El Plenu de la Xunta Xeneral decide retirar l'acta de diputáu a Ángel González

|
PSOE, IX y UPyD (un total de 21) sacaron alantre la votación del Plenu de la Xunta Xeneral de ratificación del dictame de la Cámara pa retirar l'acta de diputáu d'Ángel González (IX) pola sentencia Tribunal Superior de Xusticia d'Asturies –tovía nun ye firme– que lu condena a siete años d'inhabilitación por prevaricación alministrativa al fraicionar unos contratos nel procesu d'axudicación de les obres d'instalación d'unos monolitos que marquen foses comunes de la Guerra Civil nel país. Por contra, el PP y Foro (un total de 21 votos) astuviéronse na votación, los populares por nun tar conformes con que fuera'l Plenu'l que tomara esa decisión –entendíen que debería ser IX el que retirara l'acta a González–, y los foristes pol fechu de que la sentencia nun ye tovía firme.
 
González dispuso de trés minutos enantes de la votación pa defender la so situación, intervención que s'allargó hasta los siete na qu'aprovechó pa reclamar la so inocencia y p'agradecer l'apoyu que recibió hasta'l momentu. L'ex voceru de la coalición na Xunta Xeneral anunció que va llevar l'alcuerdu plenariu al Constitucional. Mentes too se resuelve, va volver al so puestu de maestru nel xixonés Colexu Públicu El Lloréu.
 
 
 
 
Contador Estadistiques