El PAS critica la postura del PP con respeuto a la materia de Llingua Asturiana en Primaria

El Partíu Asturianista (PAS) cargó nun comunicáu contra "la campaña del PP contra la presencia del asturianu nos primeros niveles de la enseñanza", lo que pa la formación ye "una amuesa más del so señoritismu, madrilanismu y de la so actitú permanentemente contraria a la cultura y la identidá asturiana". D'igual forma, llamenta que "namái nuna ocasión, la del Gobiernu de Marqués", éstes "alcontraren comprensión" dientro del PP.

 

Por último, apoya la postura del Gobiernu del país y recuerda que la presencia de la Llingua Asturiana nel sistema educativu "nun ye más que'l cumplimientu de la Llei d’Usu y Promoción del Asturianu, que nosotros impulsamos nel so día", pa darréu calificar de "miserables a toos aquellos sindicatos y partíos que, llamándose asturianistes, silencien una y otra vegada que foi del PAS el puxu, l'autoría y la capacidá de negociación pa qu'anguaño esista'l nuesu soporte llegal únicu, la citada Llei d’Usu y Promoción del Asturianu".