Presentación de “Intentu d’escritura” de Xurde Fernández en Candás

L'escritor candasín Xurde Fernández presenta esti xueves, 23 d'avientu, 'Intentu d'escritura', una novela negra qu'ofrez una güeyada orixinal sobre l'exerciciu de la lliteratura, y el paralelismu ente'l propiu autor y los personaxes y situaciones que crea nes sos histories.
  
El pub Creisi de Candás acoyerá a partir de les 19.00 hores l'actu de presentación de la obra, que contará cola intervención de los tamién escritores Silvia Cosio y Xandru Fernández, repesentantes de Suburbia, editorial cola que sal esta novela. L'establecimientu candasín, del que Fernández ye veceru avezáu, valió-y d'inspiración pa crear delles situaciones na novela.
  
'Intentu d'escritura' cuenta la historia d'un escritor que necesita perres, porque ta nuna situación abogiante, tanto personal como profesional, y decide escribir una novela negra. Narra entós la perspectiva de cómo escribe, y de la novela que crea. El llector percibe asina dos histories paraleles, la del autor y la de la propia historia.
  
El protagonista escribe una historia sobre un crime y toles circunstancies que lu arrodien. Paralelamente, necesita alcontrar a la editora pa que-y adelante algún fondu pa beber, pues sólo pue escribir cuando bebe.
  
Fernández inspiróse nun cuento cortu d'él mesmu sobre  los agobios del escritor cuando nun ye a escribir. Además, señaló que siempre-y llamó l'atención "lo negro", lliterariamente falando. Sicasí, matizó que la historia nun ye autobiográfica, porque "nun necesito beber pa escribir, nin vivo de la escritura", pero reconoció que sí hai ciertes conexones cola so historia real.