Espaciu y Tiempu de la Llingua Asturiana

Manuel Arias García. "Antón de la Braña"

Manuel Arias García. "Antón de la Braña"
Nacimientu: 
1913
Muerte: 
1986
Obres disponibles: 

Conocíu popularmente como Antón de la Braña, Manuel Arias García nació en Courias, Pravia, en 1913. Fexo los estudios de Maxisteriu y n’acabándolos exerció de maestru en Llaviu, nel conceyu de Salas. Ye autor de dellos llibros de testu escolares. Colaboró en publicaciones relacionaes cola enseñanza como Revista escolar d’Uviéu y El Magisterio Nacional de Madrid, asina como n’otres de calter xeneral de dientro y fuera d’Asturies como Renovación, La Voz del labrador o Luz. Nestes últimes publica diversos cuentos curtios y poesíes n’asturiano.

   Como autor na nuestra llingua y baxo l’alcuñu d’Antón de la Braña va escribir dos de les obres más populares del teatru costumista asturianu d’esti sieglu: Xuiciu faltes y Un arreglu inesperáu (publicáu en 1950). Entrambes pieces, qu’inda se siguen a representar con ésitu pelos escenarios d’Asturies, utilicen ún de los argumentos preferíos del teatru costumista, el del pleitu: esti tema da pie a una contraposición ente’l mundu rural y el mundu urbanu, representaos na escena por un personaxe d’aldea d’una banda y por un xuez y un abogáu de la otra. La Compañía Asturiana de Comedies recueye les obres d’Antón de la Braña nun sitiu preferente del so repertoriu a lo llargo de tola postguerra. En 1960 apaez el volume tituláu Teatro asturiano, onde recueye cuatro pieces: El adiós de la quintana, Un xuiciu faltes, Pitición de mano y La última rosa.

   Manuel Antonio Arias fue miembru del I.D.E.A. Morrió n’Uviéu en 1986.

Noticies
Deprendi Asturianu
La Llingua Asturiana
Archivu oral
Proyectu Caveda y Nava

Cola ayuda de

Coneyería d'Educación y Cultura

Espaciu y Tiempu de la Llingua Asturiana
--Araz.net, © 2010. Tolos derechos reservaos.
Contador Estadistiques