*************************************************************
Pepín de Pría.

"Obres Completes"
(Poesía)

FONTE:

POSTAL 1 (*)


Respétase la grafía orixinal.

**********************************************************************

(A Angelita Yakson Veyan)

¿Visti dacuando, Anxela, 
selino riscar l 'alba 
qu'en cielo esclarecía 
y en monte rellumaba, 
pasín, pasín más roxa: 
pasín, pasín  más clara 
fasta desvanecese 
dexando namorada 
en cada flor so risa, 
so besu 'n cada rama?...
-Pos vístite, Anxelina, 
tú mesma ritratada.

¿Visti los paxarinos 
baxase a la toñada,
subise al arbolíu, 
blincar de caña 'n caña, 
beber de fueya ' n fueya 
les gotiquines d'agua 
que sobre monte y llanu 
peñeriquina l'alba, 
y erguese y esplumase 
pa char de so garganta 
de frebes d'oru fecha 
mil sonsoninos d'arpa?...
-Pos to alegría visti 
na dellos ritratada.
¿Visti per istos campos, 
tamién al riscar l'alba, 
amorosando roses, 
la pelegrina Xana 
q'al son del bur-bur trémbole 
de la fontina clara 
redobla ' ntre sospiros 
y entre sonrises canta: 
"Per siempre bienvenida, 
¡oh, dolce lluz de l'alba! 
¡Anxel amante! ¡Virxen 
de flores coronada!...
-Pos vistite per ella 
tú mesma ritratada.
Así yes tú Anxelina; 
pero direti 'n chancia 
que non pa mí, pos tengo 
la vida trestayada 
y yesmi... ¿q'has de semi 
no más q'una rapaza 
d'ocena y terciu d'años 
que par'el casu abasta? 
Pero pa los mocinos 
que al vese nisa cara 
que Dios te dio sospiren
y escapa-yos la baba, 
yes .... la lluz del so cielo, 
de sus nuiches el alba, 
xilguera de sos flores, 
de sos tristures arpa 
y de sus dolces sueños 
la pelegrina Xana.