Los llibros de l'alcordanza

Una ausencia bultable

"Nel aniciu foi la pallabra. La fascinación de la pallabra. El neñu recibe la pallabra como daqué misteriosu pero, al tiempu, remanable, desformable, como si fuere de chicle. Enantes que l'adultu llegue coles sos normatives, diciendo l'usu correutu de cada cosa (una pallabra pa cada cosa y una cosa pa cada pallabra), el neñu xuega coles pallabres, fai d'elles material de construcción fasta l'infinitu. ¿Quién nun s'alcuerda de querer a una pallabra pola so forma, pola so guapura, pola so sonoridá, inclusu ensin conocer el so sinificáu.

El neñu, a medida que va deprendiendo pallabres, xuega con elles de manera lúdica, pol placer del ritmu y la rima. Fai amestadures como si fuere un rompecabeces, fasta que lleguen les normes, los escosamientos, los órdenes lóxicos.

Entiéndase bien, yo nun digo que nun deba adeprendese esi llinguaxe cenciellu, correutu, unívocu, común a tolos falantes y escribientes, pero xunto a esi llinguaxe-ferramienta, utilitariu, debemos tamién alendar, facer espoxigar esa pallabra máxica, esi llinguaxe creador, esa bayura del sentíu. El campu de la lliteratura fantástica, como'l de la poesía, puen ser afayadices pal placer del xuegu coles pallabres, cola llingua. Pa que'l neñu s'amieste con un mundu abiertu, nuevu, nun sólo un mundu de regles y restricciones..."

Quiero pidir perdón por dos coses. En primer llugar por aniciar con una cita tan llarga, y en segundo llugar por citame a mi mesmu. El párrafu anterior ta entesacáu d'un llargu artículu míu tituláu "L'escritor y la lliteratura infantil. L'arte de cuntar histories", espublizáu en Lletres Asturianes, nº 28, marzu de 1998. Pero vamos al migoyu de lo que quiero falar güei: xugar coles palllabres. D'esos dos campos a los que se refier la cita anterior, ún d'ellos, el de la lliteratura fantástica, ta apináu de títulos en tolos catálogos de lliteratura infantil. Abasta con pasar los güeyos por dalgún d'ellos pa comprobalo: Viaxes a paises de Gorretinos; carbayos cocoteros; fervíos máxicos pa medrar; cuélebres y homes del espaciu; vieyos grasgos, y un perllargu etcétera, pueblen les páxines de la nuestra lliteratura infant il y xuvenil, na que los distintos autores aprovechen pa inventar, nun sólo hiostories, sinón pallabres, espresiones... Too aquello que supón un xuegu col llinguaxe. Pero, ¿y la poesía?. ¿Ú ta la poesía?.

Ye curioso. Presumimos de tener una importante nueva poesía asturiana "al nivel de les meyores", matizamos, y ensin embargu, los nuestros neños y los nuestros rapazos tán huérfanos d'ella, Naide escribe poesía pa ellos.

Debe ser que nun son importantes, que nun merez la pena gastar tiempu y pallabres pa ellos. Pero la poesía, la rima, el ritmu, el xuegu de pallabres, ye dalgo que ta nel neñu dende la so más tierna edá. Xustamente dende la cuna. Yo nun sé si se seguirá faciendo, pero toi fartucu d'escuchar toes aquelles cancionines, cosadielles, fórmules pa "echar a suertes", etc. que se-yos dicíen a los neños:

Aserrín, aserrán
maderinos de San Xuan
el d'alantre cuerre muncho
el d'atrás tiense quedar
...............................

-¿Ónde tas?
-En taurete.
-¿Qué comisti?
-Manzanete.
-¿Dasme un pocu?
-Comi mocu
........................

Les cabres de Xuan Barberu
toes van per un senderu
comiendo pan de centenu.
La blanca lleva'l lloqueru
y la prieta'l cencerrón
Sopla Antón, sopla Antón.

Y asina munches más que'l tiempu y la memoria van dexando nel olvidu. A lo llargo de toos estos años de lliteratura infantil, cuasi venti, mui poques son les obres de poesía escrites arremente pa los neños. Tan poques que somos a cuntales con una mano, y sóbrennos deos. Y, ensin embargu, nun paecía que fuere asoceder asina, pues ente los tres primeros llibros asoleyaos pola Academia de la Llingua, na coleición Escolín, había xustamente uno: Poemes pa neños, d'Urbano Rodríguez, profesor del Istitutu Vega - La Camocha. Títulu que recoyemos nesta estaya como llibru pa l'alcordanza.

Poemes pa neños ye un pequeñu poemariu ( diecinueve poemes curtius) nos que, con una rima cenciella, a vegaes cuasi ensin ella, l'autor describe de forma axustada'l mundu de la ñatura, de los animales, les plantes, los árboles... Esi mundu enantes prósimu pa los rapazos,pero qu'agora, por mor de les migraciones y l'abandonu del campu a favor de la ciudá, ye cada vuelta más desconocíu. El primer poema ye, con xusticia, "Al rei sol", que preside esi mundu natural dende lo alto, aidando pa que too xorreza, pa que les estaciones s'asocedan unes a otres con regularidá y abondancia, anque la borrina, dacuando, nun lu dexe asomar. Pasen llueu, poles páxines del llibru poemes a "El regueru", "La fonte", "L'aire", "Les margarites", "El carbayu"... y tamién los animales de la biseca: "Les camparines", "Les abeyines", & quot;El raitán", "Doña Sacabera", "El perrín de Dios", "La pega pegareta"

... Son munchos los aciertos llingüísticos y poéticos d'Urbano nesti poemariu pa neños, salpicáu por espresiones afortunaes:

Aire seliquín,
falar de xanes... ("L'aire")
.........................................
Rellumos de sol
trescalen la campa... ("Les camparines")

Esguil pequeñín
paraxismeru.
ya atopó una nuez
baxu'l romeru. ("L'esguil")

Los dibuxos d'Astur Paredes tamién aíden muncho na presentación y bon fin d'esti llibru (nº 3 de la Coleición Escolín. ALLA, 1983) que merez la pena relleer con calma, ya inclusu esparder ente los munchos rapazos que nun lo llegaron a conocer. Y pa finar, vamos trescribir uno de los poemes del llibru.

Les margarites:
Cola mariella corona
na metá de blanques ñeves,
tán toles reines del prau,
¡cuánta bayura tien d'elles!.

Del prau son pomparines
qu'al mirales da gayola,
y cuando l'aire les mueve
abulten trebeyos de fola.

En curia-yos la corona
les yerbes tán enfotaes,
remaneciendo na llosa
toes bien encegolaes.

Tremando perseliquino
y asemeyando espumeros,
güelven les margarites
asitiase nos camperos.

Citar, tamién, p'aquellos que-yos preste'l tema de la poesía pa neños, otru interesante llibru asoleyáu en 1998 y que lleva por títulu La bola máxica (Editora del Norte, nº 9 ). El so autor llámase Laureano Benítez y recueye 27 cenciellos poemes emparentaos, del mesmu mou, cola ñatura y los xuegos de los rapazos. Y eso ye too. Dos llibros mui prestosos pa un panorama ermu que de dala manera hai que procurar enllenar.

Namás, amiguinos. ¡Fasta'l prósimu númberu!

Vicente García Oliva (alagueta@telecable.es)