Controlando l'estrés del equipu

Una manera de comprobar el rendimientu y l'estabilidá del nuesu equipu ye'l 'estrés'; non el de nueso, el d'él. Esisten munchos programes que s'encarguen d'estresar al nuesu equipu cola fin de comprobar si'l sistema ye estable. Dalgunos son más específicos y estresen solo una parte del nuesu hardware (de normal suelen ser más eficientes). Nel nuesu cuadernu d'esta selmana encamentámosvos dalgunos:

• Heavyload déxanos comprobar la estabilidá xeneral del nuesu equipu, magar la parte gráfica ye un pocu probe.
• De la mano de la conocida (nel ámbitu técnicu) Passmark tenemos la utilidá Burnintest que ye más completa que Heavyload, pero de pagu.
• Depués yá centrándonos en componentes específicos, tenemos soluciones como Furmark, qu'analiza la estabilidá y estresa la nuesa tarxeta gráfica.
• O por exemplu Prime95 pal casu del microprocesador...

Sía que non, estes utilidaes tienen d'utilizase con munchu procuru y hai que saber interpretar correchamente los datos que nos apurren. Sobretou xixilái les temperatures de los componentes mientres les probemos; como yá falamos n'otru cuadernu técnicu d'ello nun vamos entrar en más detalles. Una xubida escesiva de les mesmes puede traer daños irreparables. Alvertíos quedáis.

Estos cuadernos téunicos tan redactaos por Jose Zeliq, responsable de Nexus 7 informática.