Espaciu y Tiempu de la Llingua Asturiana

Bernardo Acevedo y Huelves

Bernardo Acevedo y Huelves
Nacimientu: 
1849
Muerte: 
1920

Naz Acevedo y Huelves en Bual en 1849. Depués de cursar estudios de Derecho, nomáronlu abogáu del Estáu, que fuera a ser el so llabor profesional a lo llargo de cuarenta años. Finaron los sos díes n’Uviéu un 7 de setiembre de 1920.  

Pero, arriendes del trabayu de toga, alcontró espaciu tamién Acevedo pa entamar abondes xeres culturales: escribió poesíes en castelleno y n’asturiano, dirixó la edición d’obres ayenes (como Poesías asturianas de Teodoro Cuesta), investigó sobre’l so conceyu, sobre los vaqueiros, trabayó sobre’l folclor... Fue miembru de les Academies de la “Historia” y de la “Lengua” y collaboró a modu na mayoría de los periódicos del so tiempu: El Eco de Asturias, El Carbayón, El Nalón, etc.

   La so obra poética, qu’elli nun llegó a recoyer en llibru, tenía, ensin embargu, munchu predicamentu ente los sos contemporanios, polo qu’algamó dalgunos premios, comu’l de los Xuegos Florales entamaos pola Sociedá Económica d’Amigos del País en 1883 (que tenía nel xuráu a “Clarín” y Acebal) y el Premiu de los vecinos de Puertu Veiga nos Xuegos Florales de Xixón del 6 d’agostu de 1891, de la qu'inauguraben la estatua de Xovellanos.

   Enrique García–Rendueles, qu’inxertó en Los nuevos Bablistas el poema d’Acevedo “Los últimos momentos de Jovellanos”, califícalu de “poeta tierno e inspirado y de forma limpia y correcta (...) hombre modesto y de costumbres sencillas, vivió apartado del ruido mundanal; así que como bablista podemos decir de él (...) que su crédito es de tradición oral porque muy pocos habrá que puedan citar más de cuatro o seis composiciones leídas en diferentes periódicos”.

   Por fin, en 1995, L’Academia de la Llingua Asturiana asoleyó una edición facsímil onde atropaba veintiún poesíes publicaes por Acevedo ente 1888 y 1927.

Noticies
Deprendi Asturianu
La Llingua Asturiana
Archivu oral
Proyectu Caveda y Nava
Coneyería d'Educación y Cultura
Espaciu y Tiempu de la Llingua Asturiana
--Araz.net, © 2010. Tolos derechos reservaos.
Contador Estadistiques