Nació en Navia nel añu 1900. Estudia medicina, especializándose en Pediatría. Dende bien rapaz siéntese atraíu pola cultura tradicional asturiana y por toa clase de llibros y publicaciones que tuvieren Asturies y lo asturiano por tema; a lo llargo de la so vida llegó a xuntar la biblioteca de llibros y manuscritos asturianos más importante d’esti sieglu. La colección fue donada a la so muerte a la Biblioteca d’Asturies y convirtióse dende entós nuna fonte inescosable de sorpreses pa los investigadores bibliográficos y lliterarios.

Atraíu tamién pola poesía humorística en llingua asturiana del sieglu XIX, compunxo sinfinidá de versos asonsañando l’estilu xocosu de Teodoro Cuesta y otros autores. El so primer llibru: Cuentiquinos del escañu, apaecíu en 1945, gozó d’una amplia popularidá. En 1953 publica Melecina casera (cuentos médicos en dialecto asturiano. El so últimu llibru de versos vio la lluz en 1978 col títulu: Más cuentiquinos del escañu. Ye autor tamién d’un Diccionario bable de la rima impresu en 1947 que, como señala Antón García (1994) “fue l’instrumentu principal de los nuevos poetes asturianos”. Fexo tamién dellos estudios d’investigación sobre variaos temes asturianos como la obra de Teodoro Cuesta o la hestoria de la imprenta n’Uviéu. Morrió n’Uviéu en 1985.