Nació nel Carbayéu, Avilés, nel añu 1913. Fexo la guerra civil col bandu republicanu y por mor d’ello tuvo presu y condenáu a muerte. Según Carmen Díaz Castañón estrenóse como autor n’asturiano en 1968, con motivu de les Fiestes del Bollu d’Avilés. El so primer llibru publícólu en 1973 y lleva’l títulu de Xente y barrios d’Avilés; a ésti van siguir Coses y cosadielles (1975) y Cantando a Asturies (1976). En toos ellos Guardado practica un tipu de poesía de rima fácil y tastu popular, que lu entronca cola fargatada d’autores de versos d’esa clase que hebo nos años anteriores al Surdimientu. En 1976 da a imprenta un llibru, Más espines que roses, que por diverses circunstancies nun pudo ver la so publicación hasta 1992, diez años depués de la muerte del autor. Nesti llibru, Bernardo Guardado, ruempe cola tradición populista na qu’hasta entós s’escribía y ensaya una poesía na que’l lirismu, lo moral y la señaldá son les exes sobre les que s’articula un poema más curiáu no formal —anque arreyáu casi siempre a la forma del romance, como na mayoría de los sos versos— y nel que se busca una complicidá non sólo estética, sinón tamién ética del llector. El sacerdote y tamién poeta, José Manuel Feito, nel prólogu escritu en 1976 a lo que tenía de ser la edición de Más espines que roses, sentencia rotundu: “Si el poema en bable va en serio, empieza a haber poesía”.

Bernardo Guardado morrió n’Avilés en 1982.