Militante socialista, entama la xera lliteraria escribiendo unos encesos artículos contra la esplotación del obreru n'El Comecio y los periódicos obreristes La Defensa del Obrero y La Organización. A resultes d’ello vese obligáu a marchar una temporadina pa un taller de Llangréu. Dende aquella, yá casáu y coles esmoliciones propies del padre mantenedor de familia, Pachín de Melás va dexar a un llau el rixu reivindicativu y dedicase más que nada a les aficiones musicales, teatrales y lliteraries.

  En 1904 gana’l segundu premiu d’un Certame Científicu-Lliterariu (el primeru ganólu Pepín de Pría) col romance “La güelina”. D’ellí p’alantre participa en más concursos, escribe y estrena sainetes y zarzueles y sigue collaborando nos periódicos. En 1909 publica el volume de relatos Les veyures de Pinón.

   Anque ta bastante delicáu de salú, pasu ente pasu va faciéndose Pachín de Melás un activu entamador d’iniciatives asturianistes, talo que los ambiciosos proyectos editoriales de la Biblioteca Popular d’Escritores Asturianos (1918) y la colección “La novela asturiana”. A elles hai que sumar l’homenaxe a Pepín de Pría de 1926, esaltaciones xovellanistes y, cola República, la demanda d’un estatutu d’autonomía p’Asturies.

   Un fechu emotivu na biografía de Pachín de Melás relátalu Patricio Aduriz y pasó cuando la guerra, de la que diben a prende-y fueu a la Ilesia de San Pedru de Xixón, onde se guardaben los restos de Xovellanos. El propiu autor, con 59 años y gastando mui mala salú, fue'l que, ayudáu por municipales, fue a poner a salvu lo que quedaba del prócer ilustráu. Al poco, presu de los nacionales, Emilio Robles Muñiz morría na cárcel del Coto de Xixón.