La sociedá asturiana sal a la cai esti miércoles pa defender La Madreña

L'orde de desallugu inminente del Centru Social Okupáu Autoxestionáu La Madreña dictáu pola 'Audiencia Provincial' tres el recursu de la Fiscalía y la constructora Sedes, propietaria del edificiu que sirvió de sede de la Conseyería de Salú, a la sentencia del Xulgáu d'Instrucción númberu 1 d'Uviéu, ta provocando una importante reaición social. Esta tarde, a les 20 hores, ta prevista una manifestación multitudinaria en sofitu a esta iniciativa que lleva dos años dinamizando'l barriu y Uviéu con actividaes culturales y sociales. 

 

La salida de la marcha va tener llugar del propiu CSOA La Madreña y cuenta col sofitu de múltiples coleutivos y formaciones, como 'Reciella. Families pol Asturianu', la Xunta pola Defensa de la Llingua Asturiana, Conceyu Abiertu o Darréu, ente otros. Inclusive, los bomberos yá anunciaron que nun van participar nel desallugu.