Padre Pepe o l'asturianu de corazón solidariu

Pepe o'l Padre Pérez ye una d'eses persones que nun te dexa indiferente una vez que lu conoces y trates. Ye ún d'esos pocos seres humanos que, al igual que la Madre Teresa o'l Padre Vicente Ferrer, asumieron que'l so compromisu relixosu na vida pasa por ayudar y acompañar a los más necesitaos de los necesitaos. Nesti casu, y dende hai más de mediu sieglu, a los neños y neñes más desfavorecíos de Colombia. Ye'l fiel reflexu de daquién que trabaya de forma incansable dende les dos orielles d'un mar de solidaridá y fonda hermandá astur-americana.

Asturianu de les tierres altes del ríu Narcea, la so figura fuerte y la so mirada tan firme como sele confirmen que tamos énte una persona bien distinta a les demás y que, con más de 90 años a los sos llombos, atesora entá la vitalidá y l'enerxía que munchos mozos de 30 yá quixeren pa sí.

El Padre Pérez ye un home qu'escribe día ente día, cavilga, piensa, dicta cursos y pon charres…Dona sabiduría. “Una páxina, una idea”, diznos mientres nos enseña los sos escritos y los sos asuntos qu'abarquen el ser humanu, el lideralgu social. “Un yo-yo nunca pue ser bon líder”, afirma, “el bon líder tien de ser tresparente y facese d'un equipu de verdaderos amigos”.

Llegáu a Llatinoamérica –Arxentina primero y Colombia, depués– por un espíritu d'aventura misionera p'atopase a sí mesmu depués d'una mocedá como sacerdote en dos bucóliques parroquies asturianes del conceyu de Grau, y una “más que formativa esperiencia de penetración na vida de los homes tan horrible como maraviyosa” tres el so pasu como capellán de la novena bandera de la Lexón del exércitu español nel Sáḥara, la so presencia en tierres colombianes asitiáronlu profesionalmente nel centru de la vida humana y espiritual d'ún de los inxenios azucreros más importantes de Colombia, fundáu polos descendientes d'otru asturianu d'Uviéu, Modestu Cabal Galindo, como responsable de recursu humanu y capellán del inxeniu, onde desenvolvió la so idea cume. Nel 1961 Ingenio Providencia S. A., col propósitu de brindar una educación calidable a los fíos de los sos trabayadores, punxo en marcha so la so lúcida idea, la más grande obra social con que güei cuenta entá'l sector azucreru en Colombia: el Centro de Formación Integral Providencia.

Pal desenvolvimientu d'esti proyeutu la empresa destinó ocho hectárees de tierra n'El Cerrito, a 47 quilómetros de Santiago de Cali y na ribera oriental del ríu Cauca, onde funciona dende entós esti gran centru, que cuenta con salones dotaos, según la necesidá de los estudiantes, d'educación básica, teunolóxica y universitaria; sales de sistemes; llaboratorios; comedor; biblioteca; canches deportives; piscina; auditoriu; taller de confeición y industriales; y árees d'esparcimientu y descansu. 

Construyíu coles mesmes manos y el sudu de los trabayadores y corteros de caña, acompañaos na xera diaria como unu más pol Padre Pepe, trátase d'un monumentu al progresu socio-educativu y a la dignidá humana.

“Sostuvi –hasta la neciura– qu'esti centru debía de ser un centru de formación de líderes y d'autoxestión”, afirma.

“El broche d'oru de la formación d'un centru educativu son les rellaiciones humanes, la parte formativa que-y apunte al lideralgu. Insistí muncho en que'l lideralgu tien de ser el broche d'oru de la formación de les persones pa construyir ente toos un mundu meyor”. 

Col tiempu tamién punxo en marcha la idea y dio'l nome d'Uviéu (n'alcordanza a la capital d'Asturies) y El Carmen (como recuerdu al nome de la so madre) a dos barriaes populares na redolada d'Amaime pa dotar d'una vivienda digna y autosustentable –con patiu y güerta– a munchos de los trabayadores de la empresa y del llugar. 

Dende entós, y cola ayuda de munchos otros colombianos y españoles, creó tamién la Fundación Padrinos Asturianos, nes sos palabres “una asociación de persones de corazón solidariu qu'intenta convertir en persones de bien, y no posible en líderes de desenvolvimientu y paz al traviés d'una formación integral, a tolos neños más necesitaos y desamparaos qu'apadrina en Colombia”. “Un neñu, una causa” ye'l so lema.

Con sedes permanentes en Santiago de Cali (Valle, Colombia), Uviéu (Asturies, España) y Orlando (Florida, Estaos Xuníos), les xuntes direutives de Padrinos Asturianos tán conformaes por profesionales voluntarios que quieren apotar les sos pervalibles conocencies y esperiencies a una causa noble, grande y bona.

La base fundamental del desenvolvimientu social y humanu y de la paz ta na mente humana. Cultivala ye obligación de los gobiernos y de toos… ¿Qué serán mañana los neños qu'hai en Colombia con fame y ensin escuela? ¿Van ser axentes de paz o de violencia? Toos podemos echar un gabitu pa poder facer frente al problema de los neños desamparaos, afirma en munchos de los sos escritos y conversaciones.

La constitución d'una Red de Amigos de Padrinos Asturianos o la idea de la creación d'un pebidal de Jóvenes Líderes de Padrinos Asturianos en Colombia son munches de les idees que caltienen viva la llama de la mente y l'espíritu d'esti home de calter tan cenciellu como inmensu y que ye xusto y necesario tener siempre presente y divulgar.