'El gran teatru del mundu' de RPA emite la primer parte de la versión asturiana del clásicu 'La guerra de los mundos'

La más conocida producción de radioteatru de la historia, 'La guerra de los mundos' –basada na obra d'Herbert George Wells–, va poder disfrutase n'asturianu de la mano del programa de RPA 'El gran teatru del mundu', que dirixe Dolfo Camilo Díaz. Mañana, a les 22 hores, va emitise la primer parte d'esta historia cola qu'Orson Wells aterrorizó nel 1938 a Estaos Xuníos con una supuesta invasión estraterrestre.

 

Na versión asturiana de 'La guerra de los mundos', la historia trescurre n'Asturies n'actualidá y xente bien conocío como Xune Elipe, Camilo Sousa, Alberto Vecino o'l vicealcalde de Corvera, Iván Fernández, faen d'ellos mesmos rellatando la invasión. "La ironía ta mui presente, nun xueu hiperrealista enllenu de guiños a l'actualidá", esplica Camilo Díaz.

 

Tres la emisión de la primer obra, va completase'l programa con una entrevista a los actores Antón Caamaño, Silvino Torres y Sonia Santos, que tamién participen en 'La guerra de los mundos' xunto con otros actores de la escena asturiana.