Presentación en Blimea del llibru “Mael al debalu” de Sidoro Villa

L’escritor y dibuxante Sidoro Villa Costales presenta’l próximu miércoles 24 de payares a les 7 de la tarde na Casona del Bravial de Blimea’l so últimu llibru tituláu “Mael al debalu”. Nel actu va tar acompañáu por Gema Suárez Torre, conceyala de cultura de Samartín del Rei Aurelio, y por Hugo Cortina Fanjul, responsable de la oficina de normalización llingüística del mentáu conceyu.

“Mael al debalu” ye un llibru que ta dirixíu al públicu infantil y xuvenil y que cuenta les aventures d’un mozu que va pela mar viaxando nun sofá que quedó al debalu cuando lu tresportaba col so güelu nuna barca pa llevalu de Xixón a Llastres. El llibru ta escritu en clave d’humor, y tien numberoses referencies a clásicos de la lliteratura universal rellacionada cola mar, como “Moby Dick” o “La islla del tesoru”, ente otros. Sidoro Villa tien tamién espublizaos anteriormente otros llibros, como  “Nun-yos tengas perceguera” o’l “Llibru de los suaños”

Esta presentación inxértase dientro de les IX xornaes de lliteratura infantil y xuvenil entamaes dende les conceyalíes de cultura y educación del conceyu de Samartín, qu’esti añu cuenten amás cola collaboración de la oficina de normalización llingüística, que yá la selmana pasada acoyó la presentación del llibru infantil “Mansín” de Carla Menéndez Fernández.