Particiones

Cuando mercamos un discu duru internu vien ensin particiones, esto ye, el sistema operativu nel que lu vaigamos a instalar nun identifica nengún sistema d'archivos nin unidá (falamos de 'software') válida hasta que la creemos. Una cuestión que munches vegaes resulta confusa pal que nun ta avezáu ye que tolos discos tienen que tener siquier una partición y un sistema d'archivos.

Tolos discos duros tienen que tener dos niveles d'organización

El primer nivel ye la organización de les particiones. Hasta agora utilizábase (vamos cinxinos a Windows) el sistema MBR (Master Boot Record), pero cola apaición del sistema UEFI y d'unidaes de discu cada vez más grandes, esti sistema vese llindáu. Concretamente MBR sólo dexa hasta 2TB na capa de datos de la tabla de particionen. Tamién llinda a 4 el númberu de particiones primaries nuna unidá (pero a priori eso ye menos importante; pa eso esisten les particiones estendíes) y ye ende onde'l GPT (GUID Partition Table) fai actu de presencia, pa saltase eses llimitaciones.

Una vegada creamos la tabla de particiones (MBR o GPT) y diximos-y al nuesu sistema qu'esto ye una unidá a la que-y va a asignar una lletra, toca indicar qué tipu sistema d'archivos (el segundu nivel) va tener dicha partición. En sistemes operativos antiguos (nun vamos dir bien llueñe) utilízase mayoritariamente FAT32, que por temes de compatibilidá ye nel que por casu vienen formateaos los pendrives. Recordamos que les particiones con sistema d'archivos FAT32 tien una llimitación de tamañu d'archivu en 4GB, colo que lo aconseyable ye usar NTFS.

Si adquirís un discu duru esternu, lo más habitual ye que venga formatiáu en NTFS, lo que plantega un problema si queremos utilizalu nun sistema MacOs: o lu convertimos a FAT32 pa que MacOS puede lleer y escribir, o lo formatiamos cola mesma utilidá de discos del sistema, esto ye facer incompatible con Windows, colo que tendremos d'utilizar la primer opción o instalar aplicaciones de terceros, como'l Tuxera para Mac. 

En Linux esisten les ext(n), a les que-yos dedicaremos otru cuadernu con esti tema.

Y a lo último, encamentavos una utilidá gratuita pa crear y formatiar les nueses particiones, como siempres de baldre: Easeus Partition Master

P.D. Curiáu colo que faéis coles vueses particiones y realizái siempres una copia de seguridá enantes de caciplar coles mesmes...

Estos cuadernos téunicos tan redactaos por Jose Zeliq, responsable de Nexus 7 informática.