y de plantiya?
 
Desconocemos esi tipu de cuestiones. La Direición actual de la RTPA nestos momentos nun sabe/nun contesta. La falta d’un modelu consolidáu de RTPA y una apuesta clara a favor d’una estructura llaboral estable mantuvieron siempre les duldes sobre cuestiones determinaes. Col cambiu de Gobiernu éstes son tovía mayores. Habrá qu’esperar a que vengan les propuestes nueves pa valorales.
 
La presencia del asturiano na programación nestos momentos ye mínima. ¿Qué pasará nos cuatro años próximos cola llingua?
 
Si Cascos opta por un gobiernu de dereches populista y con tintes asturianistes, como especulen dalgunos análisis de chigre que sentí, la presencia del asturianu na RTPA a lo meyor hasta aumenta. El direutor d’Antena y Conteníos y direutor xeneral próximu nel períodu de transición, Juanjo Guerenabarrena, ye alérxicu al asturianu. La presencia de la llingua asturiana na RTPA ye una cuestión de caráuter políticu pola la presencia d’IX nel Gobiernu d’Asturies que, pa sorpresa de dalgunos, tuvo una acoyida bona ente l’audiencia. En cualquier casu, esta cuestión, como les otres que se refieren al futuru de la RTPA, son nestos momentos desconocíes pa mí.
 
¿Qué postura mantién la CSI al respeuto?
 
En términos xenerales, la CSI ye favorable a la presencia del asturianu na RTPA anque nun tenemos una postura definida y concreta. Na mio opinión creo que sería mui positiva la presencia del asturianu en programes estructurales, como los informativos o les retransmisiones deportives. Ayudaría en primer llugar a la defensa de la llingua autóctona dando fuercia al sen de serviciu públicu. Si faese de forma prudente y poco a poco, contribuiría a que la RTPA tuviera un raigón mayor y aceptación na sociedá.